Водечкиот кандидат за номинацијата на Републиканската партија за претседателските избори во САД во ноември, милијардерот Доналд Трамп ги освои во вторникот вечерта предизборите во сојузната држава Њујорк, приближувајќи се кон освојувањето на доволниот број делегати за добивање на номинацијата, но вечерта беше малку понеизвесна за поранешната државана секретарка и прва дама Хилари Родам Клинтон, која е фаворитка за номинацијата на Демократската партија.

Предизборите во државата Њујорк биле проследени со изборни нерегуларности, па така повеќе од 125.000 луѓе исчезнале од списокот гласачи во оваа држава во која се проценува дека има околу 4 милиони избирачи кои излегуваат на партиските предизбори, истакнува AFP. Право на учество на гласањето, инаку, имаат 5,8 милиони лица запишани како демократи и 2,8 милиони регистрирани како републикански избирачи во државата Њујорк.

Доналд Трамп оствари голема победа во својата матична држава Њујорк, со што доби силен ветер в грб во постигнувањето на целта – 1.237 гласови на партиските електори потреби за номинацијата на Републиканската партија.

Трамп освои повеќе од 60 отсто од гласовите по преброените 40 проценти од гласачкиот материја, лесно победувајќи ги сенаторот Тед Круз од Тексас, и гувернерот на Охајо Џон Кесик, со што дојде во позиција да го освои мнозинството или сите 95 електорски гласови од Њујорк.

Трамп, кој и натаму нема поддршка од републиканското партиско водство и активисти, во предизборите во Њујорк влезе со 756 партиски делегати, додека Круз имаше 559, а Кесик 144. Associated Press коментира дека доколку Трамп не освои доволен број гласови до партиската конвенција во јули во Кливленд, електорите можно да преминат на страната на другите кандидати.

Водечката кандидатка во Демократската партија, Хилари Клинтон, исто така, оствари победа во државата Њујорк, која осум години ја претставуваше како сенаторка во Конгресот на САД, запирајќи го залетот на својот партиски конкурент, сенаторот од државата Вермонт, Берни Сандерс, остварувајќи голем чекор кон конечното добивање на партиската номинација.

Меѓутоа, американските телевизиски мрежи веднаш не го објавија победникот на предизборите кај демократите, оценувајќи дека иако Клинтон е во водство, првите резултати покажуваат дека е изедначена со Сандерс, иако ѝ беше неопходна јасно изразена победа откако нејзиниот противкандидат оствари серија од седум од последните осум партиски избори. Резултатите соопштени подоцна покажаа дека Клинтон освоил 60 отсто од гласовите, наспротив 40 проценти за Сандерс.

Победите на Трамп и на Клинтон во државата Њујорк, која по Калифорнија, носи најголем број делегати, им даде силен поттик на двајцата за зацврстување на позициите пред следниот вторник, кога исто така се очекува нивен добар резултат на новите пет предизбори во североисточните американски сојузни држави.

Победата на Клинтон во Њујорк над Сандерс би требало да го зголеми нејзиното водство од 244 партиски гласови во однос на противкандидатот и да направи речиси невозможно да го надомести дефицитот и да освои 2.383 партиски електори кои се потребни за номинацијата според прописите во Демократската партија, според кои делегатите се алоцираат пропорционално врз основа на резултатите во секоја од сојузните држави, коментира Reuters./крај/мф/сн

Извор: Макфакс