Со гнев, тага и болка почна судењето за трагедијата во кочанската дискотека „Пулс“, каде животите ги загубија 63 млади луѓе.

Мајките кои ги изгубија своите деца зборуваа пред судот за болката што не минува, за неправдата што ја чувствуваат и за срамот што, како што велат, го носат адвокатите кои ги бранат обвинетите.

„Со тоа што ги бранат обвинетите, повторно ги убија нашите деца“

Светлана Стојанова, мајка на Андреј Стојанов,  рече: „Голем срам за адвокатите кои ги бранат обвинетите. Немаат чувства во оваа трагедија каде ни ги убија децата. Дали имаат они деца, и дали така би постапиле на наше место? Не посакувам на никој да е на наше место, да ја почувствува оваа болка со непроспиени ноќи и денови. Ги чекаме нашите деца секој момент да се појават и да кажат ‘Каде си ма мајче’? Со тоа што ги бранат обвинетите, повторно ги убија нашите деца, а со тоа не убиваат и нас. Во име на парата и корупцијата, згаснаа млади животи.“

Таа додава дека сите деца кои загинале биле воспитани, талентирани, културни, деца кои никогаш не би направиле зло.

„Отидоа на концерт да се забавуваат, не отидоа да ги убијат. Сите сме од скромни семејства со минимални плати, и успеавме да ги школуваме, сите талентирани. Мојот син беше и крводарител, програмер, задоволен од животот кога застана на свои нозе. Среќен што успеа. Нека го слушнат крикот на мајките и нека се замислат што прават и како ќе ги бранат обвинетите.“

„Мојот син дојде од Скопје за концертот, а јас бев во Турција, не го видов за последен пат“

Својата болка ја сподели и мајката на Андреј Лазаров, млад фудбалер кој дошол од Скопје само за да присуствува на концертот.

„Мојот син дојде од Скопје само да присуствува на концертот, беше фудбалер, Андреј Лазаров. Си дојде во 9.30 вечерта, јас бев во Турција на екскурзија и не можев ни да го видам, толку беше. Дошол, а јас не го видов“, рече таа.

Мајката зборуваше за сите семејства кои ја носат истата болка.

„Сите семејства на децата што загинаа, како нашите, сите се со истата болка. Преубави деца, талентирани деца. Нека се чукнат тие во глава што беа седнати на тие столчиња и ги бранеа обвинетите, нека се замислат дали имаат деца. Со кои пари ќе се вратат дома? Унаказени сме за цел живот“, рече таа.

Додека судењето влегува во првата фаза од постапката, семејствата велат дека за нив секој ден е нов суд, нова битка и нова надеж дека правдата ќе ја најде вистинската тежина. За нив, ова не е само процес, туку барање за одговорност и човечка реакција во трагедијата која ги скрши нивните животи.

По повеќе од четири часа евиденција на сите присутни, попладнево почна судењето за пожарот во кочанската дискотека „Пулс“ со 63 жртви и над 200 повредени.

Обвинителството, кое го претставуваа 15-мина обвинители, на денешното рочиште го даде воведниот збор.

Буре барут, безбедносна смртоносна стапица, колективно непостапување и неодговорност, не само кобната ноќ туку од 2012 година наваму, беа зборовите што провејуваа во воведот. Обвинителот Борче Јанев рече дека доказите говорат за измината деценија без контрола, без надзор и без постапување од сите надлежни институции. Тој рече дека се вратиле до 2012 година, која за него вели дека е нулта точка и од таму почнува непостапувањето.

Потсети дека во 2012 година Дејан Јованов, сопственикот на магацинот за текстил, решил да го претвори во дискотека и направил прокет и првпат побарал лиценца, но овој прв обид бил и единствениот што бил одбиен од инстутициите. Јованов не ја добил лиценцата, но како што рече обвинителот, не седел со скрстени раце, туку за две недели повторно побарал лиценца и ја добил.

„Пропустите кај овој човек се шокантни. Со докази ќе покажеме што сѐ бил спремен да направи за профит“, рече обвинителот Јанев.

Но овој човек успешно вегетирал и опстојувал со години, како низ слалом ги нижел, заобиколувал и ги отстранувал сите институционални препреки и безбедносни правила.

Сѐ што посакал, тоа и го добивал, таму каде што знаел дека не може да пробие и да го изигра законот, не се ни обраќал, немало потреба, сите документи што морал да ги има не ги обезбедувал затоа што никој не му ги барал.

Таму каде што требало да добие заштита и да ги прикрие криминалните потфати, тоа и го имал – консултанти, шпиони, логистичари.

Во најтесна закрила до него ги подредил неговиот кум, брат му, па дури и сопственото дете, сите впрегнати да работат и да кршат закони по негова замисла. И никој никогаш на овој човек не му застанал на патот. Последиците одамна имале опасен и хаотичен, но целосно предвидлив тек.
Во овој настан согледан во целиот обем уште во почетоците на неговото истражување беше и повеќе од јасно дека должноста молчела поради што последицата станала само прашање на време.

