Косовскиот премиер Рамуш Харадинај најави дека ќе се сретне со германската канцеларка Ангела Меркел на 6 јуни во Берлин. Тој во емисијата „Пресинг“ на Т7, изјави дека состанокот во Берлин, одржан во април со лидерите на Западен Балкан и канцеларката Меркел и францускиот претседател, Емануел Макрон, бил историски за Косово и дека никој не може ништо негативно да каже за тој состанок, мислејќи при тоа на оценката на косовскиот претседател, кој рекол дека Европа покажала дека е слаба и необединета.

Харадинај потврди и дека неговите односи со претседателот на Косово, се нарушени, бидејќи, како што вели, Хашим Тачи го напаѓал зашто се плашел од неговата популарност, но дека тука немало ништо лично, пренесе „Газета Експрес“.

Компанијата „Фејсбук“ соопшти дека од октомври минатата година до март годинава, биле идентификувани и отстранети повеќе од три милијарди лажни профили, што е двојно повеќе од претходните шест месеци.

Тоа покажува со колкави предизвици се соочуваат експертите во компанијата за да препознаат и угасат профили, кои прават компјутери за да шират спамови и лажни вести.

Наспроти тоа што во компанијата постојано усовршуваат и развиваат алатки за препознавање лажни профили тоа го работат и оние кои ги прават, па е очигледно збор за мртва трка.

Во соопштението на „Фејсбук“, се наведува дека 99 отсто од три милијарди лажни профили биле блокирани неколку минути откако биле поставени, пред да ги види некој и да ѝ пријави на компанијата.

Фејсбук секој месец има околу 2,4 милијарди активни корисници, а во компанијата сметаат дека од прилика секој дваесети активен корисник е лажен.

Во компанијата повеќе илјади луѓе деноноќно следат постови, фотографии и видеа, за да се спречи кршење на законите, а за некои од тие работи се користи и вештачка интелегенција.

Претседателот на Европската комисија, Жан клод Јункер изјави дека е свесен за заканата, која ја претставуваат националистичките политичари за европската солидарност, која е главна цел на ЕУ.

„Овие популисти, националисти, глупави националисти ги сакаат само своите држави. Тие не ги сакаат оние кои доаѓаат од далеку. Јас ги сакам оние кои доаѓаат од далеку… ние треба да постапуваме солидарно со оние кои се во полоша ситуација од нашата“ вели Јункер за Си-ен-ен, во пресрет на европските избори.

На прашањето дали антиевропските сили поуспешно ја мобилизираат својата база од проевропските, Јункер оценил дека секогаш е полесно да се мобилизираат негативните отколку позитивните сили.

Тронка надеж, Јункер гледа во тоа што се случуваше по одлуката Британија да ја напушти ЕУ во 2016 година.

„Од брегзит, бројот на оние кои се за ЕУ порасна бидејќи луѓето гледаат што се случува и видоа дека излегувањето од ЕУ не е толку лесно како што им било речено“ истакна тој.

Јункер вели дека сака да заврши процесот на брегзит, затоа што, како што објаснува, тој ѝ штети на општата атмосфера во Европа. Смета и дека Британците треба да го поддржат планот на премиерката Тереза Меј, кој е договорен со ЕУ.