Најмалку 26 цивили се убиени во североисточна Сирија во воздушни напади коишто судејќи според сé ги извела меѓународната коалиција предводена од САД, објави во понеделникот вечерта опозициската Сириска опсерваторија за човекови права (SOHR), откако претходно оваа невладина организација со седиште во Лондон и сириската влада ја обвинија коалицијата дека извршила воздушен напад врз база на владините сили во кој убила четири а ранила 13 војници.

Седум деца и четири жени се меѓу жртвите во нападите изведени близу областа ал-Хол, којашто во ноември од џихадистите на Исламската држава ja преземаа сунитските арапски и курдски бунтовници, се прецизира во соопштението на SOHR.

„Нападите биле насочени на селото ал-Кан, каде уште се одржува Исламската држава“, изјави за AFP, директорот на Опсерваторијата, Рами Абделрахман. „Меѓутоа, Даеш (арапски акроним за Исламската држава во Ирак и на Левантот – ISIL – з.р.) е присутна само на периферијата од населбата, затоа сите жртви се цивили“, додал.

Абдeлрахман изразил и стравување дека бројот на цивилните жртви може да биде поголем, бидејќи активистите на SOHR јавиле дека под урнатините има најмалку 17 лица кои се водат како исчезнати.

Меѓународната коалиција која ја предводат САД, ги започна воздушните удари врз позициите на Исламската држава во Сирија, без договор или координација со владата во Дамаск или со мандат на Обединетите нации, во септември 2014 година.

Сириското министерство за надворешни работи и SOHR претходно во понеделникот соопштија дека коалициските авиони бомбардирале камп на сириската армија во покраината Деир-ез-Зор, при што убиле четворица и раниле тринаесет војници.

Коалицијата објави дека не го гаѓала кампот на сириската армија, што официјален Дамаск го нарече „агресија врз Сирија“ и најави известување на генералниот секретар и Советот за безбедност на ОН.

„Известени сме дека во печатот излегле тие информации, но никаков удар не изведовме во тој дел од Деир-ез-Зор“, изјави за AFP портпаролот на мисијата, полковникот Стивен Ворен.

Меѓутоа, малку подоцна портпаролката на Пентагон изјави за руската агенција РИА дека американското министерство за одбрана не располага со информации дека сириски војници можеле да бидат во областа на воздушните удари на коалицијата во покраината Деи-ез-Зор, но дека детално ќе ги испита сите извештаи.

„Извршивме четири воздушни удари во покраината Деир-ез-Зор, сите биле нанесени врз нафтени извори“, изјавила портпаролката на Пентагон, полковник Мишел Балданза, повторувајќи ги претходните процени на американските воени функционери дека нападите биле извршени на 55 километри од местото каде се убиени сириските војници.

„Не сме гаѓале на возила или жива сила во тој регион. Немаме податоци дека сириски војници би можеле да бидат во близината на нашите воздушни удари“, додала.

Според Балданза, САД се водат според „строги протоколи“ за да се осигури прецизноста на воздушните и за да не се дозволат колатерални жртви.

„Ги земаме предвид сериозно сите обвинувања за можна колатерална штетата и ќе ги проучиме сите наводи што ќе ги добиеме“, уверува портпаролката на Пентагон./крај/мф/сн

Извор: Макфакс