Претседателот на Претставничкиот дом на американскиот Конгрес, Џон Бонер и други влијателни републикански и демократски конгресмени побараа од претседателот Барак Обама што поскоро да одобри испраќање на американско смртоносно оружје за борбата на Украина со рускојазичните бунтовници во моментите која сојузниците на САД во Европа сметаат дека мировниот договор постигнат на 12-ти февруари во Минск задоволително се спроведува.

„Ве повикуваме што поскоро да ги одобрите дополнителните мерки за помош на украинските настојувања да ја одбранат својата суверена територија, со трансферот на системи за вооружување на украинската војска“, се наведува во писмото кое било испратено до американскиот претседател Барак Обама во средата, а го потпишале осум републикански и тројца демократски конгресмени, пренесува Reuters.

Пред пишувањето на писмото, претседателот на Претставничкиот дом, Џон Бонер заедно со неколку членови на Конгресот минатата седмица се сретна со украински парламентарци.

Американскиот претседател Обама внимателно ги одмерува состојбите околу украинската криза. Тој не исклучува оружје, како и дополнителни санкции за Русија поради нејзината наводна поддршка на рускојазичните бунтовници во источна Украина.

Москва повеќепати предупреди дека испораките на американското оружје за Украина ќе значи и ескалација на судирот и го обвини Вашингтон дека ги поттикнува воинствените радикално националистички струи во Киев со цел да го урнат договорот од 12-ти февруари постигнат во Минск меѓу челниците на Украина, Русија, Франција и Германија.

Во четвртокот портпаролот на руската дипломатија, Александр Лукашевич на брифинг со новинарите порача дека Москва е вознемирена и загрижена од информациите за големите испораки на оружје од САД за Украина.

„И покрај прилично успешното имплементирање на договорот за прекин на огнот во Донбас, кој беше постигна на 12-ти февруари годинава во Минск, во соработка со челниците на земјите од ткн ’нормандски формат’ (Украина, Русија, Германија и Франција) се јавува сериозна загриженост од продолжување на информациите за намерите на САД да започнат со масивна испорака на оружје за Украина“, рече Лукашевич.

„Во Конгресот, дури, се разработува специјален закон кој предвидува издвојување на милијарда американски долари за опремување и обука на украинската армија, небаре во Вашингтон се подготвуваат да ја земат под целосна управа“, додаде портпаролот на руското министерство за надворешни работи.

Додаде дека „очигледно е дека тие (САД) имаат намера во оваа земја да несат немир“. „Би било убаво властите во Киев и целиот украински народ да се замислат за последиците од таквите чекори“, рече Лукашевич порачувајќи дека „со оружје војната не се гаси“.

„Одново го предупредуваме Вашингтон за огромната штета врз нашите билатералните односи, доколку започне со убивање на населението во Донбас со американско оружје. Испораките на оружје нема да бидат само поткопување на примирјето туку ќе придонесат и за ескалација на југоистокот, а ќе ја загрозат и безбедноста на Руската Федерација“, рече рускиот дипломат.

Минатите денови беше објавено дека САД планираат да испратат во Украина во периодот од март до октомври најмалку 300 војници во рамките на проектите за соработка со украинската армија. Американскиот воен персонал ќе биде сместен во Меѓународниот центар за поддршка на мирот и безбедноста (International Peacekeeping and Security Center — IPSC) на Јаворовскиот полигон во Л’вовската област во рамките на заедничките воени вежби. Според соопштението на Киев, „предвидено е овие активности да траат од 5-ти март до 31-ви октомври 2015 година, само околу осум месеци„.

Американски функционери од администрацијата на Белата куќа велат дека стравуваат од ескалација на судирот, а не сакаат и САД да бидат вовлечени во посредна војна со Русија.

Викторија Нуланд, помошничката на американскиот државен секретар за европски прашања, изјави на конгресното сослушување во средата дека САД во последните 14 месеци дале 118 милиони долари за безбедносна помош за Украина, а само во февруари годинава Стејт департментот наменил речиси 17 милиони долари хуманитарна помош во оваа земја.

Американските конгресмени од двете партии изразуваат фрустрираноста од отпорот на администрацијата на претседателот Барак Обама да испорача смртоносно оружје во Украина, сметајќи ја ситуацијата во Украина за руска агресија./крај/мф/сн

Извор: Макфакс