Македонија
Јанева: Разговарам со сите обвинети за да извлечам што повеќе информации, но во ниеден момент не сум тргувала со влијание

„Ја слушнав снимката објавена на порталите поврзана со случувањата за случајот ‘Рекет’. Фрапирана сум како моите постапки како специјален јавен обвинител се донесуваат во каква била корелација со случајот ‘Рекет’. Како специјален јавен обвинител моја обврска е да контактирам со сите осомничени, како и со други лица во врска со кривичните постапки кои се водат во ова Јавно обвинителство и од сите нив да се обидам да извлечам што поголем број информации како би ја подобрила позицијата во контекст на осомничените за секоја истрага/предмет поединечно”, се вели во изјавата на специјалната обвинителка Катица јанева, која неодамна поднесе оставка на фунцијата.
Јанева вели дека разговарала за зголемување на степенот на соработка со осомничените, за откривање нови сознанија во корист на истрагата. „Поточно, за подобрување на нашите позиции како јавни обвинители, но во никој случај и во ниеден момент не сум тргувала со никакво влијание, не сум ја злоупотребила својата функција и не сум постапувала спротивно на законот. Обвинител е секогаш обвинител, па и кога разговара со осомничени по телефон, а за ваква изјава во тој момент имаше оправдана причина.
Ги повикувам истражните органи што е можно побргу да ја завршат истрагата, да ги приберат сите докази и да ги завршат сите форензички вештачења поврзани со случајот „Рекет“, за целосно расчистување на овој случај и обелување на моето име”, вели Јанева.
Според неа, откако ќе бидат презентирани десетината истраги подготвени за брзо процесирање, од страна на СЈО многу нешта ќе бидат појасни за јавноста.
„Во тие истраги се осомничени и се надевам дека ќе бидат обвинети многу поранешни и сегашни функционери во власта и значајни личности во партиите, па од таму е јасно зошто некој со сите сили и со невидена медиумска хајка се обидува да го загрози мојот и кредибилитетот на СЈО, како и на сите други обвинители, а со тоа се обидува да ги уништи кривичните предмети кои се водат во обвинителството. Се надевам дека тоа нема да се случи.
Очекувам пратениците на седница на Собранието, во најбрз можен рок да го донесат Законот за ЈО на РСМ. Откако ќе се вратат сите обвинители од ЈО од годишен одмор, пред донесување на законот за ЈО, ќе има целосен отчет за досега сработеното во врска со истрагите и предистрагите кои се водат во СЈО. Тоа е моја обврска и задача што ќе ја презентирам пред јавноста и надлежните институции, со што ќе бидат отстранети сите евентуални притисоци кои би можеле да ги имаат обвинителите во СЈО кои и досега си ги работеа сите кривични предмети, се разбира во заедничка координација со мене. Потоа очекувам овие предмети кои се во СЈО да продолжат да се работат од страна на надлежното обвинителство, со што ќе се продолжи борбата против корупцијата и борбата за владеење на правото”, се додава во изјавата на Јанева.
Италијанскиот весник „Ла верита” откако изутринава објави уште еден текст со нова снимка од разговори меѓу Јордан Камчев и Бојан Јовановски, познат како Боки 13, ги направи достапни за јавноста и сите други разговори кои ги поседува. Аудиодокументација во траење од над 12 минути утрово беше објавена на „Јутјуб“ и во неа се пренесуваат серија разговори меѓу Јордан Камчев, Бојан Јовановски, Зоран Милевски поврзани со случајот „Рекет“, а во еден момент се појавува и гласот на специјалната јавна обвинителка Катица Јанева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: СДС е симбол на криминал, Владата е стабилна и работи на економски раст

Од ВМРО-ДПМНЕ велат дека слободното изразување мислење и став за различни проблематики за СДС е непознат поим. Во нивното соопштение се наведува дека од партија која на таканаречени внатрепартиски избори настапува со еден кандидат, без можност членовите да избираат, ништо друго и не може да се очекува.
„Во владината коалиција владее демократија каде што секој има право на свое мислење, слободно изразување и партиско делување,“ велат од ВМРО-ДПМНЕ.
Од партијата нагласуваат дека Владата предводена од ВМРО-ДПМНЕ посветено работи на враќање на функционалноста на институциите на системот, кои, како што велат, биле целосно уништени за време на владеењето на СДС.
„Нешто што се рушело и разградувало седум години не може преку ноќ да се среди, но полека, но сигурно, системот се враќа во функција,“ истакнуваат од ВМРО-ДПМНЕ.
Во соопштението се потенцира дека економскиот пустош што го оставила претходната власт влијаел на стандардот на граѓаните, но дека со посветена и чесна работа Владата успева да го запре слободниот пад на економијата.
„Економијата заживеа, што го потврдуваат податоците на институциите – последниот квартал од минатата година заврши со раст на БДП од 3,2 проценти. Платите и пензиите се покачуваат, растат директните странски инвестиции и се вложува во капитални проекти,“ соопштуваат од ВМРО-ДПМНЕ.
Воедно, од партијата додаваат дека единствената работа што функционирала за време на седумгодишното владеење на СДС и ДУИ биле криминалот и корупцијата.
„Тоа не го тврдиме само ние, туку го потврдуваат и надлежните институции. Нема област каде што ќе се направи ревизија, а да не излезе форма на организиран криминал и корупција од времето на претходната власт,“ велат од ВМРО-ДПМНЕ.
На крајот, од владејачката партија порачуваат дека Владата е стабилна, функционална и целосно посветена на обезбедување економски раст и подобар животен стандард за сите граѓани, додека, како што велат, СДС останува симбол на криминал, корупција и предавства.
Македонија
Левица: Стан во Центар од 1 денар, куќа од 28 денари, еве што пријавиле функционери од ВМРО-ДПМНЕ

