Американка којашто го загубила сопругот во терористичките напади од 11-ти септември 2001 година, поднесе тужба против Саудиска Арабија, обвинувајќи ги властите на оваа блискоисточна арапска монархија за поддршка на џихадистичката мрежа Ал Каеда која ја презема одговорноста за најголемиот напад на територијата на САД во историјата во кој животите ги загубија околу три илјади луѓе.

Како што пренесува во саботата агенцијата Bloomberg News, Стефани Рос ДеСимон ја поднела тужбата пред судот во Вашингтон само два дена откако Конгресот во средата и покрај ветото од страна на американскиот претседател Барак Обама со огромно мнозинство го прифати законот дозволувајќи им на семејствата на жртвите од терористичките напади да ја тужат Саудиска Арабија.

Петнаесетте од деветнаесетте извршители на џихадистичките напади во четирите грабнати авиони во „Кулите близначки“ од Светскиот трговски центар во Њујорк, во зградата на Пентагон во Вашингтон, и во урнатиот авион во сојузната држава Пенсилванија, биле државјани на Саудиска Арабија.

ДеСимон, која била бремена кога нејзиниот сопруг бил убиен на 11-ти септември 2001 година при уривањето на авионот во Пентагон, од свое и во името на својата ќерка ја обвинува оваа сунитска монархија во која се практикува вехабитскиот ислам за давање поддршка на терористичката организација Ал Каеда и на нејзиниот основач и челник Осама Бин Ладен, исто така Саудиец.

Нејзиниот сопруг, Патрик Дан, служел во американската воена морнарица. ДеСимон, како што пренесува агенцијата повикувајќи се на судските документи, бара надомест на штета во износ кој не е соопштен, за насилната смрт на сопругот и намерното доведување до состојба на нервно растројство.

Од министерството за надворешни работи на Саудиска Арабија соопштија, дека законот кој го донесе Конгресот, ги поткопува принципите на имунитетот на суверена држава, којашто е основа за меѓународните односи стотици години.

Ви средата двата дома на американскиот Конгрес, првпат од 2008 година го отфрлија ветото наложено од претседателот Барак Обама, и го поддржаа законот кој ја овозможува ваквата постапка. Самиот Обама во писмото испратено до пратениците предупреди дека законот може да има катастрофални последици за американските воени лица во странство и оти ќе го ослаби принципот на имунитет кој ги штити САД и нивните дипломати од судски прогони и може да се врати како бумеранг и да овозможи прогон на американските државјани ширум светот.

Во соопштението американскиот претседател Барак Обама наведе дека споменатиот закон би можел да доведе до тужби против американски функционери за акции на странски групи кои ја имаат американската помош, добиваат воена опрема или обука, како и дека би ѝ наштетило на соработката со сојузниците во борбата против тероризмот.

Овој закон „нема да ги штити Американците од терористички напади, а нема ниту да ја подобри ефикасноста на нашиот одговор во случај на таквите напади“, истакна Обама во писмото што ум го упати на демократските и републиканските челници во Сенатот, пред гласањето во средата.

И директорот на Централната разузнавачка агенција (CIA), Џон Бренан кој пред неколку месеци престојуваше во Саудиска Арабија за да ги стивне острите реакции на Ријад во врска со овој закон“, се изјасни против документот, велејќи дека тој „ќе има сериозни последици за националната безбедност на САД“ и „за владините службеници кои во странство работат за својата земја“.

Меѓутоа, во САД постои увереност дека властите на Саудиска Арабија замижувале пред активностите на Ал Каеда, па дури и можеби имале контакти со мрежата, што ги прави делумно одговорни за нападите од 11-ти септември.

Официјален Ријад, од своја страна, уште пролетва преземаа чекори за да биде прифатен тогаш нацрт-законот, заканувајќи се дека ќе го продадат својот имот во САД Д во износ од 750 милијарди долари во кои спаѓаат и американските државни обврзници, за да не им бидат замрзнати доколку судовите донесат такви одлуки по барањата од тужбите. Исто така, се споменуваше и обемот на американскиот долг кон Саудиска Арабија, кој според американското министерство за финансии изнесува 116,8 милијарди долари./крај/мф/сн

Извор: Макфакс