Европската комисија размислува за воведување такса од 2 евра за пакет за пратки надвор од ЕУ купени преку онлајн-платформи, како што се кинеските „Шеин“ и „Тему“, изјави комесарот за трговија и економска безбедност, Марош Шефчовиќ.

Како што објави РТВЕ, станува збор за таканаречената управувачка такса, која би ги покривала трошоците за обработка на голем број мали пакети што влегуваат во ЕУ, а не за нов данок, прецизира Шефчовиќ за време на дискусијата во Комитетот за внатрешен пазар на Европскиот парламент.

Според написите, комесарот за трговија Марош Шефчовиќ пред Европскиот парламент претставил дека предложил надомест за ракување со пратки за „справување со предизвиците што ги претставуваат 4,6 милијарди пратки доставени директно до адресите на граѓаните годишно“. Според нацрт-предлогот на Европската комисија, според „Фајненшл тајмс“, за директна продажба до крајните корисници ќе се применува такса од 2 евра, а за пакетите што пристигнуваат во магацините ќе биде 0,50 центи.

Дел од приходите од таксата ќе се користи за покривање на трошоците за дополнителни царински проверки, а остатокот ќе оди директно во буџетот на ЕУ. Повеќе од 90 проценти од пратките доаѓаат од Кина.

Овој потег следува по сличен таков на САД, кои одлучија да го укинат својот режим de minimis, кој ги ослободуваше пратките во вредност помала од 800 долари од царина и документација.

Шефчовиќ на пратениците во Брисел им рече дека „огромниот бран пакети претставува сосема нов предизвик во однос на контролата, безбедноста и обезбедувањето усогласеност со стандардите“. На пазарот на ЕУ е забележано зголемување на бројот на опасни и несоодветни производи, а трговците во Унијата сè повеќе се жалат на нелојална конкуренција.

Шефчовиќ нагласи дека овие пратки создаваат огромен товар за царинските службеници. „Не би ја сметал оваа такса како данок, туку, едноставно, како надомест на трошоци што платформите треба да ги платат“, додаде тој.
Според податоците собрани од „Фајненшл тајмс“, само Холандија и Белгија, како главни логистички центри на ЕУ, минатата година примиле повеќе од една милијарда пакети.

Ана Кавацини, пратеничка од германските Зелени и претседателка на парламентарниот Комитет за внатрешен пазар, го поддржа планот. „Важно е да се воспостави контрола. Ова ќе ги охрабри продавачите повторно да се обратат во магацините, како што правеа претходно. На царината многу им е полесно да проверуваат примероци од поголема пратка отколку од поединечни артикли“, изјави таа за „Фајненшл тајмс“.

„Тему“ и „Шеин“ сè уште не ги коментираа овие најави.

Се очекува земјите членки да го вклучат овој надоместок во поширок пакет-реформи на царинските правила, што вклучува построги контроли и подобра координација во рамките на единствениот пазар. Како дел од реформата ЕУ планира да го укине сопственото ослободување de minimis за пратки помали од 150 евра. Ова би ги принудило платформите да се регистрираат за ДДВ, со што првпат ќе преземат одговорност за квалитетот на стоките како увозници.

Предлогот беше презентиран на Комисијата минатата недела од страна на комесарот за буџет, Пјотр Серафин, како една од опциите за зголемување на приходите на буџетот на ЕУ.

Со новиот закон за привремено и сезонско ангажирање лица, кој вчера беше изгласан во Собранието, работодавците ќе може да ги пријават своите сезонски или работници ангажирани на одреден период.

Како што појасни Бојан Стојаноски, пратеник од пратеничката група на ВМРО-ДПМНЕ и коалицијата „Твоја Македонија“, со ова се создаваат и услови работниците да добијат пензиски и здравствени придонеси за својот труд, а државата да ги наплати давачките што сега се во сивата економија.

„Она што особено радува е што лицата ангажирани во согласност со овој закон нема да изгубат веќе стекнати права, како социјална помош, надомест поради невработеност, семејна или старосна пензија, како и стипендија или правото на редовни студии. Во оваа законска категорија граѓани спаѓаат пензионерите, студентите, сезонските работници, а особено оние ангажирани во земјоделството, овоштарството, угостителството и во сервисните дејности, невработените, но и вработените, лица помлади од 18 години, кои ги исполнуваат условите за работа, како и странците со регулиран престој“, рече Стојановски.

Според него, ова иновативно законско решение предвидуваа софтверска платформа. Дигитален регистар, кој ќе ги спојува работодавецот, работникот и институциите, а притоа создава услови за ефикасно спроведување на законот.

