Министерката за образование и наука Мила Царовска учествуваше на министерскиот состанок на Платформата за образование и обука, истражување и иновации на земјите од Западен Балкан, во организација на Европската комисија и германското претседателство со Советот на ЕУ, оваа година во виртуелен формат.

Во онлајн обраќањето, Царовска рече дека оваа иницијатива што сега станува реалност, овозможува регионот на Западен Балкан да стане дел од долгорочната стратегија на Европската комисија со што повеќето од предложените мерки и активности ќе бидат проследени со зголемени инвестиции и посилна поддршка од земјите-членки на ЕУ.

Нагласувајќи дека националните приоритети во областа на образованието и обуките се во согласност со приоритетите на Платформата, како што се Зелениот договор, дигитализацијата, создавањето работни места и инклузивноста, Царовска посочи дека главен фокус во следниот период ќе биде подобрувањето на квалитетот на образованието и поддршка да одговори на потребите на пазарот на труд, како и зајакнување на средното стручно образование. Исто така, ќе се вложува во обуки и кариерен развој на наставниците, во прилагодување и иновирање на системот на обука на наставниците, подобрување на наставните програми и инвестирање во регионалните центри за стручно образование и обука за млади лица како и за преквалификација и доквалификација на возрасни.

„ Создавањето нови работни места и зголемување на можностите за вработување останува предизвик заради пандемијата, која за жал е широко распространета во нашата земја и во регионот. Затоа, процесот на континуирани реформи во средното образование, фокусиран на средното стручното образование, ќе продолжи и од голема важност е дополнителното финансирање во овој сектор. Трите регионални центри за стручно образование и обука ќе бидат отворени на почетокот на 2021 година“, рече министерката Царовска.

Подобрувањата во дигитализацијата на образованието и воспоставувањето соработка преку новиот акционен план за дигитално образование (ДЕАП) со балканскиот регион за периодот од 2021 до 2027 година, министерката Царовска ги најави како следни активности. Таа го искажа интересот за учество во новиот програмски циклус на Еразмус програмата и Европскиот корпус најавувајќи активно учество во процесот на развој на заеднички стандарди и процедури за признавање на академските квалификации и студии во странство.

Платформата за образование и обука, истражување и иновации на земјите од Западен Балкан ја стимулира, следи и поддржува соработката во истражувањето, образованието и иновациите меѓу земјите членки на Унијата, од Западен Балкан и други придружни земји на Хоризонт 2020. Годишните министерски состаноци овозможуваат идентификување на заедничките приоритети, споделување информации за најновите политики и мерки во делот на реформите како и одлучување по теми за регионална соработка со помош на ЕУ.

Опозициската ВМРО-ДПМНЕ предлага амандман за изградба и уредување на кејот во Охрид.

Кирил Пецаков, пратеник на Пратеничката група на ВМРО-ДПМНЕ изјави дека СДСМ нема концепт за развој на туризмот и развојот на Охрид и унапредување на заштитата на Охридското езеро, а тоа се гледа и од Предлог буџетот за 2021. Според него, СДСМ на чело со премиерот Зоран Заев со ништо не ги помага нуту туристичките работници, кои беа најмногу погодени од Ковид-19 пандемијата.

ВМРО-ДПМНЕ преку амандмани на буџетот за 2021 година предлага низа мерки за кои смета дека се потребни за Охрид и охридско, но и за туризмот. Во таа насока предложена е изградба/уредување на градскиот Кеј во Охрид; Отворање на дневни центри за деца и лица со пречки во развојот во Охрид; Креирање на специјалистички едногодишни студии за работа во култура за туристички цели: археологија, етнологија, историја на уметност, историја, реторика, етика и сл. На тој начин, вели Пецаков, би се вратил интересот за овие научни гранки, а туризмот би се збогатил со луѓе кои се компетентни во овие научни теми.

Понатаму, предложена е набавка на специјален пловен објект за превенција и интервенирање при итни ситуации во медицинска, противпожарна, спасувачка цел по охридското крабрежје; Развој на мобилна апликација Brаnd Macedonia, поддршка на патувања низ Македонија. Изработка на информациски систем е-визиторс и дигитализација на царинската управа. Субвенционирање на угостителски капацитети кои би добиле статус зелени хотели/зелени ѕвездички; Евидентирање и промоција на еколошки зони (еко – туризам); Евидентирање и промоција на верски објекти; Изградба на патно поврзување на селото Куратица со Општина Дебарца; Формирање на посебен развоен фонд за туризмот и угостителството; Изградба на катна гаража во Охрид; Реконструкција со надградба и доградба на објектот на НУ Центар за култура Григор Прличев, со цел обезбедување на нов објект наменет за Македонски народен театар; Изградба на велосипедска патека Охрид-Свети Стефан; Изградба на откупно-дистрибутивен центар за земјоделски производи во Охрид; Изградба на станови за млади кадри во планските региони (со посебен акцент на инженери) за потребите на извозно ориентираните компании; Формирање на централно тело за јавни набавки; Формирање на посебна Туристичка инспекција или полиција.

Пецаков ги повикува пратениците од владеачкото мнозинство да ги поддржат нивните амандмани и да покажат дека искрено работат и се грижат за потребите на граѓаните. Во спротивно, вели тој, власта ќе докаже дека воопшто не ги интересираат потребите на граѓаните туку само нивните теснопартиски интереси и бизниси.

Во изминатите 24 часа во ковид – центрите во Скопје се хоспитализирани 30 нови пациенти поради компликации од коронавирусот. Вкупно 452 лица сомнителни и потврдени за Ковид -19 се лекуваат на инфективните оддели во главниот град, а голем дел од нив се на кислородна поддршка, соопшти Министерството за здравство.

Во последното деноноќие, на интерните клиники имало вкупно 13 приеми, во ковид – центарот во ГОБ „8 Септември“ имало 10 нови приеми на пациенти, а седум болни биле примени на Инфективната клиника.

Во изминатите 24 часа дома се пуштени 32 оздравени пациенти.

Во моментов на Кожната клиника во ковид центарот се лекуваат 26 пациенти, на Клиниката за неврологија 33 болни, а на Институтот за ТБЦ се примени вкупно 38 пациенти со симтоми на корона вирусот, во ковид центарот на Клиниката за нефрологија во моментов се сместени 26 пациенти, а на Клиниката за очни болести 17 пациенти. Во ковид центарот на Клиниката за уво, нос и грло има 27 пациенти.

Во ГОБ „8 Септември“ има вкупно 107 болни, на Клиниката за инфективни болести лежат 150 пациенти, додека во Иститутот за белодробни заболувања кај деца Козле има 28 пациенти, од кои 7 деца и 21 возрасен.

„И покрај големиот број на приеми во текот на вчерашниот ден, утрово до 8 часот имало 40 тина слободни места, а се очекува во тек на денот по направените исписи на оздравените пациенти да се ослободат и дополнителни места и на Клиниката за инфективни болести и во ГОБ ‘8 Септември’“, соопшти МЗ.

Од таму велат дека сите инфективни одделенија имаат довод на кислород и можат да згрижат пациенти кои имат потреба од кислородна поддршка.