На денешната редовна 134 владина седница беше усвоен предлогот за разрешување на Љупчо Коцевски од функцијата јавен обвинител со што ја продолжуваме постапката која согласно законските ограничувања беше привремено стопирана во изборниот период, соопшти владината портпаролка Марија Митева.

„Причините за оваа иницијатива се јавно познати повеќепати до сега ги имаме образложено како Влада, доследно, транспарентно и во интерес на заштита на институционалниот интегритет и одговорност. Нашата цел останува недвосмислена. Јакнење на правната држава и обезбедување на непречено функционирање на органите во служба на граѓаните.

Врз основа на членот 88 став 1 од Законот за јавното обвинителство, а по претходно добиено мислење од страна на Советот за јавни обвинители му предлага на Собранието од функцијата јавен обвинител на Република Македонија да го разреши Љупчо Коцевски, поради направени крупни професионални грешки при раководењето со Јавното обвинителство што доведува до нарушување на ефикасноста и функционалноста на Јавното обвинителство.

Неовластено изнесување на информации, податоци за судски предмети со што ја повредил обврската за заштита на тајноста на постапката согласно закон.

Нарушување на угледот на Јавното обвинителство и неговиот личен углед.

Не постапувајќи согласно обврските што се предвидено со Уставот, законите и меѓународните договори ратификувани во согласно со Уставот“.

Како последица на сторените повреди по изминатиот период, евидентна е, додава Митева, нарушената функционалност на Јавното обвинителство и сериозно е нарушен интегритетот на истата, согласно членот 27 став 1 од Законот за јавно обвинителство, токму јавниот обвинител е одговорен за општите состојби, за организирањето и извршување на функциите на Јавното обвинителство.

Постапувајќи на овој начин јавниот обвинител Љупчо Коцевски, како што истакна Митева, флагрантно ја повредил должноста да го чува угледот на функцијата што ја врши предвидена во член 82 став 1 од Законот за јавно обвинителство.

„Имајќи го предвид наведеното Владата му предлага на Собранието да го разреши од функција јавниот обвинител на Република Македонија, Љупчо Коцевски“.

Премиерот Христијан Мицкоски седнат во првиот ред во Собранието денес ги слушна барањата на родителите на загинатите и повредените во трагедијата во Кочани. Тие побараа правда, одговорност и од актуелни функционери и вработени во институциите, системски измени за да не се повтори таква трагедија и психолошка и финансиска помош за семејствата на ист начин како што државата постапила по трагедијата во модуларната болница за која само неколку месеци по трагедијата имаше две одлуки за инансиска помош. Кажаа дека поднеле барање за финансиска помош на кое им било кажано дека ќе им одговорат откога ќе завршат изборите,  но и еден месец по завршување на изборите, одговор немаат па сметаат дека се дискриминирани.

За барањето за финансиска помош премиерот Мицкоски, кога излезе од Собранието, не сакаше да зборува.

„Не би сакал за тоа да коментирам“, кусо одговори премиерот Мицкоски на прашањето за финансиската помош што ја бараат семејствата на загинатите и повредените.

Иако не сакаше да зборува конкретно за барањето за финансиска помош, премиерот Мицкоски уверува дека ќе стори се што е во негова моќ да помогне „на тие кои што се лекуваат да ја добијат онаа нега која што е потребна“.

Премиерот кажа дека секој пратеник може да предложи амандман за измени на секој закон кој би овозможил да се дојде до правдата за трагедијата во Коани, но досега такво нешто не е направено.

„Таков предлог досега никој од овие пратеници кои дискутираа нема доставено. Вистинското прашање е зошто се чекаа месеци да се закаже оваа анкетна комисија и моето чувство од оваа анкетна комисија е дека сите зборуваме за правда. И моето чувство е едно од главните барања на родителите е токму тоа, да има правда. Правда на анкетна комисија не може да има. Правда може да има во рамките на судски процес, нешто кое што јас веќе го зборував“, рече премиерот Мицкоски и неколкупати објасни дека обвинителот, а не тој, кажал дека секое изнесување факти во рамки на собраниската анкетна комисија може да наштети на истрагата па затоа не може да учествува во работата на анкетната комисија.

Премиерот двапати повтори дека со тоа што се појавил на собраниската анкетна комисија за Кочани, не само тој туку и целиот државен врв, покажал дека опозицијата со тврдењата дека нема да се појави само креирала лажна слика и растурала пердуви.

Премиерот, Христијан Мицкоски, ги отфрла наводите на лидерот на СДСМ, Венко Филипче, дека во Македонија ќе бидат отворени кампови за мигранти. Вели дека додека тој е премиер, нема да никне ниту еден шатор за илегални мигранти во земјава.

„Додека јас сум премиер, додека јас сум претседател на оваа влада, нема да никне ниту еден шатор во кој што ќе бидат сместени илегални мигранти и нема да примиме ниту еден илегален мигрант“, рече Мицкоски.

Напротив, додаде тој, ќе ја зајакнеме нашата борба заедно со нашите сојузници во рамките на НАТО против илегалната миграција.

Мицкоски, исто така, кажа дека оваа тема не била разговарана со Велика Британија,

„Да потенцирам и да кажам јасно и гласно пред македонската јавност дека таква тема не е разговарана, но доколку се разговара, исто така, ќе биде одбиена од наша страна“, рече Мицкоски.

Филипче денеска на прес- конференција рече дека британските медиуми објавиле информации за тоа што е разговарано околу прашањето за мигрантите од Британија.

„И од овие пишувања на британските медиуми дознаваме за разговорите кои што се воделе за мигрантите, дека треба да бидат интегрирани да бидат присутни на нашиот пазар на трудот, особено во градежништвото и тука да имаат трајни живеалишта. Дури има и детални информации дека Велика Британија ќе и исплаќа на Македонија 20.000 фунти по депортиран мигрант, согласно новиот договор за т.н. повратни центри. И сето ова замислете македонските граѓани го дознаваат од странски медиуми. Ова е апсолутно недозволиво, ова е скандал од невидени размери“, посочи претседателот на СДСМ, Венко Филипче.