Свет
СЗО: Лажните вести може да ја загрозат вакцинацијата против Ковид-19
Уште во февруари, кога пандемијата на коронавирус брзо се рашири, Светската здравствена организација (СЗО) предупреди за поплава од дезинформации и лажни вести на социјалните мрежи, поврзани со новото респираторно заболување.
„Коронавирусот е прва пандемија во историјата за време на која технологијата и социјалните медиуми се широко користени за да ги одржуваат луѓето безбедни, информирани, продуктивни и поврзани. Во исто време, технологијата на која се потпираме, овозможува ‘инфодемија’ што продолжува да го поткопува глобалниот одговор и ги загрозува мерките за контрола на пандемијата“, истакна СЗО.
Повеќе од 1,45 милиони луѓе починаа од почетокот на пандемијата, а три производители на вакцини од Западот веќе поднесоа барање вакцината да биде одобрена за употреба уште во декември.
Покрај проблемите со организирање на процесот за масовна вакцинација, владите мора да се справат и со сомнежите за вакцинaта развиена со брзо темпо, во време кога социјалните медиуми се алатка и за информирање и за ширење на дезинформации за вирусот.
Стивен Вилсон, професор на Универзитетот Брандејс и коавтор на студијата „Социјални медиуми и двоумење за вакцинација“, објавена минатиот месец во магазинот British Medical Journal, гледа врска помеѓу кампањата за дезинформации на интернет и падот на бројот на вакцинации.
„Мојот страв во врска со влијанието на дезинформациите на социјалните медиуми во контекст на Ковид-19 е дека ќе се зголеми бројот на оние кои се двоумат дали да се вакцинираат, дури и во случаи кога нивните стравови немаат научна основа“, смета тој.
Меѓу побизарните тврдења на теоретичарите на заговор, на пример, е дека новиот коронавирус е измама или дел од голема шема смислена од луѓе како милијардерот Бил Гејтс за контрола на човештвото. Програмите за вакцинација, според поддржувачите на ваквите теории, се покритие за вградување на микро-чипови за следење на луѓето.
Ваквите тврдења можат да најдат плодна почва во време кога истражувањата покажуваат дека луѓето во некои земји како Шведска или Франција веќе се сомневаат во врска со вакцините, бидејќи тие се развиени за многу кратко време и без повеќегодишни студии за ефикасноста и можните несакани ефекти.
Минатиот месец, анкета на „Ипсос“ покажа дека само 54 проценти од Французите би се вакцинирале против коронавирус, десет проценти помалку отколку во САД, 22 проценти помалку отколку во Канада и 33 проценти помалку отколку во Индија. Во 15 земји, 73 проценти од луѓето сега велат дека се подготвени да се вакцинираат против вирусот, што е четири проценти помалку отколку во претходната анкета во август.
Но, не станува збор само за вакцините – проблем е и што сè повеќе луѓе не им веруваат на институциите, велат експертите.
„Заедничката мисла меѓу теоретичарите на заговор е дека елитите лажат“, велат познавачи на темата.
Дезинформациите се засноваат на растечката недоверба кон институционалните власти, без разлика дали се работи за влада или наука.
„Кога луѓето едноставно не можат да добијат веродостојни информации за вакцините и кога не им веруваат многу на експертите и институциите, се насобраа дезинформации за да се пополни создадениот вакуум“, се наведува во извештајот во врска со оваа проблематика.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Белгија издвојува девет милиони евра за украинската енергетска инфраструктура
Белгија ќе додели дополнителна помош од девет милиони евра за да придонесе за поправка на оштетената енергетска инфраструктура во Украина, најави белгиската министерка за развојна соработка, Каролин Генез.
„Преку ОН, Белгија ќе придонесе за поправка на енергетската инфраструктура околу градот Харков, кој сега секојдневно трпи бомбардирање од руската армија. Со воена поддршка, овие средства ќе помогнат да се изгради отпорноста на Украина“, рече министерот, пренесува RTBF.
Според неа, Белгија ќе одвои средства за поддршка на проекти во рамките на Програмата за развој на Обединетите нации, која е специјализирана за економски развој.
Свет
Генералното собрание на ОН го повика Советот за безбедност да ја прими Палестина за членка
Генералното собрание на Обединетите нации ги зајакна правата на Палестина во рамките на организацијата и повика таа да биде прифатена како членка, пренесува Би-Би-Си.
Палестина има статус на земја-набљудувач не-членка од 2012 година, што дозволува некои права помалку од полноправна членка.
За членството може да одлучува само Советот за безбедност на ОН.
САД неодамна ставија вето на кандидатурата за полноправно членство, но гласањето денска може да се смета како гест на поддршка за Палестинците.
Палестинскиот претседател Махмуд Абас ја поздрави резолуцијата, велејќи дека таа ги поддржува палестинските напори за уште едно гласање за ова прашање од страна на Советот за безбедност.
Свет
Шпанија, Ирска и Словенија ќе ја признаат Палестина на 21 мај
Шпанија, Ирска и Словенија планираат симболично да ја признаат Палестинската држава на 21 мај, изјави шефот за надворешна политика на ЕУ, Жозеп Борел.
Тој го потврди датумот во интервју за шпанското јавно радио, откако ирскиот јавен радиодифузен сервис РТЕ објави дека тоа е моментот кога сите три земји планирале да дејствуваат.
Словенечката влада вчера соопшти дека донела декрет за признавање на палестинска држава, што ќе биде внесен во нејзиниот парламент до средината на јуни.
Потоа, најверојатно ќе има повеќе нации што ќе го следат примерот бидејќи и Белгија одлучи да го стори тоа, додаде Борел.