Топ
Македонски државјани под истрага во Хрватска за криумчарење мигранти

Канцеларијата за борба против корупција и организиран криминал (УСКОК) на Хрватска отвори истрага против седуммина државјани на Северна Македонија и двајца хрватски државјани под сомнение дека во 19 наврати организирале нелегален премин на 166 странски државјани преку границата со Босна и Херцеговина и Словенија.
Осомничените на возраст од 28 до 50 години, од крајот на април до 15 октомври, договориле недозволено преминување на границата на странски државјани за пари.
Криумчарењето на мигрантите, кои на подрачјето на Петрова Гора нелегално влегле од БиХ во Хрватска, со непознати лица го договарале двајца државјани на Северна Македонија, по што со уште еден наш државјанин го организирале преземањето и превозот на мигрантите, соопшти УСКОК. Останатите осомничени возеле пред и зад возилата со кои се превезувале мигрантите со цел избегнување на полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сојузниците од НАТО треба да трошат по 5 отсто од БДП за одбраната, му рекол Рубио на Муцунски

Државниот секретар на САД, Марко Рубио на средбата со шефот на македонската дипломатија, Тимчо Муцунски, нагласил дека е неопходно сојузниците во НАТО да дадат поддршка и да постигнат 5 отсто издвојување за одбраната, соопшти Стејт Департментот во соопштение по средбата.
Двајцата ја потврдиле силната врска меѓу Соединетите Американски Држави и Северна Македонија и ги истакнале заедничките интереси во однос на регионалната стабилност, економската соработка и НАТО.
Тие разговарале и за можностите за проширување на економската соработка, вклучувајќи ја трговијата и инвестициите.
Муцунски по средбата соопшти дека е потврдено стратешкото партнерство со САД, а нашата држава продолжува да дава активен придонес како кредибилен сојузник, со инвестиции повеќе од 2 отсто од БДП во одбранбениот сектор.
Македонија
Пет месеци откако исчезна, Миле Тодоров виден кај планината Серта

Дваесет и осумгодишниот Миле Тодоров кој се води за исчезнат од јануари, наводно бил забележан додека се движел покрај планината „Серта“.
Во објава на социјалните мрежи, чијашто автентичност е потврдена од семејството и полицијата, се вели дека очевидец го забележал на планината Серта на релација Неготино-Штип. Бил ослабнат со долга коса и брада.
Се апелира доколку некој го забележи да пријави во МВР.
Миле последен пат бил виден на 30 јануари, годинава, во Марена, околу 10.30 часот. Во објавата за неговото исчезнување стои дека бил облечен во работничко одело, бело палто и црн елек.
Македонија
Арсовска да не дозволи да биде инструментализирана од структурите на ДУИ: Ганиу до градоначалничката на Град Скопје

Градоначалникот на Општина Чаир, Висар Ганиу, на денешната прес-конференција упати предупредување за загрижувачката состојба со управувањето на отпадот и јавните услуги во Чаир, истакнувајќи дека граѓаните се изложени на ризик од ширење на епидемии.
„Ние сме во 21 век, а се давиме во отпадоци. Чаир е дом за над 60 илјади граѓани кои заслужуваат основни услови за живот“, истакна тој.
Ганиу ја повика градоначалничката на Град Скопје, Данела Арсовска, да не дозволи да биде инструментализирана од структурите на ДУИ и итно да го ангажира ЈП „Комунална хигиена“. Тој ги критикуваше и политичките партнери од Сарај за водење на политичка кампања на грбот на граѓаните.
Во своето обраќање ги спомена и неисполнетите ветувања од страна на Градот, вклучително и паркот, булеварите, бесплатниот јавен превоз и инвестициите во Старата скопска чаршија.
„Чаир нема долгови кон Градот. Имаме подготвен план за чистење и дезинфекција, доволно е Градот да не блокира“, заклучи Ганиу, потенцирајќи дека општината останува отворена за институционална соработка и конкретни активности.