Македонија
(Видео) Караници и дерење во Собрание: Се зборуваше за купување на коњи и магариња, наместо за разрешувањето на Беким Сали
За коњи и магариња се зборуваше на последното продолжение од собраниската седница за разрешувањето на Беким Сали. Пратеникот Никола Мицевски од ВМРО-ДПМНЕ обраќајќи им се на пратениците од СДСМ, за родилката од Дебар која остана без органи рече: „ја демонтиравте“, а потоа, се извини од говорницата поради изразот бидејќи доби негативни овации од пратениците од власта.
„Вие навистина мислите дека опозицијата е крива што не може да се земат плати во здравството? Абе вие сериозни сте со ова, така ми стои работава. Јас како што почавте, очекував да кажете дека ние ги дадовме пасошите на криминалците во државата, јас мислев ќе ни кажете дека на Онишченко ние дадовме пасош. Јас мислев дека и оваа родилката ќе ја препишете дека од докторите од ВМРО-ДПМНЕ… Родилката од Дебар, што ја демонтиравте пола жена и судството најде за сходно дека таму нема ништо. Работиве излегоа од контрола“, кажа Мицевски.
„Срамота, срамота“, извикуваа пратениците од власта од место.
„Јас ќе ви кажам што е срамота колешке, срамота е што вие молчите за таа жена, срамота е што глас не дигнавте. Од место зборите, јави се тука да ти кажеме што е срамота. Се криете таму каде не треба“, продолжи Мицевски
По ова Мицевски доби аплауз од колегите од ВМРО-ДПМНЕ, а извици дека е срамота неговиот говор од пратениците на СДСМ.
„Срамота е тоа што сакате да го правите“, им врати Мицевски.
За збор се јави Јован Митревски од СДСМ кој зборуваше за коњи и магариња.
„Вие колега Мицевски зборувате за нервоза? Јас мислам дека вие ги имате прегледано вашите снимки кога зборувате… Јас ниту сакам да вжештувам атмосфера ниту да правам нешто плус што вас ќе ви даде некаков мотив, а вашиот мотив е тој што ви наредува од белата палата што да правите, а знам дека не ви се допаѓа. Бидејќи споменувате Пазар3, таму има две објави за бел коњ. Едниот е во Св. Николе, другиот во Гостивар. Бидејќи сте креативни, имате и една објава за бело магаре. И мислам, да дадеме шанса до сабајле, во смисла што вие правите и што значи бело магаре“, кажа Митревски.
Потпретседателот на Собранието, Горан Мисовски, ја запре седницата.
„Нема повеќе атмосфера за работа во салата“, кажа Мисовски.
По ова, Мицевски доби процедурално и кажа: „Доблестен сум и се извинувам за несреќно изречениот израз за жената од Дебар. Во момент на дебата, по цел ден присуство на репликите, имам доблест да се извинам на изречениот израз употребен во дебатата. Се извинувам на сите граѓани, пратениците и стојам зад ова што го зборувам“, кажа Мицевски и доби аплауз.
Седницата продолжува утре во 11 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одземен имунитетот на судијата Наќе Георгиев – обвинителството отвори истрага против две лица
Обвинителството објави детали за случајот со апсењето на врховниот судија, Наќе Георгиев.
Од тука информираа дека акцијата за апсење следела по пријава од син на обвинет во предмет што се води во Основното јавно обвинителство за гонење на организиран криминал и корупција.
Обвинителството објави дека донесена е наредба за спроведување на истражна постапка судијата и уште едно лице за кои постои основано сомнение дека сториле кривично дело Примање награда за противзаконито влијание од член 359 од Кривичниот законик.
„Според сознанијата добиени од пријавителот, првоосомничениот користејќи ја својата службена положба и претпоставено влијание лажно ветувал погодности за обвинет (татко на пријавителот) во друга постапка што се води пред Основното јавно обвинителство за гонење на организиран криминал и корупција, и лажно прикажале дека ќе извршат влијание заедно со второосомничениот. Предметниот обвинител, вчера вечер покрај предлозите за претрес на повеќе локации, ценејќи дека се исполнети условите до Основниот кривичен суд Скопје достави и предлог за определување на мерката притвор за првоосомничениот. Со оглед на тоа што станува збор за судија во највисокиот суд во државата – Врховниот суд кој ужива имунитет, а кој е фатен in flagranti во извршување на кривичното дело, предлогот преку Основниот кривичен суд е доставен на одлучување до Судскиот совет на РСМ кој во текот на ноќта му го одзеде имунитетот, по што денеска Основниот кривичен суд Скопје ќе одлучува за предложената мерка“, велат од Обвинителството.
Прибраните докази и извршените претреси до овој момент даваат законски основ на предметниот јавен обвинител да предложи притвор само за првоосомничениот кој е затекнат при извршување на кривичното дело“, велат од Обвинителството.
Во однос второосомничениот, како што информираат од Обвинителството, до овој момент доказите не даваат основи за да се предложи најстрога мерка за обезбедување. Истрагата продолжува до целосна проверка на сите околности и наводи.
Синоќа по наредба на судија на претходна постапка извршен е претрес во домот на членот на Советот на јавни обвинители Иџет Мемети во Тетово и претрес во службените простории на Советот на јавни обвинители.
Македонија
МВР утврди неправилности: забавниот парк со панорамско тркало во Карпош ќе биде отстранет
Постапувајќи по допрен глас дека во Скопје, на подрачјето на Општина Карпош, поточно пред спортскиот центар Борис Трајковски без соодветни документи и потребни дозволи се поставени реквизити за забавен парк меѓу кои и панорамско тркало, полицијата излезе на лице место и презема конкретни соодветни мерки и активности од делокругот на својата надлежност и овластувања.
„Од страна на инспекциските служби поведена е постапка за констатираните неправилности, по што ке бидат преземени конкретни мерки во насока на отстранување на истите, престанување со вршење на активноста, како и дислоцирање на реквизитите“, информираа од МВР.
За случајот, викендов алармираше Град Скопје, од кадешто беше истакнато дека фирмата „Дизниленд реквизити“ од Чаир регистрирана пред само еден месец, без соодветни документи и дозволи, без потребна документација која гарантира безбедност, монтира панорамско тркало и останати реквизити во Карпош пред Борис Трајковски.
„Град Скопје, во рамки на своите надлежности изврши надзор, превзема мерки и го казни правното лице, но тој сепак насилно продожува да работи. Ги повикуваме надлежните институции и апелирам да постапат во најкус можен рок, бидејќи се доведува во прашање безбедноста на децата и на сите останати посетители поради практицирањето на ваквото самоволие“, повикаа од Градот.
Македонија
Претрес и кај Иџет Мемети во случајот со барањето поткуп
Синоќа по наредба на судија на претходна постапка извршен е претрес во домот на членот на Советот на јавни обвинители Иџет Мемети во Тетово и претрес во службените простории на Советот на јавни обвинители.
Претресот е поради сомнеж дека Мемети заедно со врховниот судија, Наке Горгиев, имал влијание злоупотребувајќи ја позицијата член на Советот на јавни обвинители во случајот барање на мито за олеснителни околности.
Мемети е и поранешен министер за правда, уставен судија, државен советник во Владата и член на Државната изборна комисија.
Судијата Наке Георгиев вчера беше приведен, откако бил фатен со мито.