Според весникот „Ил Фато Котидијано“, 21 музичар на познатиот милански театар „Ла Скала“ биле заразени со коронавирус, а инфекцијата се шири и меѓу уметниците на подеднакво познатиот неаполски театар „Сан Карло“, каде што 12 уметници биле позитивни на Ковид-19.

Двата театри се затворени, просториите се дезинфицирани, а претходно закажаните концерти се откажани.

Новите построги мерки на италијанската влада за спречување на ширењето на Ковид-19 влијаат на голем број уметници чии синдикати најавуваат протест низ Италија на 30 октомври.

Лабораториите Санофи и ГСК најавија дека ќе и стават на располагање 200 милиони дози од својата вакцина против Ковид-19 на меѓународната програма Ковакс, која ја покрена Светската здравствена организација (СЗО) и која треба да обезбеди глобален пристап до вакцините.

Француски Санофи и британски ГСК соопштија дека потпишале писмо со Глобалниот сојуз за вакцини и имунизација (ГАВИ), кој управува со програмата Ковакс.

Двете лаборатории, наводно, имаат намера да стават на располагање 200 милиони дози вакцина против Ковид-19, ако биде одобрена од регулаторните тела.

Санофи и ГСК заеднички развиваат потенцијална вакцина.

Клиничките испитувања врз луѓе започнаа во септември. Првите резултати од тестот се очекуваат на почетокот на декември 2020 година, додека третата клучна фаза од тестот е планирана пред крајот на годината.

Гави рече дека најавата на двете лаборатории е важен чекор, потсетувајќи дека целта е да се соберат две милијарди вакцини до крајот на 2021 година.

Според официјалните податоци, 184 земји се приклучија на меѓународниот систем за набавка и дистрибуција на вакцини – 92 земји со ниски и средни приходи ќе добиваат дози бесплатно, а 92 земји со високи приходи ќе ја поминат програмата „Ковакс“ во набавките, но ќе мора да ги платат дозите од сопствен џеб.

Францускиот претседател Емануел Макрон денес треба да воведе карантин на национално ниво (локдаун) за да се спречи ширењето на коронавирусот, објавија француските медиуми.

Тие исто така додаваат дека затворањето најверојатно ќе трае четири недели.

Објавата се очекува по рекордниот број на заразени во земјата што доведе до притисок врз болниците, а бројот на смртни случаи исто така е зголемен.

Макрон треба сè да објави вечерва во телевизиско обраќање до нацијата, а во текот на денот треба да одржи состанок со министрите во владата.

Премиерот Жан Кастекс денес се среќава со лидерите на синдикатите и опозициските партии за да ги оправда построгите мерки.

Во големи делови на Франција, вклучително и Париз, е воведен полициски час, но властите велат дека тој не е доволен за да се запре вирусот.

Бројни француски лекари повикаа на целосно заклучување и рекоа дека 58 проценти од креветите за интензивна нега се зафатени.

„Владата не зеде предвид каков беше првиот бран и тие не научија доволно од него“, рече Фредерик Валету, претседател на Француската болничка федерација. Тој повика на заклучување во траење од еден месец, додавајќи дека вториот бран во болничките системи ќе биде уште попоразителен од првиот и дека болниците нема да преживеат без драстични мерки.