Во овој контекст, преку нормативна анализа се утврди дека во делот на должноста за постапување во однос на безбедносните правила и прописи секој од свој аспект на дејствување, директно биле повикани: локалната самоуправа, односно Општина Кочани, Дирекцијата за заштита и спасување, Министерството за внатрешни работи, Државниот и пазарен инспекторат, Министерството за економија, рече тој.

Оцени дека заедништвото во соизвршителските дејства не мора да настапи истовремено и договорно, не мора ниту меѓу себе сторителите да се познаваат. Според него, во овој случај не затаиле само обвинетите, кои биле на должност во време на настанување на последицата.

Станува збор, како што појасни Јанев, за сукцесивно надоврзувани пропусти преку кои се огледа супстратот на заедништвото.

„Битен е обемот на пропустите и дали тој има релевантен контекст и континуитет во непостапувањето. Ова обвинение е одраз на она што навистина се случувало. Безбедноста нема мандатна природа и истекување на важноста. Секој од овие обвинети е повикан на одговорност поради недејствување во моментот кога имал правна должност тоа да го стори. Секој поинаков заклучок лесно запаѓа во невиден апсурд и во правен ќор-сокак. Затоа ќе докажеме дека се апсолутно безмислени тезите дека овде на одгорност треба да биде повикан само оној во чие време се случила последицата. Немаме ниту морално ниту законско право одговорноста да ја бараме и да ја насочиме само кон тој во чие време се случила последицата. Тоа би значело дека треба да прифатиме дека обвинетите одговорни и службени лица, кои не биле на должност во времето на настапување на последицата, само поради тоа немаат вина. Иако се работи за исти повторувачки пропусти, меѓусебно надоврзувани во континуитет, и доказите тоа јасно го покажуваат“.

Како што истакна, „ако објектот ги исполнувал стандардите, ако вратите биле доволни и проодни, ако плафонот и ѕидовите не биле обложени со отров што убива побргу од пламен, ако имало функционална вентилација, ако постоеше противпожарен систем, ако имаше навремена контрола, надзор и санкција, пожарот сам за себе ќе се запаметеше како опасен инцидент, но не и како масовна гробница. Затоа денес бараме одговорност по име и презиме, бараме правда. На Дејан Јованов и на сите други обвинети одговорни лица за работењето на клубот „Пулс“ опасносите што постоеле им биле добро познати“, додаде обвинителот.

Тврдиме, како што рече, дека отсекогаш дискотеката „Пулс“ работела спротивно на секој стандард, на секој правилник, на секој закон и на секоја здраворазумна логика и принцип на одговорност.

Дигиталната судница во КПУ „Идризово“ беше преполна, покрај 35 обвинети физички и три правни лица и нивните бранители и медиумите, првото судење го следеа и некои од роднините на починатите.

Со длабоки и болни воздишки искажаа незадоволство кога бранителите на почетокот на судењето побараа одложување оти Обвинителството достави интегрирано обвиниение и нова ажурирана листа на докази откога судот ги спои постапките за пожарот и за сопственикот на агенцијата за обезбедување „Рубикон“.

Обвинителот Јанев рече дека обвиненијата се исти, а достави и нова листа на докази, од која се исфрлени вербалните докази што се повторуваат. Бранителите на обвинетите тоа го искористија за веднаш на почетокот на судењето да побараат одлагање, но судијката Диана Груевска-Илиевска го прифати предлогот на Обвинителството.

Роднините и родителите на загинатите по завршување на судењето со аплауз го поздравија воведниот дел од Обвинителството и повеќепати повторија со кои аргументи бранителите ќе ги бранат обвинетите.

Пожарникарите спасија лица заглавени во автомобил по излевањето на Пчиња кај бањата „Стрновац“ во општина Старо Нагоричане.

„На 19.11.2025 година, во 7.35 часот, по повик од 112 дека има заглавени две лица до бањата во с. Стрновац, општина Старо Нагоричане, поради излевање на реката Пчиња, ТППЕ Старо Нагоричане интервенира со едно возило и двајца пожарникари“, објави Територијалната противпожарна единица.

Од таму апелираат граѓаните на општина Старо Нагоричане да избегнуваат движења и секакви активности по течението на реката Пчиња во општина Старо Нагоричане, а доколку се здогледа лице во опасност поради временските услови, да се јават на телефонските броеви: 031 495 666 или на 112 и на 193.

ЦУК – Куманово, пак, извести дека е добиена информација оти на подрачјето на село Пелинце, во близина на Меморијалниот центар АСНОМ, како и на локацијата кај бањата „Стрновац“, реката Пчиња се има излеано од своето речно корито за 20-ина сантиметри.

Во моментот излевањето не зафаќа куќи или викендици.

Дополнително, кај Коински мост е забележано насобирање поголема количина дрвја, што го отежнува нормалниот проток на реката Пчиња. За состојбата е навремено известено „Водостопанство“ – Куманово, кое ќе постапи во согласност со своите надлежности.