Републиканскиот кандидат за претседател на САД Доналд Трамп на промоцијата на својата програма на партиската конвенција во Кливленд вети дека „ќе ја направи Америка повторно голема“, уверувајќи го Американците дека ќе ги намали даноците, ќе ја ограничи миграцијата од земјите „погодени од тероризам“ и ќе ги заштитува граѓаните и конзервативните вредност, како и правото да носат оружје.

Доналд Трамп ја обвини својата противкандидатка од Демократската партија Хилари Клинтон дека зад себе како државна секретарка оставила „смрт, разорувања, тероризам и слабост“, и вети дека ќе биде остар кон криминалот и илегалните имигранти, во говорот со кој во четвртокот ја прифати номинацијата на Републиканската партија.

Говорот на Трамп беше конструиран така да воспостави атмосфера за предизборната кампања против Клинтон, што е одговор за републиканците коишто сметаат дека најдобар начин да се обедини поделената партијата е да изложи зошто демократската кандидатка не би требало да биде избрана на 8-ми ноември.

Додека аудиториумот скандираше „Затвори ја!“ поради нејзиното постапување во американската надворешна политика, Трамп одмавна порачувајќи „Да ја поразиме во ноември“. Илјадниците негови приврзаници собрани во конгресната сала бучно го одобрија.

Говорот на 70-годишниот Доналд Трамп го заклучи четиридневниот конгрес кој го истакна неговиот напор да ги залекува пукнатините во Републиканската партија поради неговата антидоселеничка реторика и загриженоста од неговиот темперамент. Собирот го бојкотираа многу лица од републиканскиот естаблишмент, како кандидатот од 2012 година Мит Ромни и членовите на семејството Буш кои на партијата ѝ ги дадоа последните два претседатела, но во третиот обид нивниот претставник убедливо заостана во трката со Трамп.

Во говорот Трамп остана цврсто против илегалните имигранти, велејќи дека тие им ги земаат работните места на американските граѓани, а во некои случаи извршуваат и злосторства. Го обвини демократскиот претседател Барак Обама дека ги поттикнува расните тензии, наместо да ги смирува.

Во својот говор понуди релативно малку поединости за своите политики, туку се прикажуваше себеси како свежа алтернатива на традиционалните политичари, кој е подготвен да ги разгледа нови пристапи за решавање и помош за работниците кои се чувствуваат оставени на цедило.

Во вреска со Клинтон ја осуди политиката на градење на нацијата која всушност до извесна мера ја воведе Џорџ В Буш, без да го спомене името на овој републикански претседател кој ги започна војните во Авганистан и Ирак.

Трамп рече дека градењето на нацијата која го следеше Клинтон во Ирак, Либија, Египет и Сирија, ја направила состојбата уште полоша.

„По 15 години војни на Блискиот исток, по билиони долари потрошени и илјадници загубени животи, ситуацијата е полоша од кога и да е. Ова е наследството на Хилари Клинтон: смрт, разорување, тероризам и слабост“, рече Трамп.

Трамп, исто така, ја обвини 68-годишната Клинтон, дека е марионета на големиот бизнис, медиумската елита и големите донатори кои сакаат да го сочуваат сегашниот политички систем.

Зборувајќи за бранот насилства во американските градови, Трамп вети дека ќе воведе закон и ред, предупредувајќи дека 160,000 илегални имигранти со криминални досиеја „ноќва слободно талкаат, за да им се закануваат на мирољубивите граѓани“.

Трамп рече дека брзо ќе се справи со насилството како што беше убиството на петте полицајци во Далас, на почетокот од јули. „Би ви порачал на сите вас: на злосторството и насилството кои денес ја оптоваруваат нашата земја наскоро ќе му дојде крајот. Почнувајќи од 20-ти јануари 2017 година, безбедноста ќе биде обновена“, рече Трамп споменувајќи го датумот кога следниот американски претседател ќе ја преземе должноста.

Притоа Трамп не заборави да ги спомене сексуалните малцинства и ткн „обоеното“ население на Америка, дел од електоратот кој традиционално гласа за демократите.

„Како ваш претседател ќе сторам сé што е во мојата моќ да ги заштитам граѓаните од ЛГБТ заедницата од насилство и терор од страна на мизантропската странка идеологија“, изјави Трамп алудирајќи на идеологијата на џихадистичката групација Исламска држава која го презема нападот врз геј клубот во Орландо со педесетина жртви.

Трамп не толку децидно ги повтори своите пораки за градењето ѕид по должина на американско-мексиканската граница за спречување на илегалната имиграцијата, привремено забранување на влезот за муслиманските доселеници од земјите од Блискиот исток погодени со војни, и за повторното преговарање за меѓународните трговски договори на САД. Исто така, вели дека ќе ги принуди американските сојузници во Европа и во Азија повеќе да плаќаат за американскиот одбранбен чадор.

Сите тие се ставови кои не ги поддржува републиканскиот естаблишмент. Во средата вечерта последниот влијателен противник на Трамп во текот на огорчената републиканската предизборна битка, сенатор Тед Круз беше исвиркан на бината, бидејќи одби да го поддржи Трамп и наместо тоа ги повика делегатите на конвенцијата да гласаат „според совеста“ што партиските челници не го прифатија./крај/мф/сн

Извор: Макфакс