Демонстрантите во Њујорк и во другите американски градови трета ноќ по ред протестираа против полициското насилство врз расните и етнички малцинства, а обвинителите најавија дека ќе ги разгледаат обвинувањата против полицаецот кој во ноември уби невооружен црнец.
 
 

Демонстрантите во Њујорк и во другите американски градови трета ноќ по ред протестираа против полициското насилство врз расните и етнички малцинства, а обвинителите најавија дека ќе ги разгледаат обвинувањата против полицаецот кој во ноември уби невооружен црнец.

Убиството на 28-годишниот Акаи Гарли во ноември на слабо осветлен простор во њујоршки Бруклин, беше последниот во низата смртоносни полициски акции коишто предизвикуваа бурни реакции и згрозувања на американската јавност поради, како што се смета, расното насилство од страна на припадниците на полицијата. Бранот масовни но главно мирни протести оваа седмица започна во средата кога големата порота на Њујорк ги отфрли обвинувањата против белиот полицаец Даниел Пантелео кој во јули со зафат кој е забранет во њујоршката полиција од пред дваесет години го задуши 43-годишниот Ерик Гарнер кој боледувал од асма, црнец и татко на шест деца кој продавал шверцувани цигари. Објавувањето на оваа одлука дојде само девет дена откако големата порота на сојузната држава Мисури, исто така, донесе одлука да не поведува судски процес против 28-годишиниот бел полицаец Дарен Вилсон од гратчето Фергусон, кој во август со шест истрели го усмрти 18-годишниот афроамерикански тинејџер Мајкл Браун, за кој се тврди дека бил невооружен. Во четвртокот протести избувнаа и во Феникс во сојузната држава Аризона, откако на 4-ти декември полицаец во туркање убил невооружен црнец. Демонстрации беа одржани и во Чикаго, Бостон, Вашингтон, Њу Орлеанс и Окленд. „Владата создаде чудовиште, и тоа чудовиште сега е во дивјачки поход“, изјави Сораја Сои Фри, медицинска сестра од њујоршки Бронкс, на протестот во Њујорк, пренесува Reuters.Државниот обвинител на округот Бруклин, Кенет Томпсон, изјави во петокот дека ќе ја свика големата порота којашто би требало да донесе одлука дали ќе го тужи полицаецот кој го убил Гарли. Од полицијата, пак, соопштија дека полицаецот Питер Лианг можеби сосема случајно го испукал смртоносниот куршум.Серијата полициски убиства на црнци го принудија американскиот политички естаблишмент досега најсилно да се фати во костец со сé поочигледниот проблем на расизмот кој доминира во односот на американските сили за одржување на редот и припадниците на заедниците со друг тен на кожата, повеќето црнечки и хиспаноамерикански. Демонстрантите тврдат дека расизмот е структурен проблем во локалната полиција низ земјата. Статистиката покажува дека црнците се претресуваат, обвинуваат и се осудуваат несразмерно почесто во однос на белците, а полицајците многу ретко одговараат за своите насилни постапки. Поранешната прва дама на САД и државен секретар Хилари Клинтон, којашто ќе биде најверојатниот кандидат на Демократската партија на претседателските избори во 2016 година, во четвртокот повика на реформи на кривичниот систем и на полициските методи на дејствување, изразувајќи жалење поради тоа што „црнците имаат повеќе шанси да бидат претресени и приведени, како и да бидат обвинети и осудени на подолги казни“ од белците.По одлуката на големата порота на Њујорк да не подигне обвинување против полицаецот Пантелео, американскиот министер за правосудство Ерик Холдер најави сојузна истрага за убиството на Гарнер, чија цел ќе биде да утврди дали на убиениот црнец му се повредени човековите права. Таквата истрага веќе е покрената и за случајот во Фергусон, и тоа пред објавување на одлуката на големата порота да не подигне обвинение против белиот полицаец./крај/мф/сн

Извор: Макфакс