Организацијата WiiLeaks го објави првиот дел од писмата на Џон Подеста, шеф на изборниот штаб на поранешната државна секретарка и актуелна кандидатка на Демократската партија за претседателските избори, Хилари Клинтон, во кои се наведуваат забелешките за интересите на Турција во конфликтот во Сирија, како и нуклеарна компанија поврзана со братот на Подеста.

„Денеска WikiLeaks започнува со својата серија (публикации) во случаите коишто се однесуваат на менаџерот на изборната кампања на Хилари Клинтон, Џон Подеста“, се наведува во соопштението објавено на страницата на организацијата.

Се истакнува дека првиот дел од документите вклучуваат 2.060 електронски писма и 170 апликации од повеќе од 50.000 лични преписки. Повеќето од половината од материјалите се посветени на нуклеарната енергија и на „Uranium One“, компанија којашто според претседателскиот кандидат на републиканците, Доналд Трамп, ја води Тони Подеста, братот на Џон Подеста.

Трамп, исто така, од поодамна тврди дека Хилари Клинтон во периодот кога ја извршуваше должноста државен секретар на САД, од 2009 до 2013 година, ѝ предала на „Uranium One“ 20 отсто од резервите американски ураниум, а тоа се поврзува со учеството во семејната фондација на Клинтонови.

Компанијата „Uranium One“ е еден од најголемите светски производители на ураниум, инаку регистрирана во Канада и има глобално портфолио со меѓународни активи во Казахстан, САД и Австралија. Државната руска компанија „Росатом“ преку свои филијали има во посед 100 отсто од преостанатите обични акции на „Uranium One“.

Во денешната објава има и преписки, кои се однесуваат на Турција и нејзините интереси во сирискиот конфликт, како и на улогата во борбата против џихадистичката групација Исламска држава.

„Турција сака да се воспостави зона за забранети летови во северна Сирија, за да се заштитат бегалците и да се спречи нивниот прилив во Турција. Но тоа може да се случи само доколку тие и другите таму распоредат свои копнени војски“, се вели во едно од писмата од претставникот на Советот за одбранбена политика на САД.

Во писмата, исто така, се истакнува дека Иран може да биде „обединувачка тема“ за САД и Турција и се посочуваат Русија, Иран и сирискиот претседател Башар ал-Асад како закана за безбедноста на двете земји.

Од штабот на Хилари Клинтон веднаш одговорија на оваа објава на WikiLeaks, велејќи дека нема потврда на автентичноста на украдените документи. Според претставници на изборниот штаб, Џулијан Асанж кој претходно на прес-конференција во Берлин најави објавување серија документи кои ќе се однесуваат на американските претседателски избори, „не ја крие својата желба да ѝ наштети на Хилари Клинтон“.

„Не сум среќен поради хакирањето од страна на Русите, кои се обидуваат да му дадат предност на Трамп“, напиша Подеста на својот акаунт на Twitter додавајќи дека „немал време“ да провери кои документи се автентични.

Претходно WikiLeaks објави 19.252 електронски писма на Националниот комитет на Демократската партија (NDC) од кои произлегува дека партиската елита и раководството барале начини како да осигурат Хилари Клинтон на партиските предизбори за номинацијата на претседателските избори да го дискредитираат преку конструкции нејзиниот главен конкурент сенаторот Берни Сандерс кој подоцна се повлече од трката за партиската номинација.

Претходно во петокот вечерта по средноевропско време американската администрација првпат официјално ја обвини Москва за наводни информатички напади врз политичките организации и изборниот систем во САД, кои биле извршени претходно годинава, а и истекувањето на доверливи информации.

Портпаролот на Кремљ, Дмитриј Песков, како и во претходните вакви изјави, кусо коментираше во саботата утрото дека станува збор за „глупости“./крај/мф/сн

Извор: Макфакс