Туниски војник загина во неделата навечер во експлозија на мина, којашто според тврдењето на властите, ја поставиле џихадистите откако претседателот Беџи Каид Есебси изјави дека полицијата трага по третиот сторител во нападот во музејот „Бардо“ минатата седмица кога беа убиени дваесет странски туристи.

Еден војник загина, а двајца се ранети кога нивното возило наиде на мина во планина на западот од земјата, крај границата со Алжир. Мината ја поставиле терористите“, изјави за AFP еден од портпаролите на министерството за одбрана на Тунис.

Тунис од крајот на 2012 година се обидува, засега безуспешно, да ја неутрализира групацијата поврзана со Ал Каеда во исламски Магреб (AQMI) кои дејствуваат во планинскиот предел по должина на алжирската граница.

Покрај тоа, ден по објавувањето на видеоснимката на којашто се гледаат двајцата вооружени напаѓачи во внатрешноста на музејот „Бардо“ во центарот на главниот град Тунис, претседателот Есебси изјави дека постои и трето лице кое е директно вмешано во нападот за кој одговорноста ја презема џихадистичката групација Исламска држава во кој минатата среда загинаа 20 странски туристи и еден туниски полицаец.

„Сигурно е дека биле тројца (…) Двајца се убиени, но еден уште е во бегство“, изјави тунискиот претседател за француските медиуми. Меѓутоа, не кажа каква била улогата на ова лица. На видеоснимките од надзорните камери објавени во саботата се гледаат двајца напаѓачи како вооружени со автомати се шетаат низ салоните на музејот. Потоа на снимките се гледаат нивните мртви тела, а во еден инсерт тие уште се живи и кусо разговараат со еден маж.

Тунискиот државен секретар за безбедност, Рафик Чели, изјави за порталот на парискиот неделник Paris Match дека третото лице на снимката „е еден од двајцата возачи на скутери кои ги довеле напаѓачите, а потоа сакал да побегне кога го видел жестокиот одговор на полицијата којашто веќе пристигнала на местото на настанот“. „Возачите и другите логистички помагачи, вкупно 15 лица, се зад решетки“, додава Чели.

Министерството за внатрешни работи соопшти во саботата за AFP дека се уапсени повеќе од десет лица. Истиот ден министерството објави потерница по Махер Бен Мулди Каиди, „опасен терорист (…) по кој се трага поради учество во терористичката акција“. Како што појасни Чели за Paris Match, наводно станува збор за лице коешто го координирало нападот и не пукало врз терористите.

Властите известија само за двајцата напаѓачи убиени во престрелката со полицијата. Двајцата напаѓачи се идентификувани како средношколецот Џабур Кашнуи од покраината Касарин и 27-годишниот Јасин Лаабиди. Двајцата обуката за ракување со оружје ја добиле во соседната Либија, истакна туниската влада и додава дека ѝ биле познати на полицијата.

Претходно во четврокот џихадистичката групација Исламска држава ја презема одговорноста за нападот од средата во музејот „Бардо“ во Тунис преку аудио снимката објавена во четвртокот на џихадистичките мрежни страници. Нарекувајќи го нападот во музејот во центарот на туниската престолнина „благословен напад на еден од бастионите на неверниците во муслимански Тунис“, гласот кој се слуша на аудио снимката вели дека крвавата акција ја извеле „двајца рицари на калифатот, Абу Закарија ал-Тунис и Абу Анас ал-Тунси“.

„Истрагата ќе оди далеку“, истакна во неделата претседателот Есебси, додавајќи дека се води уште една истрага со којашто ќе се утврди кој е виновен за безбедносните пропусти во многу посетуваниот музеј „Бардо“.

Нападот во музејот е први во Тунис по 2002 година во кој жртвите се странци. Покрај тоа, прв е и за кој одговорноста ја презема Исламската држава којашто пустоши во соседна Либија, како и претходно во Сирија и во Ирак, а во нејзините редови има стотици Тунижани.

Најголемиот музеј во Тунис – „Бардо“, ќе биде отворен во вторник, потврди за AFP, неговиот кустос Монсеф Бен Муса, истакнувајќи дека археолошките експоната не биле оштетени во нападот./крај/мф/сн

Извор: Макфакс