Тајландската полиција објави во вторникот фотографии на маж, кој е осомничен за подметнување на експлозијата во главниот град Бангкок од понеделникот вечерта, во којашто според најновите податоци загина 21 човек.

Во понеделникот вечерта по локално време во центарот на Бангкок во многу посетуваниот деловен и туристички централен кварт одекна експлозија пред најголемото хиндуистичко светилиште во периодот од денот кога тоа е најпосетувано. Кусо време подоцна во непосредна близина, полициските екипи открија уште една бомба, а набргу на 30 метри од местото на експлозијата пред луксузниот трговски центар „Keson Plaza“ беше пронајдена уште една неексплодирана импровизирана направа.

Импровизираната експлозивна направа во која имало тринитротолуол, според последните сознанија не била поставена на мотоцикл, туку оставена во ранец во близина на оградата на хиндуистичкото светилиште посветено на божеството Ераван (троглав слон), веднаш пред посетуваниот трговски центар „Amarin Plaza“ и хотелот „Grand Hayatt Erawan“ кога во нив имало многу туристи. Во вторникот медиумите во Бангкок соопштија дека градот го потресоа уште две помали експлозии, во кои нема настрадани. Утрото непознато лице фрлило во река од мост во центарот на Бангкок експлозивна направа, а подоцна се случила експлозија и на метро станица, кога направа била насочена кон случајни минувачи.

Сепак, набрзо по информацијата на агенцијата AFP полицијата објави дека всушност во вторникот имало една експлозија во близина на пристанишната станица Сатон, која е во близина на метро станицата. Непознатиот од мост ја фрлил експлозивната направа во близина на докот на кој луѓе чекале брод за крстосување по каналите на Бангкок.

Откако премиерот на Тајланд, Прајут Лан-Оча, изјави дека е идентификуван осомничениот за нападот во понеделникот, полицијата во локалните медиуми распространи фотографија од лицето кое наводно ја подметнало експлозијата.

Според полицијата, главниот осомничен е маж кој е забележан на местото на експлозијата во жолта маица и ранец на грбот. Генерал-потполковникот на тајландската полиција, Правут Тхаворнсири, на социјалните мрежи објави фотографии од наводниот напаѓач, од кои на едните тој е со ранец а на други е без него. Фотографиите се направени од надзорните камери во близина на хиндуистичкото светилиште каде одекна експлозијата.

„Да, тоа е осомничениот“, рекол за агенцијата Associated Press генерал-потполковникот Правут Тхаворнсири.

Порталот Phuket Wan пишува дека мажот во жолтата маичка го оставил ранецот на една клупа во близина на храмот, а потоа употребил мобилен телефон, најверојатно за да ја активира експлозивната.

Исто така, полицијата трага по припадници на антивладина група која на Facebook изминатата седмица поставила предупредување „Бидете внимателни од 14-ти до 18-ти август“. Според, оперативните сознанија на тајландската полиција, еден од корисниците на мрежата, кој го постирал предупредувањето, во моментов се крие во северниот дел на земјата.

Според последните официјални информации, во експлозијата на раскрсницата Ратчапрасонг во центарот на Бангкок, загинал 21 човек, а меѓу жртвите се пет туристи од Кина. Меѓу 120-те повредени се и 48 државјани на Кина, Сингапур, Филипини и Малезија./крај/мф/сн

Извор: Макфакс