Македонија
(Видео) Прашањето за разрешувањето на Мојсовски е завршена приказна, а тој гледа тенденции во постапката што ја водеше антикорупциската за ваучерите

Директорот на Агенцијата за млади и спорт, кој ја тужи антикорупциската, очекува институцијата да одговара за клевета. Според него, тој не му штети на спортот и не злоупотребува пари, туку му помага. Според него, антикорупционерите се тенденциозни.
„Постапката, како што споменавте, дојде до контратужба од моја страна. Владата се произнесе негативно. Обвинителство се произнесе негативно. Се гледаат тука тенденциозни работи, кои, дефинитивно, се ставени од други вработени, кои беа претходно во Агенцијата за млади и спорт. Ова што ние сакаме да го направиме со спортот е знак дека не сакаме да злоупотребиме државни пари, туку е помагање на спортот“, рече Мојсовски.
Негово разрешување нема да има, а очекува изјаснување на сите страни, со што оваа тема ќе биде затворена.
„Се надевам дека многу бргу ќе се изјаснат и другите фактори на ова и ќе покажеме дека сме во функцијата на граѓаните, а не како што спомена ДКСК“, додаде Мојсовски.
Претходно, ДКСК побара одговорност од Мојсовски и членовите на централната комисија поради основани сомнежи за злоупотреба и непочитување на ваучер-системот на финансирање фондации и спортски клубови во периодот од 2020, 2021 и 2022 година. Предметот се работел две години. Потоа Мојсовски поднесе тужба против нив.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош и Аеродром денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.30 часот, корисниците од улицата Франце Прешерн, општина Карпош;
– во периодот од 09.00 до 13.00 часот, корисниците од улиците Симеон Кавраков, Петар Ацев и Анастас Митрев, општина Аеродром.
Македонија
Сончево со умерена облачност, попладне нестабилно со пороен дожд и грмежи

Сончево со мала до умерена облачност. Ќе дува умерен, а во северните делови засилен северен ветер, кој ќе предизвика опаѓање на дневната температура за 3 до 5 степени. Попладне ќе има локален развој на нестабилна облачност со пороен дожд и грмежи. Минималната температура ќе биде во интервал од 12 до 19, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува умерен, а попладне засилен северен ветер. Минималната температура ќе се спушти до 17, а максималната ќе достигне до 32 степена.
Времето во наредните денови
Од денеска до среда во попладневните часови ќе има развој на нестабилна облачност со локален пороен дожд и грмежи. Потоа ќе преовладува претежно стабилно време, а дневните температури ќе бидат без промени.
Македонија
(Фото) Успешна евакуација на повредено лице со хеликоптер на Армијата

Вчера, во попладневните часови, по добиено барање од Центарот за управување со кризи (ЦУК), Армијата на Република Северна Македонија, поради сериозноста на повредите и непристапниот терен, изврши итна медицинска евакуација со хеликоптер од вВИНГ, на лице кое паднало во провалија во близина на Ливадичко Езеро, Шар Планина.
Повреденото лице, при падот, се здобило со скршеници на раката, ногата и колкот, како и со обилно крварење, поради што било во критична состојба. На лице место интервенираше екипаж- тим на парамедици, кои и покрај непристапниот терен успешно го извлекоа и имобилизираа повредениот.
„Армијата во координација со ЦУК и здравствените установи изврши успешна медицинска евакуација и го предаде повреденото лице на екипа од итната медицинска помош, по што истото беше транспортирано на понатамошен болнички третман.
Армијата на Република Северна Македонија, заедно со останатите институции во државата продолжува да дејствува во интерес на граѓаните, обезбедувајќи навремена и професионална поддршка“, се наведува во соопштението на Генералштабот на Армијата