Рускиот план за политичка транзиција во Сирија нема да биде главна точка на преговорите за тоа тема на вториот круг од преговорите во австриската престолнина Виена посветени на запирањето на петгодишната војна во оваа блискоисточна земја, рече британскиот амбасадор во Обединетите нации.

Русија, според извештајот на Reuters од средата кој беше демантиран од руското министерство за надворешни работи, наводно изготвила план во осум точки во кои се повикува на процес на уставни реформи во Сирија по што би се одржале избори.

„Запознаени сме со руските предлози. Самиот план во осум точки не е во фокусот на преговорите на Виена, но Русија е“, изјавил за AFP Метју Рикрофт, британскиот амбасадор во ОН.

Другите западни земји го отфрлија рускиот предлог од пред две седмици, бидејќи тој предвидува за политичката иднина на актуелниот сириски претседател Башар ал-Асад да се изјаснат единствено граѓаните на Сирија, додека сунитските арапски земји од регионот, сунитска Турција и нивните западни сојузници, во прв ред САД и Велика Британија, бараат неизоставно алавитот (шиит) Асад да замине од власта.

Еден неименуван дипломат од Советот за безбедност на ОН, за AFP рекол, и покрај тоа што Москва ги негираше медиумските извештаи за наводниот план, дека предлогот дури бил „составен на брзина“.

Претставници на дваесетина земји и меѓународни организации треба да се сретнат во сабота во Виена за да се обидат да договорот политичка транзиција во Сирија и да постигнат примирје меѓу владата на Асад и сунитските вооружени опозициски групи кои западот ги означува како „умерени“ и меѓу кои постои голема поделеност. Првиот круг од виенските разговори за сириската криза се одржи кон крајот на октомври.

Рускиот наводен план под наслов „Пристап во решавањето на сириската криза“ предлагал основање на уставна комисија за политичката транзиција во Сирија, во која треба да влезат опозициските групи „од земјата и странство“. Во текстот кој го презентираше Reuters беше наведено и дека „сирискиот претседател нема да претседава со уставотворната комисија“. Покрај тоа, се наведува дека претседателските и парламентарните избори ќе може да се одржат откако уставот ќе биде прифатен на референдум

Но најголемата пречка за Западот е тоа што во оваа верзија изрично не е му е забрането на претседателот Асад да се кандидира за нов мандат. „Тоа не е доволно“, затоа коментирал за AFP друг анонимен дипломат од Советот за безбедност на ОН.

За никакво руски предлог не било разговарано на седницата на Советот за безбедност во вторникот навечер, која во ОН се одржа зад затворени врати, потврди специјалниот пратеник на ОН за Сирија, Стефан де Миструра кој изрази надеж дека во Виена ќе биде постигнат договор за примирје. Мистура повика да се искористи „зелетот“ кој го даваат преговорите за да се заврши војната во Сирија .

Граѓанската војна во Сирија започна во март 2011 година како обид за државен удар по инерција на ткн Арапска пролет, помогнат од сунитските арапски држави во регионот во прв ред Саудиска Арабија и Катар, Турција. Меѓутоа, поради расцепканоста на вооружената опозиција успехот против владините сили изостана со што се создаде простор за радикалните исламистички групи како Исламска држава и Фронтот на победата (Џебахт ан-Нусра, сириската фракција на Ал Каеда), кои во моментов контролираат речиси 60 отсто од територијата на земјата. Конфликтот кој прерасна во етноконфесионален досега однесе околу 250.000 животи а внатрешно раселени и бегалци се околу седум милиони луѓе./крај/мф/сн

Извор: Макфакс