„Скопјани повеќе од две години се заложници на меѓусебното инаетење на Арсовска и Мицковски, кои заедно во предизборната кампања ветуваа „Модерно Скопје“. Мицкоски, конечно, призна дека ДПМНЕ ја саботира работата на Град Скопје“, вели партијата Левица.

„По средбата на скопската градоначалничка Арсовска со премиерот Мицкоски, на вчерашната координацијата со координаторите на советничките групи, којашто се одржа во Град Скопје, се насетува извесно затоплување на односите.

Интересно е што после координацијата, премиерот Мицковски изјави дека ги охрабрува советниците од ДПМНЕ во Советот на Град Скопје да ги поддржат програмите на јавните претпријатија, со цел да се стави „ред во хаосот“.

Оттука се наметнува прашањето:

Зошто досега советничката група на ДПМНЕ не ги гласаше овие програми (кој издал таква наредба?) и со тоа директно ја саботираше работата на претпријатијата, што ги прави директни учесници во креирањето на хаосот во Скопје?

Град Скопје е во колапс подолго време поради нефункционалноста на јавните претпријатија! Градоначалничката Арсовска на неколку месеци ги менува директорите на претпријатијата, додека, пак, советниците на ДПМНЕ во Советот на Градот не ги гласаат програмите според кои работат јавните претпријатија. Згора на сè е тоа што ДПМНЕ, коешто има мнозинство во управните и надзорните одбори на јавните претпријатија, дополнително ја отежнува работата на претпријатијата.

По повикот на Мицкоски до советниците од неговата партија, не знаеме како ќе гласа советничката група којашто го има мнозинство во Советот на Градот.

Останува да видиме дали ќе има доза на вразумување на седницата којашто ќе се одржи следниот четврток, но повеќе од сигурно е дека штетата што ја направија со досегашното саботирање на клучните програми, скопјани ќе ја чувствуваат уште долго“, се наведува во соопштението на партијата Левица.

ЈП Комунална хигиена-Скопје во моментов ја спроведува акцијата за собирање кабаст отпад во скопската општина Аеродром, каде што на следните локации се поставени специјални садови во коишто жителите на општината можат да го одложат својот кабаст отпад:

1. булевар АСНОМ бр. 68, Реон-населба: Јане Сандански;

2. улица Коста Новаковиќ бр.48 (23-ти Октомври бр.29), Реон-населба: Стар Аеродром;

3. булевар Видoe Смилевски Бато бр. 19, Реон-населба: Ново Лисиче;

4. булевар АСНОМ бр.5 (кај „Рамстор“), Реон-населба: Ново Лисиче.

Во рамките на акцијата за собирање кабаст отпад на ЈП Комунална хигиена-Скопје, досега беа подигнати и транспортирани 130 кубни метри стар мебел и покуќнина во општината Ѓорче Петров, 170 кубни метри во општината Карпош, 130 кубни метри во општината Центар, како и 150 кубни метри во општината Кисела Вода.

Од 25 август 2024 година, акцијата ќе продолжи да се реализира во скопската општина Гази Баба.

Градоначалникот на општина Гази Баба Бобан Стефковски оддржа средба со директорите на општинските основни училишта на територија на општина Гази Баба на која разговараа за подготвеноста за почетокот на новата учебна година.

За состанокот, градоначалникот Стефковски информираше со објава на својата официјална страна на фејсбук во која напиша:

„ГАЗИ БАБА Е ПОДГОТВЕНА ЗА СТАРТОТ НА НОВАТА УЧЕБНА ГОДИНА. Оддржав работен состанок со директорите на општинските основни училишта на територија на општина Гази Баба на кој разговаравме на повеќе теми поврзани со подготвеноста на училиштата за стартот на новата учебна година. Директорите ме информираа дека се постојана комуникација со Министерството за образование и наука за започнатиот процес на достава на учебниците. Ги информирав директорите дека во завршна фаза е изработката на бесплатните училишни униформи за сите 6800 ученици, мерка која ја воведовме минатата година за прв пат во општина Гази Баба. Ја користам оваа прилика уште еднаш да ги повикам семејствата кои имаат запишано прваче во училиштата на територија на општина Гази Баба да поднесат барање за добивање на еднократна финансиска поддршка од 3000 денари. На состанокот заеднички дојдовме до заклучок дека општина Гази Баба е подготвена за почетокот на новата учебна година“ – напиша Стефковски.