Камерон Даглас (40) уште како тинејџер почнал да пие и да пуши марихуана. Набргу потоа синот на славниот актер Мајкл Даглас (75) станал зависник од кокаин и херион и секогаш носел пиштол со себе.

„Мразев сè што ми се случуваше во животот поради дрогата, но едноставно не можев да го спречам тоа“, рекол искрено Камерон во големото интервју на насловната страница на списанието „Пипл“.

Родителите, Мајкл и продуцентката Дијандра Лукер (63), се чувствувале беспомошни. Сите совети што му ги давале на својот син биле залудни затоа што Камерон не сакал да ги слуша.

„Имаше моменти кога надежта беше целосно исчезната. Животот се претвори во серија кризи. Мислев дека ќе го загубам“, изјавил Мајкл.

Синот на познатиот актер завршил во затвор. Тој бил обвинет за трговија со метамфетамин и кокаин за што бил осуден на седум години затвор.

По затворската казна, Камерон се сменил целосно. Тој е оженет со инструкторката по јога и актерка Вивијан Тибс (41), со која ја има 22-месечната ќерка Лу. Камерон сака да им помогне на другите во борбата со зависноста и поради тоа јавно го споделил своето искуство.

Актерката Шарлиз Терон (44) откри за странско списание дека моментно се бори паралелно да управува со својата кариера, да одгледува деца, да се грижи за новите миленици и покрај сето тоа – да го закрепне своето тело.

„Мојот живот во моментот е во хаос. Само што поминав низ три операции, промовирам два филма… Немам дадилка, но знам дека не би можела да го сторам сето тоа ако ја немав целата помош и поддршка од семејството“, открива актерката. Таа не откри што оперирала, но рече дека се повредила на снимањето на филмот The Old Guard. „Снимав акциски сцени и буквално го скинав лигаментот од коската, а и лакотот го скршив“, призна таа.

Иако нема дадилка, таа неколкупати објасни дека се потпира на семејството, кое многу ѝ значи и ѝ помага секогаш кога е потребно. „Сите што ги сметам за членови на семејството се таму за мене и ми помагаат. Тоа навистина ми значи многу. На пример, вчера пишував нешто додека другар ми внимаваше на кутрињата. Мајка ми готвеше ручек“, рече Шарлиз за време на интервјуто.

Актерката беше видена со Бред Пит на почетокот од годината, кој закрепнуваше од разводот со Анџелина Џоли. Набргу почнаа озборувања дека се во врска, но Шарлиз изјави дека долго време е сама, од моментот кога се раздели од својот поранешен свршеник, актерот Шон Пен.

Шарлиз има две посвоени деца – седумгодишниот син Џексон и четиригодишната ќерка Аугуст.

Тала Аламудин Ле Талец (47), сестра на адвокатката за човекови права Амал Клуни, сопруга на Џорџ Клуни, беше осудена на три недели затвор и казна од 6.400 долари за неколку сообраќајни прекршоци. Покрај тоа, таа е осудена за возење во пијана состојба и ќе ѝ биде одземена возачката дозвола четири години кога ќе излезе од затвор.

Тала живее во Сингапур, каде што ја запрел полицаец кој утврдил дека е пијана и дека вози без посебна сингапурска возачка дозвол и автомобилско осигурување. Како што било утврдено во судот, Тала го зела автомобилот без согласност на својот сопруг, Никола Ле Талец, што претставувало уште едно обвинение против неа.

Полицаецот што ја запрел Тала рекол дека мирисала на алкохол, била збунета и не можела да одговори на прашањето каде оди.

На Тала, која во Њујорк се преселила од Сингапур, ова ѝ бил втор прекршок за возење во пијана состојба.

Мајката на четири деца и сопственичка на модната линија „Тотал Тала“, како што изјавил нејзиниот адвокат, изразила длабоко и искрено жалење поради своите постапки и рекла дека трпи последици поради несаканиот публицитет и објавувањето во медиумите.