Свет
Милион луѓе уапсени на границата меѓу САД и Мексико

Еден милион луѓе се приведени во САД на границата со Мексико од октомври 2018 година досега, што е највисока цифра за 12 години, изјави шефот на американската гранична полиција.
„Операциите на југозападната граница на САД достигнаа речиси еден милион за фискалната 2019 година, што заврши кон крајот на септември”, изјави Марк Морган на прес-конференција во Вашингтон.
САД во 2019 година се соочуваат со нелегален влез од Мексико, пред сè граѓани на централна Америка кои бегаат од насилство и сиромаштија. Тој прилив предизвика криза на границата со преполни центри за прием и очајни санитарни услови. Приведувањата на границата достигнаа врв од 144.000 во мај. Оттогаш, бројот на приведени се намали на 52.000 во септември.
Администрацијата на претседателот Доналд Трамп, која дава приоритет во борбата против нелегалната имиграција, гради ѕид по должина на границата со Мексико од 3.200 километри. Вкупно, 115 километри се опремени со нов безбедносен систем кој вклучува физичка бариера, осветлување и патишта за патролирање, рече Марк Морган. Тој додаде дека до 2020 година, кога Трамп ќе излезе на гласање за втор мандат, очекува тој систем да биде продолжен на 700 километри од границата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Американскиот сенатор Греам: Го молам Ватикан да размисли Трамп да биде папа

Американскиот сенатор Линдзи Греам, републиканец од Јужна Каролина, во објава на „Икс“ напиша дека Трамп треба да биде новиот папа.
„Бев возбуден кога слушнав дека претседателот Трамп е отворен за идејата да стане следниот папа. Навистина би бил кандидат во сенка, но би ја замолил конклавата и католичките верници да бидат со отворен ум за оваа можност! Првата комбинација папа-претседател на САД има многу предности. Ние го следиме белиот чад… Трамп MMXXVIII!“, напиша тој на „Икс“.
Доналд Трамп вчера изјави дека би сакал да биде папа. „Би сакал да бидам папа. Тоа би бил мојот прв избор“, му рече американскиот претседател на новинар кој го праша за конклавата.
Тој продолжи нагласувајќи дека нема фаворит, но посочи дека Тимоти Долан, надбискупот на Њујорк, би можел да биде добар избор. „Не знам. Немам фаворит. Но, морам да кажам дека имаме кардинал од место наречено Њујорк кој е многу добар, па ќе видиме што ќе се случи“, рече Трамп.
Греам е познат по значајните промени во политичките ставови, особено во врска со Доналд Трамп и надворешната политика.
Европа
Осумнаесет општински службеници во Истанбул завршија во затвор

Турски суд затвори 18 службеници на градската власт во Истанбул поради обвиненија за корупција, продолжувајќи ја репресијата против опозицијата, поради која беше затворен и градоначалникот Екрем Имамоглу.
Имамоглу, главен политички ривал на претседателот Таип Ердоган и водечки на анкетите, беше затворен во март во очекување на судење по обвиненијата за корупција. Тој се соочува и со обвиненија за помагање на терористичка група.
Градоначалникот ги негираше сите обвиненија, а неговото апсење ги предизвика најголемите протести во Турција во последната деценија, економски превирања и обвинувања за политизирано судство. Владата ги отфрла овие тврдења и вели дека судството е независно.
НТВ објави дека 34 од 52 лица приведени за време на викендот биле ослободени со кауција. Турските медиуми пред четири дена објавија дека властите привеле десетици вработени во општина Истанбул како дел од правните истраги насочени кон Имамоглу, проширувајќи ја репресијата против опозицијата што започна кон крајот на минатата година.
Меѓу приведените се генералниот секретар, началникот на кабинетот на Имамоглу и претседателот и заменик-претседателот на Управата за водоснабдување и канализација.
Европа
Шведската полиција уапси осомничен за пукањето во кое загинаа три лица

Шведската полиција објави дека привела осомничено лице по пукањето во кое загинаа три лица во градот Упсала во вторникот.
Лицето е осомничено за убиство и е едно од неколкуте лица што се испрашуваат како дел од истрагата, изјавија полицајци за новинарите.
Пукањето се случило во фризерски салон во Упсала, додадоа тие.
Полицијата соопшти дека инцидентот се смета за изолиран и не е поврзан со големите прослави на Валпургиската ноќ, што се очекуваат во Упсала в среда.