Топ
Гостиварец осомничен за убиство на неговата сопруга, ја нападнал со нож и секира

Шеесет и седумгодишен жител на Гостивар е осомничен за убиство на неговата сопруга. Според информациите на Обвинителството, тој со нож и секира на жената ѝ нанел повеќе убодни рани, од кои починала. Осомничениот е во бегство.
Настанот бил пријавен утринава околу 7 часот од синот на жртвата, гостиварка на возраст од 60 години. Осомничен за стореното кривично дело е нејзиниот сопруг, 67-годишен жител на Гостивар, со кого жртвата подолго време имала нарушени односи.
„Според првичните сознанија на Обвинителството, осомничениот ја нападнал оштетената, па со употреба на секира и нож ѝ нанел повеќе убодни рани по телото. Јавниот обвинител издаде наредби за обезбедување и прибирање на траги од местото на настанот, кои ќе бидат предмет на натамошно вештачење. Издадена е наредба за обдукција на телото на починатата“, соопштија од Обвинителството.
Осомничениот е во бегство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: Непочитувањето нема да се толерира, ќе удриме посилно од кога било

Американскиот претседател Доналд Трамп изјави дека учесниците на протестот во Лос Анџелес „имаат тенденција да плукаат во лице“ на членовите на Националната гарда кои беа испратени во тој град за да ги смират немирите и дека одговорот на членовите на гардата на ова ќе биде да ги „удрат“.
„Ако плукаат, ние ќе удриме. Оние кои учествуваат во немирите имаат тенденција да плукаат во лицата на Националната гарда и на другите. На овие патриоти им се вели да го прифатат тоа, така функционира животот. Но, не во администрацијата на Трамп. Ако плукаат, ние ќе удриме и ви ветувам дека ќе бидат погодени посилно од кога било досега. Таквото непочитување нема да се толерира“, рече Трамп во објава на неговата социјална мрежа.
Трамп го обвини гувернерот на Калифорнија, Гевин Њусом, дека ги инспирирал „катастрофалните немири“ во Лос Анџелес, поради кои беше испратена Националната гарда на Калифорнија во тој град.
Немирите во некои делови од Лос Анџелес избувнаа како одговор на активностите на Министерството за миграција на САД (ICE), кое изврши рации во бизниси во потрага по нелегални работници, т.е. мигранти.
Свет
Руте: Русија би можела да не нападне во рок од пет години

Русија би можела да започне напад врз НАТО во рок од пет години, предупреди шефот на воената алијанса, Марк Руте, пренесуваат медиумите во регионот.
Во својот говор, тој предупреди дека „веќе нема Исток или Запад“ со оглед на брзината и моќта на руските ракети.
„Да не се лажеме, сите сме на источното крило. Нема Исток или Запад, постои само НАТО. Растојанието помеѓу европските престолнини е само неколку минути“, рече тој, осврнувајќи се на брзината на руските ракети.
Тој нагласи дека заканата „нема да исчезне кога ќе заврши војната во Украина“, повикувајќи ги членките на алијансата да ги зголемат трошоците за одбрана. Тој ги повика земјите-членки да ги зголемат трошоците за воздушна и ракетна одбрана. Тој се согласи со барањето на американскиот претседател Доналд Трамп секоја земја-членка мора да издвои минимум пет проценти од БДП за одбрана.
На прашањето кој е главната закана Руте рече дека секој напад врз НАТО би имал „разорни последици“.
„Смртно сериозни сме дека ако некој се обиде да нè нападне, последиците за него ќе бидат разорни, без разлика дали е тоа Русија или некој друг“, рече тој.
„Не станува збор само за пари и оружје, туку и за менталитет. Свесни сме дека тука многу работи се во прашање. Луѓето кои се обидуваат да дејствуваат против нас мора да го разберат тоа“, додаде тој.
На прашањето дали главната закана за НАТО е Русија или Кина, тој одговори: „Главната долгорочна закана за НАТО е Русија. Нема сомнение за тоа. Но, има повеќе од Русија. НАТО никогаш не е основан само за да се бори против Советскиот Сојуз. Станува збор за заштита на НАТО од секој што сака да нè нападне. Она што го гледате во Кина е огромно зголемување на нивната војска.“
Портпаролот на Кремљ, Дмитриј Песков, рече дека НАТО е „инструмент на агресија и конфликт“.
„НАТО, откако ја симна маската, го покажува своето вистинско лице како инструмент на агресија и конфликт на секој можен начин“, рече Песков на редовниот брифинг за медиумите.
Македонија
(Видео) Тренчевска: Хаосот во здравството не може да го среди министер информатичар

Владата, наместо да гради систем што треба да се грижи за здравјето на граѓаните, создава систем што го става во ризик животот на луѓето, систем кој убива. И овој хаос треба да го среди новиот министер за здравство – Азир Алиу, кој е професионалец во информатиката, но не и во здравството.
Хаосот во здравството не може да го среди министер информатичар. Алиу нема никакво претходно искуство во здравството, и додека да се запознае со областа во која влегува, најверојатно и него ќе го сменат или сам ќе си отиде. И повторно нема да е криво ВМРО-ДПМНЕ, туку ќе бидат криви коалиционите партнери затоа што дале такви кандидати, рече пратеничката на СДСМ, Јована Тренчевска, на денешната собраниска седница.
Тренчевска се осврна на, како што рече, сите пропусти на оваа влада, потсетувајќи и на вчерашната прослава, 34 години од постоењето на Унијата на млади сили на ДПМНЕ, со скандалозно шоу од пиротехнички средства, на неполни три месеци од пожарот во Кочани.
„Како паметот да не им доаѓа, или намерата беше да се испрати јасна порака дека сè им е дозволено. Цехот ќе си го носат родителите, сестрите, браќата, фамилијата, роднините, пријателите, граѓаните, а тие ќе си тераат како сакаат и ќе отвораат телефонски линии за да покажат некаква божемски грижа. Од финансиската поддршка, ништо не обезбедија. Обезбедија граѓаните и компаниите со донации, а на ДПМНЕ им остана фалбата и лажниот ПР, рече Тренчевска.
Таа потсети дека имаме влада која, заради својата неспособност, се соочи со најголемата трагедија во историјата на независна Македонија – кочанската трагедија, каде што згаснаа 62 млади животи, а 200 се повредени.
Влада која не знае како да се справи со здравствените предизвици. Токму во контекст на оваа трагедија, таа, додаде Тренчевска, не прифаќа понудени законски решенија од опозицијата, со кои се нуди вистинска и реална поддршка и помош, потенцираше Тренчевска.
Таа потенцираше дека во моментов ја имаме најнеспособната влада од осамостојувањето на Македонија до денес, која го донесе здравството до степен на „тежок пациент“ на кој му нема спас.
„Секој сектор од здравството е метастазиран од неспособноста и негрижата на власта, а граѓаните го плаќаат цехот со сопственото здравје“.