На инженерот Звонко Костовски во МВР, сведокот на СЈО, на денешното судење му беше предочен допис, кој, наводно, тој го испратил до Петтата управа во УБК, со кој наводно бара од својот шеф, Горан Грујевски, да биде расходувана, т.е. раздолжена опремата за прислушување поради зафаќање преголем простор за чување на податоците.

Костовски во сведочењето за предметот „Таргет – Тврдина“ рече дека таквиот документ не е негов. На втората страница, на која е потпишан, рече дека потписот е негов. Пред судот рече дека првата и втората страница од документот се со различен фонт, а не бил ист и печатачот на кој бил печатен документот, како и бојата на хартијата.

„На првата страница буквите се задебелени во споредба со втората страница“, рече Костовски. Тој рече дека онаму каде што пишува ‘строго доверливо’ на првата страница е пократка од линијата на втората страница и дека двата листа од дописот се разликуваат.

„Евиденцискиот број е венсен со мастилно пенкало. Секретарката користеше обично хемиско пенакло“, рече сведокот.

„На 21.11 2014 година, кога е заведен документот, Горан Грујевски беше доктор на правни науки и беше незамисливо на Грујевски да му се обратиш и да го ословиш со магистер“, рече Костовски.

Сведокот рече дека во 2015 година одделот бил преименуван, што не стои во документот, а најде и правописни грешки, кои, како што рече, никогаш не ги прави.

Костовски рече дека се сомнева оти станува збор за лист изваден од друг негов документ што го потпишал и е вметнат во дописот што наводно го пратил до Грујевски.

Сведокот на СЈО рече и дека целиот начин на изразување не соодветствува со стилот со кој тој се изразува. „Одделот за информатика никогаш не знаел каква опрема има во УБК за прислушување. Никогаш не ни бил испратен таков допис за раздолжување таква опрема“.

Според обвинението, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20 илјади граѓани.