Европа
Поранешниот премиер на Путин: Преговорите се камуфлажа, тој не е подготвен на отстапки

Тврдењата на Русија дека драстично ќе ги намали воените операции во близина на Киев ги изненади сите на Запад и доведе до прашањето дали тоа е потег што води кон мир или само димна завеса за да може Кремљ да ги организира своите сили.
Поранешниот руски премиер Михаил Касјанов ја коментираше и ситуацијата во Украина, нагласувајќи дека нема индикации дека рускиот претседател Владимир Путин е подготвен на отстапки.
Москва вети дека ќе ги намали операциите околу главниот град на Украина со цел да ја зголеми меѓусебната доверба во преговорите меѓу Русија и Украина, а западните власти сугерираат дека станува збор за купување време.
Михаил Касјанов, кој беше премиер на Русија од 2000 до 2004 година, за време на првиот претседателски мандат на Путин, зборуваше за Sky News за тоа што би можеле да значат мировните преговори.
„Мислам дека нема никакви индикации дека Путин е подготвен да направи какви било отстапки. Тој сака да има наместени преговори со Украина само за да му покаже на целиот свет дека сака мир, но мислам дека тоа е само некаква камуфлажа “, рече тој.
Во интервју за британскиот медиум ЛБЦ, тој рече дека „Путин треба да се плаши“, а притоа изнесе аргументи за воведување зона на забранети летови над Украина од страна на НАТО.
„Да имаше такви мерки, тој ќе беше шокиран“, додаде тој.
Касјанов истакна дека Путин веќе е изненаден од одговорот на Западот на војната во Украина.
„Тој мислеше дека ова ќе биде исто како анексијата на Крим“, рече тој.
Тој повтори дека целата ситуација сè повеќе го лути Путин, бидејќи неговите операции не одат како што би сакале.
На прашањето дали Путин ќе се соочи со гневот на рускиот народ поради бруталната инвазија на Украина, Касјанов рече: „Не за краток временски период, туку на долг рок“.
„Тие ќе ги видат вистинските причини и вистинските извори на проблемите што ги имаат. Ќе бидат потребни децении да се плати за она што Путин ѝ го направи на оваа земја“, рече тој.
На крајот тој додаде дека сè додека „Украина продолжува да се брани и да победува во оваа војна, тоа значи дека дојде почетокот на крајот на ерата на Путин“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Колона долга околу 700 километри забележана на автопат во Франција

Колона долга речиси 700 километри е забележана денеска на автопат во Франција, додека вкупната должина на сите колони на патиштата во земјата изнесуваше 1.051,6 километри во време на зголемен сообраќаен интензитет поради летните одмори и смената на туристи, што колоквијално се нарекува „Црна сабота“.
Како што извести BFM TV, сообраќајот на патиштата во Франција дополнително бил забавен поради две сообраќајни несреќи на автопатот кон Медитеранот и Атлантскиот Океан.
Според податоците на Bizon Futé, француската агенција за следење на состојбата на патиштата, до 7 часот утрово колоните биле подолги од 200 километри, а до 10 часот веќе надминале 570 километри.
Како што беше соопштено, гужвите се во согласност со прогнозите на агенцијата, која предупреди на „исклучително тешки сообраќајни услови“ за оваа сабота, а врвот на метежот се очекува околу пладне.
Сообраќајот во правец кон Алпите исто така е интензивен и загушен, со задржувања од час и 45 минути во тунелот Мон Блан во правец кон Италија
Европа
Финска, Норвешка и Шведска под жештина невидена од 1961 година

Земјите од Северна Европа, познати по својата студена клима, се соочуваат со интензивни топлотни бранови, со температури над 30 степени Целзиусови во подолг временски период.
Во норвешкиот дел од Арктичкиот круг, метеоролошките станици регистрирале температури над 30 степени Целзиусови дури 13 дена во јули, додека Финска имала три последователни недели со температури од 30 степени, пишува денес британскиот „Гардијан“.
Според научниците, тоа е најдолгиот период според историските податоци од 1961 година, а трае 50 проценти подолго од претходниот рекорд.
„Топлотниот бран е сè уште во полн ек, со максимални температури денес околу 32-33 степени. Дури и арктичките региони забележаа три недели со температури над 25 степени и може да ги соборат своите августовски температурни рекорди утре“, изјави Мика Рантанен, климатолог во Финскиот метеоролошки институт, во објава на социјалните мрежи.
Норвешкиот метеоролошки институт соопшти дека температури над 30 степени се регистрирани 12 дена во јули во најмалку една станица во трите најсеверни покраини на Норвешка.
Во Шведска, метеоролозите, исто така, регистрираа продолжени топлотни бранови во неколку северни градови, при што метеоролошката станица во Хапаранда регистрираше температури од 25 степени или повеќе 14 дена по ред.
Овие топлотни бранови, кои ја погодија северна Европа кон средината на јули, беа предизвикани од топлите води покрај северниот брег на Норвешка, кои ги покачија температурите во нордиските земји за осум до 10 степени над сезонските норми.
Поради интензивен топлотен бран, лизгалиште на мраз во северна Финска ги отвори вратите за луѓе кои бараат засолниште од жештината, откако локалните болници беа преполни, а сточарите предупредија дека нивните ирваси се на работ на смртта од жештината.
Европа
Зеленски: Подготвени сме да купиме 10 системи „Патриот“, само треба да најдеме средства

Украина работи на обезбедување испорака на десет системи за воздушна одбрана „Патриот“, а исто така е важно системите веднаш да пристигнат со ракетите, изјави украинскиот претседател Володимир Зеленски, како што објави УНН.
„Имаме барање за десет системи. Ова го кажав јавно. Моментно работиме со партнери за да ги обезбедиме овие десет. Исто така, работиме на прашањето за ракетите, ги имаме“, рече Зеленски.
Украинскиот претседател додаде и дека САД ќе ѝ продадат системи „Патриот“ на Украина. Украина мора да најде средства за сите десет системи.
„Трамп, претседателот на САД, ќе ни ги пренесе системите, ќе ни ги продаде. Наша задача е да најдеме пари за сите десет системи. Би сакале веднаш да имаме пакет ракети за секој систем“, истакна претседателот.
Тој исто така истакна дека Германија моментно ја потврдила испораката на два система „Патриот“, а Норвешка – еден.
„Официјално добив потврда од Германија за два система, од Норвешка – еден. Сега работиме со холандски партнери“, додаде Зеленски.
Фото: принтскрин