Турските власти во вторникот наредија евауација на населението од пограничниот град Каркамиш, откако беше гранатиран со минофрлачки оган од страна на припадниците на ултрарадикалната сунитска организација Исламска држава од територијата на Сирија, пренесе телевизијата NTV, а министерот за надворешни работи Мевлут Чавушогли порача дека неговата земја е подготвена да даде секаква помош во ослободувањето на градот Џараблус во северна Сирија кој е под контрола на џихадистите.

Каркамиш се наоѓа на самата граница со Сирија, и точно наспротив сирискиот град Џараблус, кој е во рацете на Исламската држава. Во Каркамиш, во покраината Газинатеп, во вторникот паднаа најмалку две минофрлачки гранати, на што турската војска возврати со артилериски оган. Една од гранатите паднала на плоштадот непосредно пред зградата на градскиот совет, но нема настрадани. По наредбата за евакуација на Каркамиш испратени се автобуси за да ги превезат луѓето кои се без сопствени возила.

Џараблус се наоѓа на околу 30 километри од Манбиџ кој е во рацете на курдско-арапската коалиција предводена од курдската милиција Единици за заштита на народот (YPG), кои имаат логистичка и стратешка поддршка на теренот од американските воени експерти и специјалци. Курдската милиција YPG, којашто е главнината на Сириските демократски сили (SDF), курдско-арапска коалиција, брзо напредува кон Џараблус следејќи го отстапувањето на групите на Исламската држава. Курдите имаат намера да отворат преку Џараблус коридор од Кобани кон нивниот друг изолиран кантон Африн во северозападниот дел од покраината Алепо, каде што живеат околу 1,5 милиони луѓе.

Турција има намера да го спречи заземањето на Џараблус од страна на Курдите, град на западниот брег на реката Еуфрат и ги поддржува единиците на сунитската сириска вооружена опозиција кои се подготвуваат за офанзива против Исламската држава во оваа област. Затоа изминатите денови покрај позициите на Исламската држава, ги гранатираше и курдските сили кај Манбиџ.

Турција, покрај справувањето со курдскиот бунт на својата територија, е загрижена и за обидите на сириските Курди да се пробијат западно од нејзината граница. За да ги попречи тоа, Турција им дозволи на сириските сунитски бунтовници кои се обединети како Слободна сириска армија (FSA) да се групираат на нејзината територија пред да го нападнат Џараблус кој од другата страна го контролира Исламската држава.

Стотици сириски бунтовници извесен период се подготвуваат со поддршка на Анкара од турската страна на границата за офанзива со којашто во следните денови би го заземале Џараблус.

Турција е подготвена да ја обезбеди сета неопходна помош во операцијата за ослободување на Џараблус од милитантите на Исламската држава, порача во вторникот вечерта министерот за надворешни работи Мевлут Чавушоглу.

Како што пренесе електронското издание на весникот Daily Sabah, на заедничката прес-конференција во Анкара со унгарскиот шеф на дипломатијата Петр Сијарто, Чавушоглу изјавил дека Турција не сака Исламската држава да дејствува во Ирак и во Сирија, како и дека ќе го даде неопходниот придонес за да се исчистат соседните земји од терористите.

„Во моментов ние ги обезбедуваме сите видови логистичка поддршка за земјите од коалицијата (предводена од САД –з.р.) и активно учествуваме до борбата против Исламската држава. Уништиме повеќе од 650 терористи на Исламската држава во логорот Башика (во северен Ирак – з.р.), со поддршка на артилеријата“, прецизирал Чавушоглу.

Во извештајот на весникот се наведува дека се очекува офанзивата врз Џараблус да започне во најскоро време.

Чавушоглу, притоа, истакнал дека во среда нема да се одржи трилатералниот состанок со учество на челниот на курдската автономија во северен Ирак, Масуд Барзани, кој пристигна во Анкара во вторникот, и потпретседателот на САД, Џозеф Бајден кој во турската престолнина ќе допатува во среда./крај/мф/сн

Извор: Макфакс