Војна операција спасување на 38-те војници кои ја обезбедуваа гробницата на Сулејман Шах во соседна Сирија во област којашто е под контрола на џихадистите од Исламската држава изведена ноќта кон неделата била за да се спречи евентуален напад врз нив, изјави во понеделникот портпаролот на турскиот претседател Ибрахим Калин.

Операцијата во којашто биле ангажирани беспилотни летала, тенкови, оклопни возила и извидувачки авиони, како и неколку стотини припадници на пешадијата е прва ваква акција на турската армија во Сирија од почетокот на граѓанската војна која прерасна во конфесионален судир кој ја изроди појава на радикални исламистички групи како Исламската држава и Фронтот ан-Нусра.

„Со оваа операција нашата влада ја отстрани опасноста од потенцијален напад врз гробот на Сулејман Шах и оваа воена позиција, и ја намали можноста животите на нашите војници да бидат доведени во опасност“, изјави Калин на прес-конференцијата во Анкара. Одлуката за акцијата е донесена поради влошување на ситуацијата околу турската енклава од неколку стотини квадратни метри, каде што почиваат останките на Сулејман Шах.

Сириската влада ја обвини во неделата Турција дека со упадот на нејзините единици претходната ноќ во северна Сирија извршила „очигледна агресија“. Во соопштението Дамаск објаснува дека турската влада го известила сирискиот конзулат во Истанбул за операцијата за преместување на гробницата на Сулејман Шах, но дека не чекала да добие согласност или координација.

Гробницата на Сулејман Шах, дедото на Осман Први, основачот на Отоманското царство, Анкара ja смета за турска територија од потпишувањето на договорот меѓу Франција, којашто тогаш ја заземаше таа територија, и Турција од 1921 година. Гробот на Сулејман Шах се наоѓа во близина на тврдината Џабер во близина на сириската метропола Алепо, во која до пред граѓанската војна започната во март 2011 година мнозинство од населението го сочинуваа алавитите (шиитите) и христијаните. Според договорот од 1921 година, гробницата е прогласена за турска енклава во Сирија и е постојано заштитувана од турската армија, од гарнизон чија бројност не надминуваше 40 војници.

Минатата седмица весникот Hurriyet повикувајќи се на интерен доверлив документ на разузнавањето MIT објави дека околу 3.000 милитанти на ултрарадикалната исламистичка групација Исламска држава од соседните Сирија и Ирак настојуваат да влезат во Турција преку нејзината јужна граница.

„Милитантите кои се тренирани и стручни за планирање и изведување самоубиствени и бомбашки напада подготвуваат (…) напади врз дипломатските и други мисии на земјите од коалицијата којашто интервенира во Сирија, особено во Анкара и во Истанбул, како и вопокраините Адана и Хакај“, го цитира Hurriyet документот на турското разузнавање датиран од 3-ти февруари, во кое се додава дека напади се можни и во Бугарија, од каде што милитантите имаат намера да се префрлат во земјите од Европската унија.

Портпаролот Калин на истата прес-конференција изјави дека Анкара интензивно соработува со британските власти за трите девојки од Лондон кои минатата седмица допатувале во Турција, а се верува дека се упатиле кон Сирија за таму да се придружат во Исламската држава.

Турција подолг период од своите западни партнери е критикувана дека толерира минување преку нејзината територија на странски борци кои им се приклучуваат на џихадистичките групи во Сирија и во Ирак. Според последните процени на западните разузнавачки агенции, во редовите на Исламската држава се борат околу 20.000 странски платеници и доброволци од повеќе од 80 земји од Европа, од Блискиот и Далечниот исток, како и од САД и од Кина.

Турските власти депортирале 1.400 странци и им забранила патувања на повеќе од 8.000 државјани претежно на западни земји, како дел од напорите за спречување на регрутирањето на нови џихадистички борци на боиштата во соседните држави, изјави во понеделникот Калин./крај/мф/сн

Извор: Макфакс