САД оценија во четвртокот дека сириските и руските напади врз бунтовниците во сирискиот град Алепо се подарок за екстремните исламистички групи, што исто го смета и Русија одговарајќи на заканите и одбивањата од Вашингтон на соработката со Москва во Сирија, а Лондон го отфрла рускиот предлог за 48-часовно хуманитарно примирје.

„Ова што (сирискиот претседател Башар ал-)Асад и Русија го прават во Алепо ја сече душата. Ова што го прават значи не само пропаст за таа земја…, туку ќе предизвикаат нов бегалски бран и уште поголемо радикализирање. Ова што го прават е подарок за Исламската држава и Џебхат ан-Нусра (сириското крило на Ал Каеда) групите, за коишто тврдат, сакаат да ги сопрат“, изјави американската амбасадорка во Обединетите нации, Саманта Пауер.

Претходно државниот секретар Џон Кери, како и Пауер, се закани дека САД ќе ја прекинат соработката со Русија доколку не запре офанзивата во Алепо.

Русија, истовремено, исто така, ги обвини САД дека „дефакто го поддржуваат тероризмот“ во Сирија, порачувајќи дека токму во Алепо бунтовниците коишто тие ги поддржуваат соработуваат со Џабхат ан-Нусра.

Одбивањето на Вашингтон да соработува со Москва во борбата против терористите во Сирија ќе биде „најдобриот подарок“ за милитантите, возврати во четвртокот вечерта портпаролката на руското министерство за надворешни работи Марија Захарова.

Предупреди дека „доколку се оствари заканата од Вашингтон да ја прекине соработката во обликување на решенијата, тогаш повеќе нема да има сомневања дека Белата куќа ги зела под своја закрила милитнатите и терористите силно ќе прославуваат“.

Захарова истакна притоа дека Вашингтон подолг период од почетокот на сирискиот конфликт од март 2011 година, до летото 2014 година, во принцип го негираше присуството на џихадистичките терористи во Сирија.

Британскиот амбасадор во ОН, Метју Рикрофт за новинарите изјави дека време е да се „премине на друг вид дипломатија“, укажувајќи на Советот за безбедност

Го отфрли рускиот предлог за 48-часовен хуманитарен прекин на огнот. ОН инаку од јули секоја седмица бара борбите да прекинат на два дена за да се овозможи доставување хуманитарна помош во опколените бунтовнички квартови во Алепо.

„Рускиот предлог е замислен добро да звучи, но и да им овозможи да го продолжат бомбардирањето“, рече британскиот дипломат.

Францускиот амбасадор во светската организација Франсоа Делатре изјави дека започнал консултации со некои членки на Советот за безбедност за нацрт резолуција со која ви се направил обид да се воведе прекин на огнот во Алепо. Но неговата американска колешка Пауер изјави дека уште не го видела нацртот на текстот.

Главниот потсекретар на ОН за хуманитарни прашања Стивен О’Брајан го повика Советот за безбедност во четвртокот да прекине да го толерира кршењето на меѓународното хуманитарно право во Сирија.

„Источно Алепо во овој момент не е на работ на амбисот, туку ита во немилосрдната провалија на хуманитарна катастрофа каква што уште немаме видено во Сирија. Единственото средство за одвраќање кое преостанува, се чини, е одговорноста пред судот на јавноста и гадењето, бидејќи очигледно ништо друго не успева да го запре тоа намерно, незаслужено крвопролевање“, смета О’Брајан./крај/мф/сн

Извор: Reuters/РИА Новости