Македонија
(Видео) Спасовски на терен по воведувањето на полициски час: Граѓаните да останат дома и да се однесуваат одговорно

Техничкиот премиер Оливер Спасовски заедно со заменик-министерка за внатрешни работи, Славјанка Петровска, го посетија контролниот пункт на МВР во Чаир. Двајцата се уверија дека е почнато со спроведување на полицискиот час, а Спасовски порача дека ништо не е исто како порано и побара граѓаните да ги почитуваат мерките на Владата.
Запрашан зошто заедно со нив не е министерот за внатрешни работи, Наќе Чулев, премиерот рече дека тој е на друг контролен пункт со цел да се охрабрат повеќе полицајци и припадници на Армијата.
„Ова е моментот каде што првпат во историјата на државата имаме ограничување на движење на целата територија. Знаете сите дека ништо не е исто, дека се е вонредно и граѓаните знаат дека сите треба да се однесуваат вонредно и одговорно. Треба да ги почитуваат одлуките и наредбите кои ќе ги добијат од овластените службени лица. Да ја почитуваат оваа забрана за движење и дневно движење за групирање. Одговорноста е на сите нас. Ова не е битка само на здравството, полицијата, Армијата, туку на секој еден од нас. Колку подобро се однесуваме, толку подобри резултати и побрзо справување со оваа ситуација“, рече Спасовски.
Тој повторно побара да не се излегува од дома без потреба.
„Да не се излегува од дома без нужна потреба. Така ќе се справиме со вирусот. Сакам да бидеме сплотени и единствени. Да ги почитуваме институциите“, додаде Спасовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Времето денеска ќе биде сончево и многу топло, од утре засилен северен ветер, пороен дожд и грмежи

Времето денеска ќе биде сончево и многу топло со мала до умерена локална облачност. Ќе дува слаб до умерен ветер од јужен правец. Минималните температури ќе се движат од 11 до 19, а максималните од 26 до 38 степени.
Во Скопје, сончево и многу топло со мала до умерена облачност. Ќе дува слаб со умерен ветер од јужен правец. Минималната температура ќе биде 17, а максималната ќе достигне 38 степени.
УХМР информира дека од утре времето ќе биде сончево со мала до умерена облачност. Ќе дува умерен до засилен северен ветер, а дневната температура ќе опадне за 3 до 5 степени. Во попладневните часови ќе има услови за локална појава на нестабилност со пороен дожд и грмежи.
Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.