Свет
Чарлс Купермен ќе го наследи Болтон

Вршител на должноста американски советник за национална безбедност ќе биде Чарлс Купермен, поранешен заменик на Џон Болтон, јави Би-би-си повикувајќи се на извори во Белата куќа.
Откако американскиот претседател Доналд Трамп објави на „Твитер“ дека го разреши советникот за национална безбедност, се појавија информации дека Трамп и Болтон имале несогласувања за голем број предизвици во надворешната политика, од Авганистан до Иран. Многумина во Белата куќа не беа задоволни од однесувањето на Болтон.
„Болтон работи одделно од остатокот од Белата куќа“, изјави поранешен функционер на администрацијата на Трамп. Според него, Болтон не присуствувал на состаноците и ги следел своите иницијативи.
Американскиот претседател Доналд Трамп и досегашниот советник за национална безбедност, Џон Болтон, имале жестока караница за планот на Трамп да ги прими лидерите на талибанците во Кемп Дејвид, пренесе Си-ен-ен повикувајќи се на два неименувани извора запознаени со настаните.
Американската телевизија наведува дека не е јасно дали расправата се водела преку телефон или во живо. Си-ен-ен пренесува и наводи и на неименувани извори од опкружувањето на Трамп дека Болтон со месеци иритирал луѓе не само поради различните политички ставови, туку и поради начинот на однесување.
Изворот прецизирал дека Болтон ги иритирал функционерите во Белата куќа со своите тактики, стилот и храбрите настапи. На пример, како што рекол изворот, Болтон патувал со многу членови од персоналот, понекогаш не со истиот авион како претседателот и се однесувал речиси како да е државен секретар. Си-ен-ен додава дека Болтон не бил во судир само со Мајк Помпео, туку дека не го поднесувал ниту шефот на персоналот на Белата куќа, Мик Малвени.
Многу од функционерите, како што наведува телевизијата, за оставката на Болтон дознале од твитот на Трамп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Зеленски: Русија со ракети од Северна Кореја го нападна Киев

Украинскиот претседател Володимир Зеленски рече дека прелиминарните информации укажуваат дека балистичка ракета произведена во Северна Кореја била употребена во рускиот воздушен напад врз Киев што беше извршен завчера, а во која загинаа најмалку 12 лица.
„Според прелиминарните информации, Русите користеле балистичка ракета произведена во Северна Кореја. Нашите специјални служби ги проверуваат сите детали“, рече тој.
Доколку се потврди дека ракетата е произведена во Северна Кореја, тоа, според него, ќе биде уште еден доказ за криминалната природа на сојузот меѓу Русија и Пјонгјанг.
„Тие убиваат луѓе и уништуваат животи заедно – тоа е единственото значење на нивната соработка. Русија континуирано користи такво оружје – ракети, артилерија. За возврат, Пјонгјанг добива можност да го усоврши своето оружје во реални воени услови“, рече Зеленски.
Тој повика на „вистински притисок“ врз Русија да ги запре нападите врз Украина.
„Дури и покрај меѓународните дипломатски напори за завршување на војната, Русија продолжува да убива цивили“, рече Зеленски. „Тоа значи дека Путин не се плаши од ништo“, додаде тој.
Нагласи дека мора да има целосно и безусловно запирање на нападите и дека Русија мора да се согласи со тоа.
„Оваа војна мора праведно да заврши. А за навистина да ја гарантираме безбедноста на нашите луѓе, мора дополнително да го зајакнеме нашиот противвоздушен штит“, рече украинскиот претседател.
„Државите соработници кои ги ценат луѓето и животот мора да ги спречат убиствените сојузи“, додаде тој.
Свет
Руте: Русија е долгорочна закана за алијансата

Генералниот секретар на НАТО, Марк Руте, вчера, по разговорите со американскиот претседател Доналд Трамп, изјави дека членовите се согласуваат дека Русија е долгорочна закана за алијансата, пренесува ДПА.
„Сите се согласуваме во НАТО дека Русија е долгорочна закана за територијата на НАТО – за целата евроатлантска област“, рече Руте по состанокот во Белата куќа.
На прашањето за можноста за договор меѓу Русија и Украина, поранешниот холандски премиер рече дека во моментов „нешто е на маса“, но дека топката сега е на теренот на Русија. Генералниот секретар на НАТО е уверен дека САД ќе ги предводат напорите за завршување на војната во Украина.
„Не гледам ситуација во која САД ќе си заминат. Гледам ситуација во која, под водство на претседателот Трамп, ова може да се доведе до позитивен крај, а тоа е многу важно“, рече Руте. Лидерите на НАТО ќе се состанат во Хаг кон крајот на јуни.
Свет
Трамп: На Украина ќе ѝ биде многу тешко да го врати Крим

Доналд Трамп коментираше за прашањето на Крим откако се појави информација дека неговиот мировен план вклучува признавање на руската контрола врз територијата од страна на САД.
Тој рече дека Украина „изгубила многу територија“ за време на војната, додавајќи: „Ќе направиме сѐ што можеме работејќи со Украина“.
Зборувајќи конкретно за Крим, Трамп изјави дека територијата била „предадена“ додека Барак Обама бил претседател. „Тоа нема никаква врска со мене“, рече Трамп.
Сепак, тој додаде дека ќе биде „многу тешко“ за Украина да го врати Крим.
Потоа американскиот претседател нагласи дека „нема лојалност кон никого“, туку дека има „лојалност кон спасување животи“.
„Мислам дека ќе постигнеме договор“, рече тој, додавајќи: „Мислам дека сме многу блиску до договор“.