Организаторите на фестивалот во Венеција мораа да ги спречат Анџелина и Бред да се сретнат

Филмските ѕвезди Бред Пит и Анџелина Џоли се обидуваат да избегнат да налетаат еден на друг додека ги промовираат своите филмови на годинешниот Филмски фестивал во Венеција. Имено, организаторите се погрижиле поранешните сопружници да не се сретнат за да се избегнат непријатни ситуации, пренесува „Пејџ сикс“.

„Анџелина ќе биде присутна првиот ден, четврток, 29 август, а потоа ќе отпатува на филмскиот фестивал Telluride во Колорадо. Бред доаѓа во Венеција в сабота. Нема шанси нивните патишта да се вкрстат“, рече уметничкиот директор Алберто Барбера.

Џоли завчера пристигна во Италија за да го претстави својот филм „Мари“, кој зборува за животот на оперската пејачка Марија Калас. Пит ќе го претстави филмот „Волци“ во Венеција, во кој глуми со Џорџ Клуни.

Да потсетиме, љубовната приказна на овој славен пар заврши кога Џоли во 2016 година поднесе барање за развод, а борбата за сопственоста на француската винарница „Шато Миравал“ продолжува. Освен тоа, тензиите меѓу поранешните сопружници се одразиле и во односот со нивните деца Медокс, Пакс, Захара, Шајло, Нокс и Вивиен, кои не се во контакт со Пит, а некои дури и се откажале од неговото презиме.