Кандидатот на Републиканската партија за американски претседател на изборите кои ќе се одржат на 8-ми ноември, Доналд Трамп, најави во саботата дека ќе ги депортира од САД уште првиот ден од својот мандат на илјадници имигранти кои нелегално велеле во земјата и се вмешани во разни престапи сторени на американска територија.

„Многу скоро по моето избирање (за претседател) имам намера да издадам указ за депортација на илјадници илегални мигранти кои се огрешиле кон законот (на територијата на САД)“, изјави Доналд Трамп во својот говор во Де Моин, во централната сојузна држава Ајова.

Републиканскиот претседателски кандидат, исто така, најави дека ќе настојува на воспоставување електронски систем за следење на имигрантите на коишто им истекле визите, како и дека ќе предложи електронска проверка за да се спречи илегалната заедница да има пристап до социјалната нега и другите погодности, ветувајќи уште еднаш градење на „големиот ѕид“ на мексиканската граница.

„Доколку не воведеме строго контролирање на истекувањето на визите за престој во нашата земја, тоа ќе биде исто како да ги отвориме нашите граници за сите кои ќе посакаат да влезат, тоа е толку едноставно“, рече Трамп.

Републиканскиот кандидат истакна дека решавањето на проблемот на илегалната имиграција е важен за наоѓањето работни места за Американците, пренесува Reuters.

„Секогаш кога еден граѓанин афроамериканец, или кој и да е друг граѓанин, ќе ја загуби својата работа поради илегален имигрант, правата на тој американски граѓанин се целосно погазени. Еднаквата заштита според законот мора да содржи доследна примена на нашите имиграциони закони“, изјави Трамп..

Трамп повтори дека неговиот приоритет по преземањето на претседателската должноста во јануари следната година ќе биде моменталната депортација на илегалните имигранти кои останале во САД и покрај тоа што извршиле злосторства.

„Меѓународните банди и картели ќе бидат работи од минатото. Нивното владеење на теророт ќе заврши. Ќе ги користиме имиграционите закон за да спречиме злосторства и нема да чекаме невиниот американски граѓанин да настрада или да умре пред да биде преземана акција“, порача Трамп.

Малку подоцна Трамп во интервју за телевизијата Fox News изјави декан не исклучува промени во своите остри ставови во однос на имигрантите и оти може да се разгледува можноста за ублажување на постојните закони во врска со депортирањата од САД на илегалните имигранти кои живеат во земјата подолго време, имаат семејства и ги образуваат децата во Америка.

„Се разбира, омекнувањето (на законите) е можно, затоа што не сакаме да им нанесуваме штети на луѓето (..) Земете ги, на пример, лицата коишто се наоѓаат во земјата веќе 20 години, имаат одлична работа. Ќе ги земеме заедно со семејствата и ќе ги протераме од тука?“, реторички запраша Трамп.

Откако Трамп ја омекна својата реторика во однос против нелегалните имигранти, неговите противници веднаш побрзаа да го обвинат за лицемерство и недоследноста во ставовите и обид да ја спаси својата кампања со привлекување на полибералните гласачи, како и на етничките малцинства.

Неговата демократска противкандидатка Хилари Клинтон ги нарече промените во ставовите на Трамп „гест од очај“.

„Ова е очајнички обид да се заземе таква позиција, којашто не е толку поразителна за неговата кампања“, изјави Клинтон во интервјуто за телевизијата CNN,/крај/мф/сн

Извор: Макфакс