„Пратеници на СДСМ во собраниска процедура го доставија предлог-законот за изменување и дополнување на Законот за работните односи, кој предвидува задолжително пензионирање на 64 години возраст и 15 години пензиски стаж. На овој начин создаваме услови за намалување на вработените во државната администрација и во јавниот сектор, но и отвораме простор за вработувања млади кадри, кои може да дадат значаен придонес во унапредување на работниот процес. Со ова реализираме уште едно клучно ветување дадено пред граѓаните, отвораме нови можности за младите“, изјави Јован Митрески, координатор на пратеничка група на СДСМ и коалицијата.

Во собраниска процедура заедно со предлог-законот за измени и дополнување на Законот за работните односи го доставуваме и предлог-законот за измена на Законот за администрацијата, со што целосно ќе бидат опфатени сите вработени во државниот и приватниот сектор.

„Со цел да се обезбеди одреден преоден период, сите оние што до 31 август 2020 година поднеле барање за продолжување на договорот за вработување, предвидуваме нивниот договор да важи до истекот на времето за кое е предложен, односно до исполнување на рокот даден со претходното барање. Поради недостиг на одредени стручни кадри и потребата од ефикасно продолжување на работниот процес, исклучок од правилото за пензионирање на 64 години возраст и 15 години пензиски стаж ќе има во секторите здравство и кај високото образование, каде што работниот стаж ќе може да се продолжува година за година, но најмногу до 67 години возраст.

Во согласност со предложените измени во Законот за здравствената заштита, заради непречено вршење на здравствената дејност, директорот на здравствената установа по претходна согласност на здравствениот работник, односно соработник, еднаш годишно донесува одлука за продолжување на договорот за вработување на здравствениот работник или соработник кој ги исполнил условите за стекнување старосна пензија најмногу до 67 години возраст. Но, оваа одлука задолжително ќе мора да ја потврди и министерот за здравство. Во Законот за високото образование предвидуваме дека на лице избрано во наставно-научно звање или наставно звање по негово барање и заради непречено вршење на дејноста на високообразовната установа, работодавецот еднаш годишно може да му го продолжи договорот за вработување до завршување на учебната година во која ги исполнува условите за стекнување старосна пензија или најмногу до завршување на учебната година во која полни 67 години возраст. Како одговорна партија, како одговорни пратеници, продолжуваме со вистинска грижа за сите граѓани, продолжуваме со создавање мерки и политики што го унапредуваат квалитетот на животот“, додаде тој.