Поранешната прва дама на САД, Мишел Обама изјави дека е во почетна фаза на депресија поради пандемијата на коронавирус, расната нееднаквост, но и поради, како што изјави, лицемерието на администрацијата на американскиот претседател Доналд Трамп.

Во втората епизода од својот поткаст, таа изјави дека во моментот има проблеми со спиењето и одржувањето на секојдневната рутина, пренесува британски „Гардијан“.

„Знам дека се борам со некаква форма на блага депресија“, рече Мишел Обама.

Сопругата на поранешниот претседател Барак Обама го кажа тоа во поткаст објавен на „Спотифај“.

„Се будам среде ноќ затоа што сум загрижена или затоа што чувствувам притисок“, вели таа.

Мишел, која сега има 56 години, вели дека поминува низ емоционални подеми и падови што секој ги чувствува и дека тоа се моменти во кои не се препознаваме.

„Ова не е време во кое напредуваме духовно“, додава таа. „Свесна сум дека минувам низ некаква блага депресија“.

„Не само поради карантинот, туку и поради расните немири. И деморализирачки е од ден на ден да се гледа хипокризијата на оваа администрација“.

САД беа сцена на невидени антирасистички протести во последните месеци предизвикани од смртта на црнецот Џорџ Флојд, кој почина откако беше задушен од бел полицаец во мај.

Кинески државјанин осуден за убиство на две деца, по 27 години поминати во затвор бил ослободен откако судот го прогласил дека не е виновен. Си-ен-ен јавува дека тоа е најдолгата отслужена казна во Кина на осуденик кој подоцна е прогласен за невин.

Жанг Јухуан (53) бил ослободен во вторникот откако Врховниот суд во провинцијата Јиангши го прогласил за невин поради недостиг на доволно докази, објави кинескиот државен весник „Глобал тајмс“.

Ослободителната пресуда уследила по долготрајната правна битка на семејството на Жанг во која биле потенцирани проблемите и недостатоците на правниот систем на Кина.

Жанг бил осуден за убиство на две момчиња во 1993 година, кои биле негови соседи.

„Откако ги разгледавме материјалите, откривме дека нема директни докази што можат да ја докажат пресудата. Затоа го прогласивме Жанг за невин“, изјавил судијата Тјан Ганлин.

Жанг сега може да бара надомест од државата.

Во изминатите неколку години, адвокатите за човекови права го критикуваат правниот систем на Кина, тврдејќи дека дозволува неправедно судење, тортура и друго малтретирање во притвор.

Кина направи обиди да го реформира својот правен систем. Според извештајот на „Глобал тајмс“, Кина официјално го усвои правниот принцип на „секој е невин додека не се докаже дека е виновен“ во 1996 година.

Мелбурн, вториот по големина град во Австралија, од денеска е под целосен карантин, кој ќе трае шест недели бидејќи властите се борат против вториот бран на коронавирусот.

За време на карантинот, повеќето продавници и компании ќе бидат затворени, што предизвика загриженост на жителите поради недостаток на храна, пренесува „Ројтерс“.

Улиците во главниот град на сојузната држава Викторија, се празни. Во градот со пет милиони жители, има пријавено 471 случаи на коронавирус и осум смртни случаи во последните 24 часа.

Австралија сега има вкупно околу 20.000 случаи на Ковид-19 и 255 починати, што, сепак, е сè уште помалку од многу други развиени земји.

Сепак, пандемијата во Викторија се заканува дека ќе се прошири во другите сојузни држави. Нов Јужен Велс објави 12 нови случаи на коронавирус, со што вкупниот број на заразени лица се зголеми на 483. Случаи на коронавирус не се пријавени во други држави и територии.

„Ја спуштивме кривата еднаш и ќе го сториме тоа повторно“, им рече министерот за здравство Грег Хант на новинарите.

Премиерот на Викторија, Даниел Ендрјус, ги повика граѓаните на Мелбурн, кои веќе минале низ неколку недели строги рестриктивни мерки, да останат смирени поради зголемувањето на побарувачката во супермаркетите.