Македонија
Светски ден на крводарителствотo: Да ја покажеме својата хуманост грижејќи се едни за други

По повод 14 јуни, Светскиот Ден на крводарителството, Министерството за здравство упати повик до граѓаните и во иднина да ја покажуваат својата солидарност и човечност грижејќи се едни за други.
Како што истакуваат од ресорното министерство, дарувањето крв спасува животи и го подобрува здравјето, а е доброволно, анонимно и бесплатно. Секоја здрава личност на возраст од 18-65 години може да биде крводарител. Крв може да дарува и лице под 18 години со дозвола од родителите или законскиот застапник, односно старателот.
„Граѓаните кои сакаат да донираат крв, тоа можат да го направат во Институтот за трансфузиона медицина, секој работен ден од 08:00 до 18:00 часот и во сабота од 08:00 до 14:00 часот. Во Даре Џамбаз, може да се дарува крв секој работен ден од 10:00 до 17:00 часот, а во сабота од 09:00 до 14:00 часот. Дарителите можат да даруваат крв и на акциите организирани со мобилни екипи, чиј распоред се објавува на веб-страницата на Институтот“, објаснуваат од министерството за здравство.
Информации за распоредот на крводарителски акции сите заинтересирани можат да добијат и на телефонскиот број (02) 3226-923, локал 125 при Институтот за трансфузиона медицина.
Службите за трансфузиона медицина се наоѓаат во кругот на општите и клиничките болници низ градовите во државата, така што граѓаните може да даруваат крв и на тие места.
Министерството за здравство, секоја година изготвува посебна програма за организирање и унапредување на крводарителството во државата. За 2019 програмата изнесува вкупно 25 милиони денари и зголемена е за 10 милиони денари во однос на минатата година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЛДП: Банкарските такси паѓаат под наш притисок, но нема да запреме со борбата против неправедните провизии

Граѓаните преку Либерално-демократската партија (ЛДП) го извојуваа првиот чекор – намалување на тарифниците за банкарски услуги, што произлегува како директен резултат од спроведената кампања „Твоја сметка – твои пари“ и јавниот притисок во интерес на граѓаните, велат од партијата.
Оттука сметаат дека ова е важен и исправен чекор напред, кој покажува дека кога институциите имаат слух, а политиката се води во служба на граѓанинот, резултатите не изостануваат.
„Го охрабруваме гувернерот на Народната банка да продолжи со реформскиот курс и уште похрабро да застане зад иницијативите за укинување на низа неосновани банкарски надоместоци и провизии што постојат само во нашата земја, а се непознати во модерните европски банкарски системи. Македонските граѓани и понатаму плаќаат провизии за затворање на сметки, за проверка на состојба, за повлекување пари од друг банкомат, за онлајн плаќања и електронски пристап – трошоци кои во најголем дел од земјите членки на Европската Унија се укинати или се сведени на минимум. Време е оваа неправда да престане“, велат либералите.
Во таа насока, ЛДП три пати поднесе измени на Законот за платежни услуги и платни системи до Собранието. Предложените измени предвидуваат укинување на банкарски надоместоци за кои нема никаква реална основа и кои само дополнително го оптоваруваат животниот стандард на граѓаните. Очекуваат сите пратеници, без оглед на политичката припадност, конечно да застанат зад граѓанскиот интерес и да дадат поддршка на измените.
Македонија
Гори во Радовиш, Берово, Прилеп – активни седум пожари, три под контрола

Во текот на измнинатото деноноќие на територијата на државата евидентирани се вкупно 27 пожари на отворен простор. Од нив, седум се активни, три се под контрола, а седумнаесет се изгаснати.
Активни пожари има на неколку локации. Во општините Василево, Радовиш и Берово, во селото Нивичино, на планините Голем Готен и на Малешевските Планини гори нискостеблеста шума, смрека, грмушки и ниска вегетација. Во општина Прилеп, кај селото Бешиште, во местото наречено Бешишки Рид, пожарот се шири кон селото Градешница (општина Новаци) и кон границата со Република Грција, каде што не се интервенира поради детонации. Активен пожар има и меѓу селата Царевиќ, Смолани, Радобил и Дрен во општина Прилеп, како и селата Галиште и Трстеник во општина Кавадарци, каде што гори мешана шума и ниска вегетација. Во општина Македонски Брод гори деградирана дабова шума меѓу селата Црешево, Локвица и Крапа. Во селото Ќосевица, општина Македонска Каменица, активен е пожар во борова шума. Пожар е активен и во селото Ореше во општина Чашка, каде што гори букова шума и ниска вегетација, како и во селото Горно Црско во општина Кичево, каде што е зафатена ниска вегетација и ниска шума.
Под контрола се три пожари: во селото Грешница во општина Македонски Брод, каде што гори мешана шума и сува трева, потоа меѓу селата Драгоево и Селце во општина Штип, каде што е зафатена нискостеблеста шума, прнар и сува трева, како и во селото Јунузлија во општина Карбинци, каде што гори шума.
Изгаснати се вкупно 17 пожари на разни локации. Во општина Битола, на улицата Игњат Атанасовски, горела ниска вегетација. Во општина Василево, кај селото Босилово, бил зафатен пожар на депонија. Во селото Умин Дол во општина Куманово горела ниска вегетација, исто како и во населбата Бедиње. Во село Горно Лакочереј, општина Охрид, горело стрниште, а покрај автопатот Тетово – Скопје, во општина Тетово, исто така била зафатена ниска вегетација. Пожар имало и во селото Дебреше, општина Гостивар, во селото Годивје, општина Кривогаштани, каде што горела ниска вегетација и плевна, и во селото Долна Бела Црква, општина Ресен, на ѓубриште. Во општина Босилово, во селата Моносипитово и Банско, гореле депонии. Пожарот што почнал во селата Облавце, Бељаковце, Довезенце и Руѓинце во општините Старо Нагоричане и во Куманово се проширил и кон селата Димонце и Коњух во општина Кратово, каде што биле загрозени куќи и помошни објекти. Во село Нерав, општина Крива Паланка, горела висока борова шума. Во општина Илинден, меѓу селата Мршевци и Бучинци, горело стрниште, а во Катланово и село Чифлик, општина Петровец, била зафатена ниска вегетација, грмушки и дабова шума. Во општина Шуто Оризари, на улицата Брсјачка Буна, горело ѓубриште. Во општина Желино, меѓу селата Церово и Групчин, горела нискостеблеста и деградирана шума, а во селото Долно Перово, општина Ресен, биле зафатени елови дрва, врби, трска и сува трева.
Македонија
Кривична против директорка во Виница, си ја вработила ќерката во истото училиште иако немала соодветно образование

Полицијата поднесе кривична пријава против Г. С. (45) од Виница, директорка во основно училиште во овој град, поради несовесно работење во службата.
„На 27 јануари пријавената склучила договор за вработување со својата ќерка С. С., иако немала соодветно образование, на работно место предметен наставник по математика во основно училиште“, соопшти МВР.
Од тука велат дека со тоа му била нанесена штета на буџетот на училиштето на име исплата на плати во износ од 245.666 денари.