Покрај големата воена операција на југоистокот од Турција против курдските герилци, авионските напади во североисточната курдска автономија во Ирак каде ги напаѓа позициите на забранетата Работничка партија на Курдистан (PKK), во саботата ги оствари заканите и ги гранатираше областите во северна Сирија кои се под контрола на тамошните курдски сили, што дополнително ќе ги компликува и отежни напорите на меѓународната заедница за решавање на сирискиот конфликт.

Американскиот државен секретар Џон Кери, кој учествува на Минхенската безбедносна конференција, предупреди дека сириската криза е на „пресвртницата“ меѓу војната и мирот, ден откако САД и Русија се договорите за скорешен „прекин на непријателствата“.

„Турската артилерија отвори оган врз позициите на позициите на борците на YPG територијата на воздухопловната база Минех и селото Мариназ на северот од Алепо“, изјавил претставник на курдските сили за самоодбрана за телевизијата Al-Mayadееn.

Турската артилерија ги гранатирала секторите во северната сириска покраина Алепо од кои Единиците за заштита на курдскиот народ (YPG) неодамна ги истиснаа исламистичкиите групации како Исламската држава.

Веќе следниот ден курдските сили влегоа и во истоимениот град Минех. Со тоа, YPG ги пресече правците за снабдување и доведување нови борци преку пограничниот град Азаз кои од турска територија се префрлаат во покраината Алепо.

Аеродромот Минех, оддалечен десетина километри од турската граница, е сместен меѓу двете главни магистрални сообраќајници кои од Алепо, најголемиот сириски град и поранешна економска престолнина, водат кон Азаз, кој е малку посеверно.

Во саботата пред турското гранатирање, сунтиските бунтовници ја нападнаа населбата во градот Алепо во којашто живеат Курди. Според локалните курдски милиции, ваквите акции се одговор на успехот на YPG кои се покажаа како најдобрите борци на теренот во Сирија, како и во соседен Ирак, против Исламската држава и другите џихадистички групации.

Ова не е прво гранатирање на турската војска на територијата на Сирија, откако пред една седмица турските вооружени сили отворија оган врз позициите на сириската владина војска во северниот дел на покраината Латакија. Во овој напад загина еден сириски војник, како и најмалку тројца цивили.

Турција во вторникот го повика американскиот амбасадор за да му врачи протест откако портпаролот Стајт департментот изјави дека Вашингтон не ја смета Партијата на курдскиот демократски сојуз (PYD) за терористичка организација. Тензиите меѓу Анкара и Вашингтон, во моментите кога турската страна бара дејствување на НАТО во имигрантската криза, како и нејзините напнати односи со Русија, избувнаа поради Партијата на курдскиот демократски сојуз (PYD), којашто САД ја сметаат за сојузничка во борбата против џихадистичките групи и особено Исламската држава во Сирија.

Анкара ја смета PYD за сестринска партија на Работничката партија на Курдистан (PKK), која со децении води борба за независна држава, а којашто Турција, САД и Европската унија ја прогласија за терористичка организација.

Запрашан во понеделникот за разликите во мислењата меѓу САД и Турција, портпаролот на американската дипломатија Џон Кирби изјави дека „Тоа не е нова загриженост (…) А ние, како што знаете, не ја сметаме PYD за терористичка организација“, рече Кирби.

Турција стравува дека курдските милиции Единици за заштита на народот (YPG), која е блиска со PYD, во Сирија ќе ги разгори сепаратистичките тежнеења на турските Курди, како и нивно контролирање на сириските територии во близина на турската граница и на границата со Ирак од која страна исто така живеат Курди.

Турскиот претседател Реџеп Тајип Ердоган претходно објави дека Анкара би можела да преземе воени операции во Сирија за да го запре напредувањето на YPG./крај/мф/сн

Извор: Макфакс