Делумното повлекување на рускиот воен контингент од Сирија, коешто ненадејно во понеделникот вечерта го објави рускиот претседател Владимир Путин, може да биде позитивен знак за примирјето во оваа земја, оцени во вторникот иранскиот министер за надворешни работ Мохамад Џавад Зариф, а покрај пофалбите на оваа одлука на Москва од сириската вооружена опозиција, реагираа и сириската армија и светските челници.

Шефот на иранската дипломатија, Мохама дЏавад Зариф, по средбата во Камбера со австралиската колешка Џули Бишоп истакна дека Иран заговара примирје и политичко решение во Сирија.

„Фактот дека во Сирија се одржува половично примирје е добредојдена вест, ние тоа го бараме веќе две ипол, три години. Тоа што Русија го најави повлекувањето на дел од своите сили, покажува дека таа не смета дека силата е нужна за одржување на примирјето. Тоа може да се смета за позитивен знак. Мораме да причекаме да видиме што ќе се случи“, изјави Зариф.

Примирјето, според руско-американскиот договор, стапи на сила на 27-ми февруари. Тоа се одржува и покрај повремени нарушувања, па Обединетите нации и другите земји, меѓу кои и Русија, успеаја да достават хуманитарна помош за речиси 250.000 луѓе кои живеат во опколени области.

Рускиот претседател Владимир Путин во понеделникот навечер, ненадејно и изненадувачки за светската јавност, објави повлекување на главнината од руските сили во Сирија, во моментот кога во Женева започнуваат преговорите меѓу владата на сирискиот претседател алавитот (шиит) Башар ал-Асад, кого го поддржуваат Русија и Иран, и вооружената сунитска опозиција која ја поддржуваат Западот и сунитските држави од регионот.

„Пораката којашто меѓународната задница ѝ ја испрати и којашто мора да ѝ ја испрати на Исламската држава и на другите екстремистички организации, е дека нашата борба против нив е непрекината борба. Нема да застанеме и верувам дека меѓународната заедница е единствена по ова прашање“, порача шефот на иранската дипломатија Зариф во текот на посетата на Австралија.

Сириската армија соопшти дека ќе продолжи да се бори со екстремните сунитски групации Исламска држава и Џебхат ан-Нусра, сириското крило на Ал Каеда, „како и со другите терористички групи“, откако Русија најави повлекување на главнината на своите сили. Во соопштението на сириската команда се наведува дека „вооружените сили ќе продолжат да се борат со истата решителност како и претходно, во соработка со пријателите и сојузниците, додека безбедноста и стабилноста повторно не бидат воспоставени на секое делче од државната територија“.

Покрај тоа се додава дека одлуката на Москва за намалувањето на руското воено присуство во Сирија е логичен потег и дека заедно ја донеле највисоките воени функционери на двете земји „по прекинот на борбените операции на некои боишта во Сирија“.

Дамаск ги отфрли шпекулациите за постоење несогласувања со Мосвка, истакнувајќи дека претседателот Асад го договорил намалувањето на руските сили во Сирија во телефонскиот разговор со рускиот челник Путин.

Рускиот претседател Владимир Путин ноќта кон вторникот имал телефонски разговор со американскиот претседател Барак Обама посветен на сириската криза. Како што соопшти Кремљ, Путин го известил Обама дека руските сили ќе започнат да се повлекуваат од Сирија, откако ги извршиле „главните задачи“ во борбата против тероризмот.

Истовремено Белата куќа објави дека Путин и Обама разговарале за кризата во Сирија и за најавеното повлекување на руската војска од оваа земја. Обама го пофалил намалувањето на насилството во Сирија откако на сила стапи договорот за прекин на огнот, но предупредил дека продолжувањето на офанзивата на сириската војска би можело да ги загрози мировните напори.

Американскиот претседател, покрај тоа, истакнал дека е постигнат одреден напредок во давањето хуманитарна помош во Сирија и дека силите на сириската влада мора да овозможат слободно доставување на хуманитарната помош, се додава во соопштението на Белата куќа, во кое не се изнесува исходот од притисокот врз опозицијата која го блокираше доставувањето хуманитарна помош за некои градови со доминантно шиитско население кое го поддржува претседателот Асад./крај/мф/сн

Извор: Макфакс