Левица најостро ја осудува праксата на непрофесионално и паушално пополнување на анкетните листови за имотна состојба од страна на функционерите на ВМРО-ДПМНЕ, нарекувајќи го тоа флагрантно потценување на законските обврски и грубо поткопување на транспарентноста и интегритетот на јавните функции.
Согласно Законот за спречување на корупцијата и судирот на интереси, функционерите се должни до Државната комисија за спречување на корупција (ДКСК) да достават анкетни листови, односно детално да го пријават својот имот и имотот на нивните семејства, како и секоја промена која ќе настане за време на нивниот мандат. Сепак, и без да се познаваат личните финансиски прилики на функционерите на ДПМНЕ, јасно се забележуваат бројни паушални податоци, неправилности и несоодветно исполнување на законската обврска.
Според јавно достапните податоци, министерот за култура и туризам, Зоран Љутков, има пријавено пет недвижнини. Помеѓу нив се издвојува неговиот стан во Банско, како и: стан во Карпош од 38 квадратни метри со вкупна вредност од 2,39 денари; куќа во Габрово со површина од 315 квадратни метри со вкупна вредност од 28 денари и двор од 44 квадратни метри со вкупна вредност од 1,5 денари, сето тоа на име на неговиот брачен другар. Дополнително, брачниот другар поседува и стан во Карпош од 55 квадратни метри вреден 3,5 денари.
Пратеничката од ДПМНЕ, Бети Стаменкоска – Трајкоска, и покрај тоа што пријавила кредит, како сопственик се јавува само на акции стекнати уште во 2005 година во Стопанска банка, Макстил и ЗК Пелагонија. Следејќи го примерот на нејзините родители кои исто така поседуваат голем имот во акции, таа има пријавено три моторни возила, сите на име на нејзиниот брачен другар. Недвижниот имот е на име на нејзините родители, а пријавила и градежно земјиште од 134 квадратни метри во вредност од 0 денари. Иако според законите е должна да пријави целиот имот на нејзиното семејство, нема податоци за банкарски сметки.
Пратеничката Иванка Василевска, пак, во својот анкетен лист навела дека поседува стан во Центар со површина од 99 квадратни метри и вредност од само 1 денар.
Во вакви услови се поставува логично прашање: зошто ДКСК го толерира ова флагрантно непочитување на законските обврски? Отсуството на сериозна проверка и адекватно постапување од страна на ДКСК не само што ја поткопува довербата во институциите, туку ја охрабрува и понатамошната пракса на прикривање на реалниот имот на носителите на јавни функции. Корупцијата не се спречува со затворање на очи пред ваквите манипулации, потенцира Левица.
Партијата најавува дека во наредниот период јавно ќе ги објавува сите неправилности и забелешки поврзани со пријавениот имот на носителите на јавни функции, со цел да ја поттикне ДКСК на соодветно постапување.
„Бараме итна ревизија на анкетните листови на сите функционери и процесуирање на сите кои со неточни или лажни податоци ја изигруваат законската обврска!“, се наведува во реакцијата на Левица.
Македонија
Муцунски: Дипломатскиот пасош не ѝ дава имунитет на претседателката на ДКСК

Актуелната претседателка на Државната комисија за спречување на корупцијата (ДКСК), Татјана Димитровска, која е осомничена за оддавање службена тајна во случајот „Адитив“, не смее да има контакт со предмети, пошта и друга документација поврзана со работењето на Антикорупциска. Дополнително, таа нема право да гласа или да врши распределба на предмети.
Димитровска завчера беше изведена пред Судија на претходна постапка во Основниот кривичен суд во Скопје. Судијата, постапувајќи по предлогот на Обвинителството, ѝ определи мерки за претпазливост, вклучително и забрана за преземање на одредени работни активности.
Минатата година, Татјана Димитровска доби дипломатски пасош од Министерството за надворешни работи, со што ѝ беше овозможено да патува без чекање на пасошка контрола при влез и излез од државата. Иако и останатите шест члена на Комисијата побарале ваква привилегија, не им била одобрена.
Министерот за надворешни работи, Тимчо Муцунски, во изјава за „Сител“ во емисијата „Тема на денот“, појасни дека поседувањето дипломатски пасош не носи автоматски имунитет и не може да влијае врз истрагата.
„Самиот дипломатски пасош на наш граѓанин не значи дека тој ужива било какви права поврзани со некоја форма на имунитет. Што значи дека истиот не може да влијае на самата постапка која се спроведува од нашите органи и во моментот кога ќе престане функцијата на таа поединечна личност, секако МНР ќе го одземе тој дипломатски пасош“, изјави Муцунски.
Тој додаде дека, иако постои презумпција на невиност, од морални и етички причини Димитровска треба да поднесе оставка.
„Логично е кога сте опфатени со ваков тип на постапка, почитувајќи ја и презумпцијата на невиност, ова го велам пред сѐ како човек, не како министер – логично е да дадете оставка. Тоа не треба, според мене, да влијае на кредибилитетот на сите останати членови на таа комисија“, истакна Муцунски.