Регион
Хрватска забрани летови од Велика Британија поради новиот коронавирус

Хрватска им се приклучи на европските земји што ги прекинаа воздушните врски со Велика Британија поради новиот вид коронавирус, кој рапидно се шири во земјата.
„Хрватска како мерка на претпазливост привремено ќе го прекине воздушниот сообраќај на патниците од Велика Британија за 48 часа сè додека не бидат специфицирани информации за евентуален нов вид вирус“, објави премиерот Андреј Пленковиќ на „Твитер“. „Приоритет е да се заштити здравјето на граѓаните“, додаде тој.
Слични мерки беа воведени претходно од Франција, Ирска, Германија, Австрија, Бугарија, Холандија и од Италија. Забраната може да ја воведе целата Европска Унија бидејќи во тек се консултации за заеднички одговор на поморските, железничките и на патните врски со Велика Британија.
Емануел Макрон, Ангела Меркел, Урсула фон дер Лаен и Чарлс Мишел разговараа на оваа тема. Британската влада одлучи да воведе строги мерки за Лондон и за југоистокот на Англија погодувајќи ги со тоа плановите за божикни собири во обид да се спречи ширењето на инфекцијата за која се вели дека е нов вид коронавирус.
Надвор од Велика Британија, неколку случаи се пријавени во Данска (9) и по еден во Холандија и Австралија, објави Светската здравствена организација (СЗО). Агенцијата на ООН посочува дека новиот вид, според првите информации, може да биде заразен, но дека нема докази за промена на тежината на болеста, иако ова сè уште се истражува. СЗО ќе обезбеди повеќе информации веднаш штом има појасна слика за карактеристиките на новиот вид, рече портпарол на СЗО за Европа.
„Во Европа, каде што вирусот бргу се шири, земјите треба да ги засилат контролата и превенцијата“, соопшти агенцијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Видео) Невреме во Црна Гора: Сè беше забелено

Невремето што денес ја погоди околината на Колашин во Црна Гора донесе неочекувани сцени за првиот дел од август, сè е покриено како со бела покривка, пишуваат медиумите во регионот.
Сепак, според написите, не станува збор за снег, туку за град што падна низ целата област.
Според проценките, на некои места слојот на град достигнува и до 15 сантиметри.
Овој августовски пејзаж е вистинска реткост во овој дел и не се памети во поновата историја, пренесуваат медиумите.
Дел од скијачките патеки исто така беше покриен со град, а невремето предизвика значителни штети на планинските патишта, што претставува дополнителен предизвик за локалните жители и туристите.
Фото: принтскрин
Регион
Петгодишниот брат ја застрелал малолетната сестра со пушка: децата си играле во семејната куќа во БиХ

Викендов се случил инцидент во БиХ кога петгодишен брат ја застрелал својата малолетна сестра (4) за време на игра.
Обвинителството потврди за Hercegovina.info дека дежурниот обвинител, Јосип Аничиќ, бил информиран за инцидентот и наредил да се спроведе истрага на местото на инцидентот.
– Според моментално достапните информации, братот (5) и сестрата (4) си играле во семејната куќа кога дошло до пукање од воздушна пушка – изјави портпаролката на обвинителството, Петруњела Матијевиќ, за Hercegovina.info, пренесува Srpskainfo.
Таа додаде дека полицајците, по наредба на обвинителот, се во фаза на испрашување на сведоците, со цел да утврдат како пушката се нашла на дофат на децата и кој ја оставил таму.
Според информации на медиумите во регионот, девојчето е добро и стабилно и без сериозни последици.
Фото: Принтскрин
Регион
Поранешниот хрватски премиер, Иво Санадер, излезе од затвор

Иво Санадер, поранешен лидер на ХДЗ и премиер на Хрватска, е ослободен од затвор пред да ја отслужи целата казна. Санадер беше условно ослободен од затворот Липовица откако отслужи две третини од казната, објавија хрватските медиуми.
Како што објасни адвокатот Драган Црнковиќ, исполнети се сите законски услови за поранешниот премиер да биде ослободен. Тој рече дека покрај неговата возраст, една од причините наведени во барањето за ослободување е неговата здравствена состојба, но тоа не се главните причини, забележува тој, туку и фактот дека тој го почитува член 59 од Кривичниот законик. Тој истакнува дека на 15 август 2023 година отслужил половина од казната.
Ќе биде должен да се јавува во полиција секој месец и нема да му биде дозволено да го менува местото на живеење и привременото живеалиште.
На прашањето на новинарите дали тоа значи дека ќе има ограничено движење, тој одговори негативно.
„Не знам, може да го запали автомобилот, да оди во Сплит. Само ако има намера трајно да го промени местото на живеење и живеалиштето, мора да добие дозвола“, објасни адвокатот Црнковиќ.
Фото: ЕПА