Стојаноски додаде дека оваа платформа ќе биде финансирана со грант од Германија.

Во текот на минатата недела, царинските службеници открија повеќе обиди за криумчарење разна стока, при што привремено се задржани цигари, никотински ќесички, електронски цигари, тутун, автоделови, лекови за животни, облека, украсни производи, производи за сценски ефекти, девизи и фалсификати.

Во контроли на влез во државата на граничен премин Богородица, Табановце како и во внатрешноста на државата, спречени се обиди за криумчарење тутун, при што запленети се 53 штеки цигари, 19 килограми режан тутун, како и 480 никотински ќесички, за коишто сторителите требало да платат вкупни давачки од 355 илјади денари.

Во два одвоени случаи, при контрола на два камиони пријавени за влез во државата на граничниот премин Богородица откриени се 24 штеки цигари без акцизни маркички.

Во првиот случај, под тапацирите во кабината на камион со бугарски регистарски таблички кој бил управуван од македонски државјанин, пронајдени се 12 штеки цигари.

Во вториот случај, во две ќеси сместени во просторот кај моторот на влекач со македонски регистарски таблички, управуван од македонски државјанин, пронајдени се 12 штеки цигари, соопшти Царинската управа.

„На влез во држвава на граничниот премин Табановце во патничко комбе управувано од страна на македонски државјанин пронајдени се 480 никотински ќесички од 14 гр од 13 гр, како и 120 електронски цигари со никотин од 50 мг.
Мобилни царински тимови на влез во држвава на граничниот премин Богородица запленија 20 штеки цигари без акцизни маркички. Цигарите се пронајдени сокриени во фабричка празнина позади управувачката табла и во преграда за алат под долниот кревет во кабината на камион.

На граничниот премин Богородица од страна на Службата за мобилни скенери во фабричка празнина во горниот дел на кабината на влекач со македонски регистарски таблички откриени се 9 штеки цигари без акцизни маркички. Мобилен царински тим во соработка со полициски службеници заплени околу 19 килограми режан тутун, пронајден при контрола на автомобил во близина на Арачиново. Против сторителот ќе биде поведена соодветна постапка пред надлежен суд.

60 литри моторно масло и 20 филтри за возила се пронајдени во неколку картонски кутии и две ќеси сместени во багажникот и на задното седиште на автомобил кој се пријавил за влез во државата на граничниот премин Дојран.

Царински службеници на граничен премин Дојран во соработка со припадници на граничната полиција Frontex спречија обид за шверц на 94 парчиња облека. Стоката е пронајдена при контрола на автомобил кој се пријавил за влез во државава на граничниот премин. Истата сторителот ја сокрил на повеќе места – кај резервната гума, кај моторот, под задните и предните седишта, под патосниците и во багажниот простор. Непријавената облека е запленета, а против сторителот ќе биде поведена соодветна постапка.

Мобилен царински тим при контрола на автомобил што го управувал турски државјанин на граничен премин Блаце откри непријавени 93 разни производи меѓу кои уметнички слики, украси обувки и производи за домаќинство.

Производи за сценски ефекти (100 пакувања од 200 грама композитен титаниум за сценски ефект и 144 садови со течност за огнен ефект) се пронајдени при контрола на збирна стока која била со потекло од Кина, а наменета за увозник од Скопје. Стоката била пријавена за увозно царинење во царинската испостава Гевгелија и истата не била опфатена во царинските документи“.

Од страна на царински службеници на граничниот премин Блато под седиштата на автомобил со македонски регистарски таблички со кој македонски државјанин се пријавил за влез во државата откриени се 20 вакцини за животни Poliovin од 100 ml за кои е потребна дозвола за увоз.

Мобилен царински тим при личен претрес на патник, македонски државјанин, откри 5.200 евра што истиот сакал нелегално да ги изнесе од државата преку граничен премин Богородица. Патникот со себе носел 7.200 евра, при што вратени му се 2 илјади евра, износ што резидент може слободно да го изнесе од државата, додека останатите девизи во износ од 5.200 евра се привремено задржани.

348 парчиња детски играчки (возила, топки и ракавици) со ознаки на заштитени трговски марки се задржани поради сомневање дека повредуваат права од интелектуална сопственост. Стоката е откриена од страна на мобилните царински тимови при контрола на камион натоварен со стока со потекло од Кина, а наменета за увозник од Струмица, пријавен за влез во државата на граничниот премин Богородица.