Европа
ЕУ воведува темноцрвени зони на епидемиолошката карта на Европа
Претседателката на Европската комисија, Урсула фон дер Лаен, најави воведување нова ознака на епидемиолошката карта на Европа, темноцрвена зона, од која пред да заминат патниците, ќе треба да се тестираат, а по доаѓањето на определена дестинација, ќе мора да заминат во карантин.
„Темноцрвената боја ќе означува области каде што циркулацијата на вирусот е на исклучително високо ниво“, рече таа по самитот на лидерите на ЕУ, кој беше посветен на координирање на мерките за борба против пандемијата на коронавирусот.
Обележувањето на епидемиолошките зони не зависи од националните граници. Фон дер Лаен го наведува како пример случајот ако во една земја членка во пограничната област се затворат границите, а во соседната област останат отворени иако е иста епидемиолошка состојба. „Во тој случај сите од првата земја ќе одат на пазарување во втората и со тоа ќе придонесат за ширење на вирусот“, вели таа.
Претседателот на Европскиот совет, Шарл Мишел, рече дека лидерите на земјите членки се согласуваат дека е потребно да се разгледаат можностите за ограничување на патувањата што не се неопходни.
„Убедени сме дека кога станува збор за патувања што не се неопходни, треба да се земат предвид ограничувањата“, рече Мишел додавајќи дека границите мора да останат отворени за нормално функционирање на единствениот пазар.
И Мишел и Фон дер Лаен укажуваат на опасноста од мутација на вирусот, нови видови што се многу заразни. Затоа постои договор за зголемување на секвенционирањето на геномот на Ковид-19 со цел навремено откривање мутации на вирусот. Лидерите разговараа и за сертификатите за вакцинација. Мишел рече дека има договор за стандардизирани сертификати за медицински цели, но дека е рано да се зборува за нивната втора намена.
Грчкиот премиер Киријакос Мицотакис предложи овие сертификати да служат како пасоши за заживување на туризмот. Мишел посочува дека е рано за тоа сè додека не се вакцинира доволно голем број луѓе бидејќи во спротивно би имало дискриминација на лица што немале ниту можност да се вакцинираат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Орбан бесен по одлуката на Европскиот суд да ја казни Унгарија
Унгарскиот премиер Виктор Орбан изјави дека денешната одлука на Европскиот суд на правдата да ја казни Унгарија во износ од 200 милиони евра и дополнителни милион евра дневно поради миграциската политика е нечуена и неприфатлива.
Орбан во објава на платформа „Икс“ тврди дека Унгарија е казнета поради, како што наведе, бранењето на границите на ЕУ.
„Илегалните мигранти се чини дека им се поважни на бриселските бирократи отколку европските граѓани“, рече Орбан.
Унгарија ќе мора да плати глоба од 200 милиони евра поради непримена на промените во политиката за третман на мигрантите и барателите на азил, објави денеска највисокиот суд на ЕУ, Европскиот суд на правдата.
Судот наведе дека Унгарија, која претходно одби да ја спроведе судската одлука од 2020 година, исто така ќе мора да плаќа казна од 1 милион евра дневно додека целосно не ги спроведе предвидените мерки, објави „Ројтерс“.
Судот на ЕУ посочува дека Унгарија не презела мерки за почитување на пресудата од 2020 година во врска со правата на барателите за меѓународна заштита да останат во Унгарија во очекување на конечната одлука по нивната жалба против одбивањето на нивната апликација, како и протерувањето државјани од трети земји, кои илегално престојуваат во таа земја.
Унгарската влада претходно тврдеше дека пресудата од 2020 година е спорна бидејќи веќе ги затвори таканаречените транзитни зони и ги заостри правилата со кои се забрануваат идните барања за азил.
Европската комисија (ЕК) поднесе втора жалба против Унгарија до судот на ЕУ на почетокот на 2022 година, во која се наведува дека Унгарија не ги презела сите неопходни мерки за да се усогласи со пресудата од 2020 година.
Европа
Папата Франциско ќе се сретне со Бајден и Зеленски на самитот на најмоќните светски лидери
Папата Франциско ќе се сретне со лидерите на САД, Украина, Франција и на Индија на маргините на самитот на Г7 во Борго Егнација, Италија, соопшти денеска Ватикан.
Франциско, кој во јануари предупреди за перверзните опасности од вештачката интелигенција, треба да учествува во разговорите на лидерите за новата технологија в петок.
Тој е првиот папа што учествува во дискусиите на групата Г7, индустриски најразвиените земји во светот.
Објавувајќи ја програмата за неговата еднодневна посета, Ватикан соопшти дека Франциско ќе има билатерална средба со американскиот претседател Џо Бајден, исто така католик.
Ватикан исто така објави дека папата ќе има индивидуални средби и со украинскиот премиер Володимир Зеленски, Французинот Емануел Макрон, Индиецот Нарендра Моди, Бразилецот Луис Инасио Лула да Силва, Канаѓанецот Џастин Трудо, Турчинот Реџеп Таип Ердоган, Кениецот Вилијам Рута, Алжирецот Абделмаџид Тебуне и шефицата на Меѓународниот монетарен фонд (ММФ), Кристалина Георгиева.
Европа
Зеленски очекува важни одлуки од самитот на лидерите на најмоќните земји во светот
Украинскиот претседател Володимир Зеленски денеска изјави дека очекува важни одлуки од самитот на Г7, што почнува во Италија, особено потпишување безбедносен договор со САД и Јапонија.
„Голем дел ќе биде посветен на Украина, нашата одбрана и економска отпорност. Очекуваме денеска да се донесат важни одлуки“, објави Зеленски на „Телеграм“.
Украина треба да потпише билатерални безбедносни договори со Јапонија и САД. Зеленски рече дека со американските партнери ќе биде потпишан документ без преседан.
Земјите членки на Г7 треба да разговараат за деблокирање на заемот од 50 милијарди долари за Киев, кој би бил обезбеден со камата од запленетите руски средства. Г7 е меѓувладин политички и економски форум, кој се состои од седум економски водечки земји во светот – САД, Канада, Обединетото Кралство, Франција, Германија, Италија и Јапонија. На самитот учествуваат и претседателите на Европската комисија и на Европскиот совет.
Во четвртокот Украина го поздрави новиот пакет американски санкции против Русија. „Особено ги поздравуваме строгите мерки против руската воена индустрија и пристапот на Русија до технологијата и ресурсите во странство“, објави украинскиот министер за надворешни работи, Дмитро Кулеба, на X.
„Затворањето на воената машина на Путин е клучно за светската безбедност. Секое оружје што Русија не може да го произведе е спасен живот“, додаде тој. Во вторникот Зеленски ги повика западните сојузници да му испратат нови системи за противвоздушна одбрана за одбрана од руските напади, кои ја фрлија на колена енергетската инфраструктура на Украина.
По самитот на Г7 во Швајцарија, в сабота и в недела ќе се одржи мировна конференција за Украина, на која ќе учествуваат речиси 90 земји и меѓународни организации. Русија не беше поканета.