Министерството за здравство, со поддршка од Владата на Република Кореја, преку грант за помош обезбеди осум современи електрични возила, со инсталација на станици за електрично полнење.

– Заедно со амбасадорот на Република Кореја, Донг-бае Ким, денеска, извршивме примопредавање на првите три возила од грантот, а до крајот на месецот очекуваме да пристигнат уште пет возила, со што целосно ќе се реализира донацијата од вкупно осум електрични возила. Оваа значајна поддршка од Република Кореја претставува важен чекор во зајакнување на институционалните капацитети и ќе овозможи поефикасно, поекономично и еколошко функционирање на инспекциските служби, изјави министерот за здравство, Азир Алиу.

Во рамки на примопредавањето, Алиу изрази благодарност до Владата на Република Кореја за континуираната соработка и придонесот кон зајакнување на капацитетите во јавниот здравствен систем.

Министерот за надворешни работи и надворешна трговија, Тимчо Муцунски, денес во Скопје оствари средба со делегација од шпанскиот Сенат, составена од сенатори – членови на Комисијата за надворешни работи.

Муцунски изрази задоволство од посетата, која претставува потврда за одличните односи меѓу двете земји. Тој ја нагласи важноста на парламентарната дипломатија и континуираниот политички дијалог, истакнувајќи ја потребата од почести контакти меѓу претставниците на двата парламенти, со очекување оваа динамика дополнително да се интензивира во претстојниот период.

Говорејќи за европската интеграција, министерот посочи дека процесот треба да биде предвидлив и ненаметнат од билатерални прашања. Потсети и на отстапките направени во изминатите години и долготрајниот период низ кој поминува нашата држава, нагласувајќи дека граѓаните на Република Северна Македонија доследно ги споделуваат европските вредности.

Сенаторите од Шпанија потврдија дека нивната земја останува силен пријател и поддржувач на Република Северна Македонија, вклучително и во однос на членството во Европската унија. Тие ја нагласија важноста од интегрирањето на државата во европското семејство, како основа за понатамошно продлабочување на соработката.

Во разговорот беше посочена и одличната динамика на билатералните односи, како и потенцијалот за нивно дополнително унапредување, со акцент на економијата, инвестициите, културата и туризмот. Беше оценето дека оваа средба, како и активностите во рамки на посетата, ќе придонесат за натамошно јакнење на блиските и пријателски односи меѓу двете земји.

На 209-от состанок на Извршниот Комитет на Либералната Интернационала, што се одржа во Хаг, Холандија, едногласно беше усвоена предлог-резолуцијата поднесена од Либерално-демократската партија (ЛДП) од Северна Македонија. Со резолуцијата се поздравува и силно се поддржува предлогот на Европската Комисија за изградба на таканаречениот „Европски демократски штит“ за одбрана на демократијата во земјите-членки и во земјите кандидати од малигно надворешно влијание. Со овој чин, македонската демократија ќе биде ставена под заедничкиот европски штит од штетните и злонамерни влијанија кои имаат за цел да создадат недоверба во демократските институции, да предизвикаат опасна политичка поларизација во општеството и да внесат раздор меѓу европските земји, информираат од партијата.

Во усвоената резолуција, како што појаснуваат, ИК на Либералната Интернационала бара Европскиот демократски штит да биде ставен во функција веќе наредната 2026 година, со што ќе се обезбеди континуирана одбрана на либералните вредности и ќе се зацврсти патот кон солидно проширување на ЕУ. Комитетот, исто така, повикува да се одвојат неопходните финансиски средства кои експлицитно ќе ја штитат и Северна Македонија од злонамерните влијанија, особено од оние што доаѓаат од Руската Федерација и другите надворешни актери кои се обидуваат да ја поткопаат европската интеграција и демократскиот развој на земјата. Делегацијата на ЛДП ја предводи Емил Кирјас, потпретседател на ЛИ.

„Премногу често гледаме како официјална Москва, преку твитер профилите на своите амбасади во Скопје и соседните држави, подгрева раздор и недоверба кон институциите, демократскиот развој и односите со соседите. Тие објавуваат сосема спротивни твитови во Скопје и Софија за важни датуми, како што е денот кога ги чествуваме Светите Кирил и Методиј, или за оние кои го негираат геноцидот во 90-тите. Тие ставови подоцна стануваат дел од дискурсот на одредени политички актери и создаваат раздор. Очигледно е дека тоа не е добронамерно. Македонските граѓани мора да бидат сигурни дека самите ќе одлучуваат за сопствената иднина врз основа на добрите намери на домашните, а не на странските политички актери. Тоа е основата на секоја демократија. Европа може да се одбрани само со заеднички напори“, истакна потпретседателот на ЛИ, Емил Кирјас.