Министерот за земјоделство, шумарство и водостопанство, Цветан Трипуновски, преку објава на „Фејсбук“ остро му возврати на пратеникот и поранешен министер за земјоделство, Љупчо Николовски, кој претходно го критикува за суспензијата на ИПАРД-програмата, со што, како што тврди, загрозени се 130 милиони евра европски средства.

Трипуновски обвини дека Николовски умот го користи исклучиво за криминал и ширење страв кај земјоделците. Според него, политичката кариера на Николовски е завршена, а неговите јавни реакции се обид да остане во фокусот.

Министерот оцени дека Николовски треба да го повика Основното јавно обвинителство да го истражи неговото работење во времето кога бил министер. Тој повтори дека нема простор за загриженост за ИПАРД нагласувајќи дека Брисел ја поздравил брзата реакција на Владата за истражување на случувањата во Агенцијата за финансиска поддршка во земјоделството и руралниот развој.

„Сега има закон, правила и прописи што мора да се почитуваат. Секој што згрешил пред законот ќе одговара“, напиша Трипуновски и додаде: „Љупчо, ти текнува ли кога беше антикорупционер и врвно достигнување ти беше броењето испиени чаши вода на министрите, а тоневте во криминал цела влада? Е па сега за разлика од претходно, се апси, нема повеќе наш и ваш. Принципот по кој владееше ти и владата на СДС како до сега заврши“.

Неговите коментари следуваат по критиките на Љупчо Николовски, кој реагира на телевизиското интервју на министерот. Николовски тврдеше дека Трипуновски признал оти ИПАРД-програмата е суспендирана, но не понудил одговорност или план за решавање на ситуацијата.

Тој предупреди дека се загрозени 130 милиони евра европски средства, што требало да донесат над 3.000 нови бизниси и 10.000 работни места. Според Николовски, станува збор за пари на млади земјоделци и семејства што вложиле сопствени средства и доверба во програмата.

Николовски го обвини министерот дека ги омаловажил претходните програми што, како што наведе, создале над 4.000 нови мали производители. Тој рече дека понудил конкретни и одговорни решенија, но Трипуновски ги одбил.

„Мојата борба е за земјоделците што денес се чувствуваат изневерено“, напиша, меѓу другото, Николовски, кој бара оставка од Трипуновски.

Обвинителството претходно соопшти дека се приведени пет лица поради сомнение за злоупотреба во постапката за користење средства од ИПАРД-програмата. Според соопштението, првоосомничениот, управител на правно лице, е осомничен за продолжено кривично дело давање поткуп и давање награда за противзаконито влијание, три лица се товарат за примање награда за противзаконито влијание, а едно лице за продолжено кривично дело примање поткуп.

Според истрагата, управителот, од крајот на февруари до денот на апсењето, директно и преку посредници му ветил подарок – пари во значителен износ на директорот на Агенцијата за финансиска поддршка во земјоделството и руралниот развој. Во шемата како посредници учествувале и даночен референт во УЈП и државен службеник од Министерството за земјоделство, кои го поттикнале директорот да потпише договор за користење средства од ИПАРД-програмата, иако компанијата не ги исполнувала условите на јавниот повик.

Во замена за потпишување на договорот директорот на Агенцијата наводно прифатил ветен подарок од 50.000 евра, а при претрес биле пронајдени и одземени 400 евра, кои се дел од договорената сума.

Обвинителството соопшти дека побарало од судијата на претходна постапка да им биде определена мерка притвор за сите осомничени лица.

Македонија преку структурите и органите за управување на средствата од ИПА/ИПАРД донесе одлука за привремен прекин на исплатите на средствата од ИПАРД-програмата – инструментот на ЕУ за претпристапна помош за рурален развој, соопшти Министерството за финансии.

Од тука објаснија дека одлука следува по актуелните случувања со Агенцијата за финансиска поддршка на земјоделството и руралниот развој.

„За ваквата одлука истиот ден се известени Европската комисија и службите во Брисел, кои повратно известија и ја поздравија одлуката на националните структури. Целта е да се обезбеди уверување дека воспоставениот систем гарантира легалност и регуларност на плаќањата од ИПАРД, како и постоење ефективни мерки за заштита од измами и корупција“, велат од Министерството.

Членот на Централниот комитет на ВМРО-ДПМНЕ, Валентин Манасиевски, денеска изјави дека, според него, СДСМ се наоѓа во тотален распад поради лојалноста на Венко Филипче кон поранешниот премиер Зоран Заев, додека од партијата се дистанцираат поранешни функционери и членови.

Манасиевски оцени дека Филипче во СДСМ гледа само корист, а не партија што треба да понуди програма, визија или стратегија за иднината на државата. Според него, Филипче работи единствено по насоки на Заев, што, како што рече, се гледа и од однесувањето на негови поранешни блиски соработници кои, наводно, не сакаат да се вратат во партијата.

Тој посочи дека, според информација што ја добиле од „Бихаќка“, познат доктор и поранешен градоначалник, претходно близок соработник на Филипче, одбил позиција во партиското раководство со образложение дека Филипче е „нерелевантен и човек без кредибилитет“.

Манасиевски нагласи дека СДСМ има потреба од итни реформи, додавајќи дека, според него, Филипче, Заев и Димитар Ковачевски ја довеле партијата до тоа да биде трета сила на национално ниво, а петта во Скопје.

Денес ќе објавиме серија на информации кои отвораат сериозни сомнежи дека мега скандалот со корупцијата во ИПАРД фондовите води директно до врвот во власта, изјави портпаролката на СДСМ, Богданка Кузеска.

„Илија Стоилев додека ја вршел функцијата Директорт на Агенцијата за финансиска поддршка, бил и активен претседател на Општинскиот комитет на ВМРО-ДПМНЕ од Свети Николе. Она што е интересно е дека Стоилев е близок пријател на Игор Миќев викан Панкерот кој пак е во кумска односно кумашинска врска со премиерот Христијан Мицкоски. Од информациите кои ги добиваме од свиркачи, вработени во Министерството за земјоделие, токму Панкерот, кумот на Христијан Мицкоски, се однесувал деспотски во министерството вршејќи притисоци врз вработените за распределба на средства за субвенции и концесии. Од она што е доставено до нас од овие свиркачи токму кумот на Мицкоски се споменува како можен главен задолжен за сите криминални шеми и притисоци во министерството“, рече Кузеска.

Затоа, додаде таа, според истите информации и тој требало да биде опфатен со истргата.

„За ситуацијата да биде уште посериозна, кумата на Мицкоски и сопруга на Панкерот е вработена во Агенцијата за финансиска поддршка од каде според информациите кои се доставени до нас, без нејзино одобрение не се пуштала ниту една исплата на парите од ИПАРД програмите. Денес Христијан Мицкоски директно треба да одгвори. Дали под истрага се и неговите кумашини Игор и Цветанка Миќеви? Дали имало провизии и дали дел од провизиите завршувало кај него или во ВМРО-ДПМНЕ?“, праша Кузеска.

Таа побара истрагата за овој случај да биде проширена од страна на обвинителството и да се истражат сите други злоупотреби кои се случувале во агенцијата и во сектор земјоделие за кој вели дека е еден од најкорумпираните сектори откако ВМРО-ДПМНЕ дошле на власт.