Додека светот радосно ја дочекуваше новата 2015 година во надеж дека ќе биде подобра од претходна, во новогодишната ноќ се умираше во стампедо, од студ и тероризам, од неодговорно прославување и од смртни казни, а напаѓани беа и цркви и џамии.

Првите минути од 2015 година во кинеската метропола Шангај ќе бидат паметени по трагедијата во којашто загинаа најмалку 36 лица, повеќето млади жени, а најмалку 47 се повредени во стампедото предизвикано од трката по „новогодишни пари“ слични на банкноти од 100 американски долари.

И во продолжение на утрото и првиот ден од новата година агенциите пренесуваа информации за трагедии. Во босанскиот град Зеница, каде температурите се симнаа до минус 18 Целзиусови степени се смрзнал 42-годишен бездомник, кој е пронајден мртов на централниот градски плоштад, а истата несреќна судбина ја доживеаја и двајца мажи во југозападна Бугарија.

На другиот крај од светот, на Филипини во многубројните несреќи кои се случија во текот на новогодишната ноќ смртно настрада 11-годишно девојченце а 170 лица се повредени. Девојчето им подлегнало на повредите откако било погодено од заталкан куршум. Филипинците традиционално ја прославуваат Новата година со огномет, петарди, но и со пукање од огнено оружје, а меѓу повредените има и повеќе деца. Во јужниот дел од земјата, жртви имаше и во бомбашки напад кој однесе два живота, а 36 луѓе се ранети. Засега никој не ја презема одговорноста за овој терористички напад.

Данската полиција објави дека енормното употребување на пиротехнички средства однело три живота. Трите жртви се убиени во два одвоени инцидента предизвикани со нестручно изведуван огномет во северниот дел од земјата. Уште други две лица се повредени во тие несреќи, соопшти полицијата која истражува дали инцидентите имаат некоја меѓусебна поврзаност, а двете се случиле во областа Мариагер Фјорд.

Десетгодишно момченце се здобил со тешки повреди на окото и може да го загуби видот откако настрадало во експлозија на петарда додека се враќал со родителите од дочекот на Новата година во областа на Неапол. Овој град е традиционално област со најмногу повредени во текот на новогодишната прослава, но за среќа годинава нема смртни случаи. Но во цела Италија вкупно 251 лице се здобило со повреди, од кои најмалку десетина се тешки.

Најмалку седум лица се рането во пукање на новогодишна забава во приватна куќа во која имало 50 лица, во близина на градот Калгари во јужната провинција Алберта во Канада. Две лица се наоѓаат во критична состојба. Повеќе лица кои се осомничени за нападот побегнале пред доаѓањето на полицијата, соопшти локалната полиција на Twitter. Непознати се мотивите за нападот, а во полиција се задржани 15 очевидци кои даваат искази.

Во Нигерија црквите беа цели на напади на исламистите. Во напад на бомбаш самоубиец на мотоцикл, кому претходно не му било дозволено да влезе во црквата, во четвртокот навечер по локално време, кој се разнел пред евангелистичката црква во Гомба, главниот град на истоимената покраина во североисточниот дел од земјата и притоа се ранети повеќе лица. Гомба беше релативно поштедена од терористичките напади на исламистичките бунтовници чии напади се главно концетрирани врз соседните сојузни држави Јоба, Борнбо и Адамава во кои припадниците на сектата Боко Харама освоија дваесетина села. Од почетокот на своите активности на оваа радикална исламистичка група во 2009 година и во одговорот на безбедните сили на Нигерија, убиени се досега над 13 илјади луѓе.

Во новогодишната ноќ во Шведска, пак, со запаллива бомба беше нападната џамија во градот Успала, што е третиот ваков напад во последните осум дена во оваа досега мирна скандинавска земја. Молотовиот коктел, сепак, не ја запалил џамијата, а според портпаролот на локалната полиција, напаѓачите на џамијата испишале вулгарни расистички пораки. Три дена претходно пожар, кој можеби е подметнат, изби во џамијата во градот Еслев во јужна Шведска. На католички Божик настрада и џамијата во југоисточниот шведски град Есклустун, при што беа повредени пет лица. Шведскиот премиер Стефен Лофвен го осуди „одвратното насилство“ и вети дека повеќе тоа нема да биде толерирано, а антирасистичкото списание Expo истакна дека во текот на 2014 година имало десетина напади врз џамии во Шведска.

Саудиец осуден за трговија со дрога стана првиот осуденик над кого е извршена смртна казна во 2015 година, во Саудиска Арабија во којашто на сила се строгите шеријатски прописи. На Малек Бен Саид ал-Сајари отсечена му е главата со сабја, традиционална егзекуција, во местото ал-Иша, откако е осуден за поседување „големо количество хашиш“. Во изминатата 2014 година смртната казна е извршена врз 87 лица во Саудиска Арабија, што е пораст во однос на претходната 2013 година кога беа егзекутирани 78 луѓе. Во оваа ултраконзервативна монархија, една од водечките земји по производство на нафта, со смртна казан се казнуваат силувањата, убиствата, вооружените грабежи и тргувањето со дроги./крај/мф/сн

Извор: Макфакс