Реликвија од злато и кристали, во која се чуваат капки крв од светиот папа Јован Павле Втори, била украдена од катедралата во градот Сполето, во централниот дел на Италија, пренесува „Ројтерс“.

Реликвијата била украдена во средата од олтарот посветен на полскиот папа, кој почина во 2005 година, по 27 години понтификат.

Предметот бил привремено изложен во катедралата во Сполето. Следниот месец требало да биде префрлен во нова црква во регионот Умбрија, именувана по покојниот папа.

Надбискупот Ренато Бокардо, долгогодишен близок соработник на папата во Ватикан, повика предметот да биде вратен на катедралата и верниците.

Тој рече дека сè уште не е познато дали реликвијата била украдена за откуп, како што во минатото се случувало со други вакви предмети во Италија.

Во тек е полициска истрага за случајот.

Американскиот сенатор Берни Сандерс, поранешен кандидат за претседател од Демократската партија, денеска во Вашингтон изјави дека на претстојните избори ќе се одлучува меѓу Доналд Трамп и демократијата во земјата, при што нагласи дека демократијата мора да победи.

Како што пренесува „Ројтерс“, Сандерс смета дека Трамп е подготвен да ја поткопа американската демократија, само за да остане на власт и повика на формирање независна комисија за следење на претседателските избори закажани за 3 ноември.

Вчера, одговарајќи на новинарско прашање, Трамп одби да се обврзе на мирен трансфер на власта и рече дека очекува оти за неговата битка со демократскиот кандидат Џо Бајден ќе одлучува Врховниот суд.

Сепак, неговата администрација во Белата куќа денеска се обиде да ги смири страстите по оваа изјава соопштувајќи дека американскиот претседател ќе ги прифати изборните резултати.

„Претседателот ќе ги прифати резултатите од слободните и фер избори“, рече портпаролката на Белата куќа, Кејли Мекени, на прес-конференција одговарајќи на новинарски прашања.

Ресиси милион евра открила полицијата во автомобил што се поврзува со Драган Ковачевиќ, неодамна уапсениот шеф на компанијата „Јадрански нафтовод“ („Јанаф“).

Загрепската ТВ „Н1“, која се повикува на неофицијални информации потврдени од повеќе извори, наведува дека милион евра биле пронајдени во автомобил што се поврзува директно со Драган Ковачевиќ, а бил паркиран во Самобор.

Автомобилот бил паркиран на адреса на еден од познајниците на неодамна уапсениот директор на „Јанаф“.

„Н1“ неофицијално дознава дека се верува оти оваа сума е токму делот од митото што го примил Ковачевиќ, но ниту полицијата ниту Канцеларијата за сузбивање на корупција и криминал (УСКОК) не сакала да ја потврдат оваа информација.

Според неофицијални информации од претходно, Ковачевиќ ден порано дознал дека ќе биде уапсен, па се обидел да ги прикрие доказите.

„Јутарњи лист“ пренесува дека Ковачевиќ го замолил својот познајник Деан Шпаравац, еден од директорите на компанијата „Алфа стан“, да му дозволи да го паркира својот автомобил во гаражата на неговата вила во Самобор.

Во тој автомобил наводно и била пронајдена големата сума пари во разни валути, во вкупен износ од речиси еден милион евра, како и документацијата што Ковачевиќ сакал да ја скрие.

Шефот на „Јадрански нафтовод“, Драган Ковачевиќ, неодамна беше уапсен заедно со уште десет лица под сомнение дека бил дел од корупциски скандал што ја тресеше Хрватска последниве денови.