Свет
Германија ќе ја поддржи Украина во производството на ракети со долг дострел

Германија ќе ја поддржи Украина во производството на ракети со долг дострел, беше соопштено по средбата на германскиот канцелар Фридрих Мерц и украинскиот претседател Володимир Зеленски во Берлин.
„Сакаме да овозможиме оружје со долг дострел. Сакаме да овозможиме и заедничко производство“, рече германскиот канцелар Фридрих Мерц (Христијанско-демократската унија ЦДУ) на заедничката прес-конференција по средбата со украинскиот претседател во Берлин.
Мерц конкретно не ги спомна испораките на германските крстосувачки ракети Таурус, но спомна заедничко производство на соодветно оружје.
„Министрите за одбрана на Германија и Украина, Борис Писториус и Рустем Умеров наскоро ќе потпишат писмо за намери“, рече Мерц.
Нагласи дека станува збор за производство на ракети без ограничување на дострелот, кои Украина ќе може да ги користи против воени цели лоцирани далеку од нејзината територија.
„Во моментов не можеме да откриеме повеќе детали, но можете да тргнете од фактот дека руското отфрлање на примирјето и водење преговори сега ќе имаат последици“, рече Мерц, додавајќи дека тоа е „нова форма на воено-индустриска соработка“.
„Ќе продолжиме да и помагаме на Украина и ќе ја прошириме таа помош“, рече Мерц.
Володимир Зеленски објасни дека станува збор за финансирање на постоечки воени проекти во самата Украина и соработка на ниво на воена индустрија.
Во исто време, украинскиот претседател изјави дека Украина „се уште се надева“ на испорака на крстаречки ракети со долг дострел од типот Таурус.
„Што се однесува до ракетите со долг дострел од Германија и производството на други земји, тие сè уште ни се потребни и секако дека ќе продолжиме да разговараме за ова прашање“, рече Зеленски.
Истовремено, тој нагласи дека Украина сака мир и дека за таа цел украинскиот министер за одбрана разговара со неговиот руски колега.
Германија веќе подолго време разговара за испорака на ракети Таурус во Украина. Поранешниот канцелар Олаф Шолц го одбил од страв да не ја вовлече Германија во војна.
Канцеларот Мерц по средбата со Володимир Зеленски најави и дека германските министри оваа година ќе одржат заеднички консултации со украинската влада.
Мерц рече дека Германија и Украина се зближиле од почетокот на целосната руска инвазија на Украина во 2022 година и дека германските и украинските власти тесно соработуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Црна Гора планира да произведува дронови; САД: Покажуваат дека се сериозни

Црна Гора планира да започне со производство на беспилотни летала во соработка со американска компанија, а првата серија ќе биде донирана на Украина, објавија денес црногорските медиуми, повикувајќи се на „писмо за намери“ усвоено од владата во Подгорица кон крајот на мај.
Во тој документ, како што објави Радио Слободна Европа, црногорската влада наведува дека оваа иницијатива ќе ги подобри капацитетите на војската во однос на НАТО, ќе ги поддржи одбранбените потреби на Украина, како и позицијата на Црна Гора како сигурен снабдувач на најсовремена одбранбена опрема на глобалниот пазар.
Се нагласува дека договорот вреден 15 милиони долари ќе биде поддржан и од американската администрација предводена од претседателот Доналд Трамп. Писмото за намери усвоено од црногорската влада на 29 мај наскоро ќе го потпишат црногорскиот министер за економски развој Ник Ѓељошај и Роберт Џ. Донахју, директор на компанијата „Бај Лајт Профессионал ИТ Сервисиз ДОО“. Тоа ќе биде претходница на договорот што треба да се потпише во септември.
Договорот предвидува користење на компании од Црна Гора и регионот за тестирање на воздушни и подводни технологии на беспилотни системи. Исто така, се наведува дека владата на Црна Гора се согласува да ја донира првата серија беспилотни системи од рано производство и сродна одбранбена опрема на Украина.
Амбасадата на САД објави дека договорот, доколку биде одобрен, ќе промовира заедничка безбедност, стабилност и напредок и дека владата на САД ги охрабрува сите земји-партнери да инвестираат и да соработуваат со американските компании.
„Инвестирањето во одбранбени капацитети, како што се американските беспилотни воздушни системи, ја покажува сериозноста на Црна Гора во исполнувањето на своите обврски кон Алијансата во време кога бараме од Европа да преземе поголем товар за нејзината безбедност“, порачаа тие.
Европа
Естонија се повлекува од Конвенцијата за забрана на противпешадиски мини, стравува од Русија

Парламентот на Естонија денес гласаше за повлекување од Конвенцијата од Отава со која се забранува употребата на противпешадиски мини, поради загриженост за потенцијална воена закана од соседна Русија.
Осумдесет и еден од 101 пратеници го поддржаа предлогот, соопшти прес-службата.
Сите пет земји од Европската Унија и НАТО што граничат со Русија – Литванија, Латвија, Естонија, Полска и Финска – објавија планови за повлекување од меѓународниот договор поради воената закана што ја претставува нивниот многу поголем сосед.
Русија не е членка на Конвенцијата од Отава и користеше мини при инвазијата на Украина. Гласањето на Естонија следеше по гласањето на Латвија и Литванија, чии парламенти веќе го одобрија повлекувањето. Земјите ќе можат да складираат и распоредуваат мини шест месеци откако ќе ги известат другите членки на договорот и Обединетите нации за нивната одлука. Ниту една од петте земји сè уште не го сторила тоа.
Регион
Европската комисија не се откажува од рудникот за литиум во Србија, тој се појави на новата листа

Европската комисија денес објави список од 13 стратешки проекти во областа на критичните суровини во трети земји, вклучувајќи го и проектот Јадар во западна Србија, кој предизвика силни протести и спротивставување во таа земја.
Списокот на стратешки проекти во областа на критичните суровини во трети земји вклучува проекти во Канада, Гренланд, Казахстан, Норвешка, Србија, Украина, Замбија, Нова Каледонија, Мадагаскар, Малави, Јужна Африка и Обединетото Кралство.
Според проценката на Комисијата, избраните проекти, од кои повеќето се однесуваат на суровини неопходни за производство на електрични возила и батерии, како што се литиум, никел, кобалт, манган и графит, бараат вкупно 5,5 милијарди евра капитални инвестиции за да започнат со работа.
На листата е вклучен и проектот Јадар во долината на реката Јадар во западна Србија, кој предизвика широко распространето негодување и отпор поради страв од загрозување на здравјето на луѓето и животната средина.
На почетокот на 2022 година, српската влада го поништи усвоениот просторен план за рудникот во долината на реката Јадар и го запре проектот. Сепак, во јули минатата година, повторно донесе одлука со која му дозволи на британско-австралискиот рударски гигант „Рио Тинто“ да го рестартира својот проект за рударство на литиум.
Избраните стратешки проекти ќе добијат поддршка од Комисијата, земјите-членки и финансиските институции во форма на полесен пристап до финансирање. Комисијата, исто така, ќе ја зајакне соработката со трети земји за да се обезбеди развој на овие проекти, особено преку стратешки партнерства што веќе се воспоставени со некои од земјите.