Самитот на челниците на земјите членки од групата Г20 кој започнува во сабота во австралиски Бризбејн може да се претвори во своевидна пресметка меѓу западните лидери и рускиот претседател Владимир Путин, имајќи ги предвид притисоците што последните денови ги прави Западот со информациите за наводното влегување на руски единици во источна Украина, што Москва одлучно го негира сметајќи го за пропаганда без аргументи. 

Украина во четвртокот ја обвини Русија дека на рускојазичните бунтовници од истокот кои самопрогласија ткн народни републики во Донецк и во Луганск им испраќа конвои во луѓе и оружје, наводно со цел да покренат нова офанзива во судирот во кој досега од април годинава загинаа повеќе од четири илјади луѓе. Русија од почетокот ги демантира таквите информации, додека проруските бунтовници ги обвинуваат прозападните власти во Киев дека трупаат сили во близина на Донецк за да покренат офанзива со која треба да ги вратат териториите што ги загубија во бунтовничката офанзива во август.

Меѓутоа, се почести се извештаите за кршење на примирјето од 5-ти септември постигнато во белоруската престолнина Минск и извештаите за воени конвои без ознаки и од правец на централна Украина, како и од правец на границата со Русија. Така што, се стравува дека кревкото примирје би можело целосно да пропадне.

Инаку во центарот на разговорите на челниците на Г20 во Бризбејн ќе биде поттикнувањето на светскиот економски раст, осигурување на стабилноста на глобалниот банкарски систем и затворање на дупките во законите за големите мултинационални компании за да им се оневозможи да го избегнуваат плаќањето на даноците.

Имајќи предвид дека САД и Кина минатата седмица на самитот на азиско-пацифичката економска соработка во Пекинг – APEC, постигнаа договор за економските и стопански прашања, како и договор за борбата против климатските промени, во центарот на дебатата бездруго ќе дојде прашањето на безбедноста.

Украина не беше главна тема во текот на двата самита одржани минатата седмица, изјави за Reuters советникот за национална безбедност на САД, Бен Родс, и покрај тоа што претседателот Барак Обама кусо во најмалку три наврата разговараше со рускиот претседател Владимир Путин на маргините од самитот на APEC во Пекинг.

Американскиот претседател во Бризбејн ќе пристигне во сабота и со главните соработници од западниот блок, меѓу кои се германската канцеларка Ангела Меркел, францускиот претседател Франсоа Оланд и британскиот премиер Дејвид Камерон, ќе разговара за незадоволството од моменталната ситуација во Украина. „Тие се од клучна важноста кога станува збор за пренесувањето на пораките за руската и за украинската влада, и тоа ќе биде можноста со нив да се зборува за тоа“, рече Родс.

Во Австралија се слушаа повици на рускиот претседател Путин да не му се дозволи учество на самитот во Брибејн, обвинувајќи ја Русија дека се меша во Украина како и тврдењата дека рускјазичните бунтовници го соборија кон средината на јули патничкиот авион на „Malaysia Airlines“ со 298 патници и членови на екипажот на летот од Амстердам до Куала Лумпур, од кој над 30 беа австралиски државјани. Меѓутоа, ваквата иницијатива беше отфрлена со консензус.

Инаку Путин во Пекинг имаше средба и разговори со австралискиот премиер Тони Абот, токму за темата на малезискиот авион, но не следуваше поопширен извештај и изјави за текот на разговорот./крај/мф/сн

Извор: Макфакс