Забава
Во сеќавање на Шинејд О’Конор – бунтовничка со голема уметничка дарба

Бурниот живот на ирската пејачка со избричена глава често се закануваше да ја засени нејзината музика.
Шинејд О’Конор гледаше на музиката како лек и бегство од мрачното детство.
Нејзиниот бунт беше поттикнат од голема доза гнев поради тоа што била малтретирана како дете и сето она што го доживеала во институција во Даблин.
Музиката стана нејзиниот спас, пишува Би-би-си.
Таа прерасна во светски позната музичка ѕвезда, но и бунтовничка подготвена да носи контроверзни одлуки и не се грижи за својот имиџ.
Со детско лице и избричена глава, пејачката беше една од најпрепознатливите уметници во светот на поп-музиката.
Шинејд Мари Бернадет О’Конор е родена на 8 декември 1966 година во Гленџери, богато предградие на Даблин. Таа е трето од петте деца на Шон О’Конор и неговата сопруга Мари. Тие се венчале многу млади, а нивниот бурен брак завршил кога Шинејд имала осум години.
Нејзиниот брат Џозеф еднаш рекол за мајка им дека е длабоко несреќна, вознемирена и склона кон физичко и психичко малтретирање на своите деца.
Шинејд ги наполни концертните сали благодарение на успехот на својот прв албум
О’Конор во еден момент отишла да живее со својот татко, но честопати го прескокнувала училиштето поради кражби.
На крајот била сместена во институцијата „Ен Гринен“ во Даблин, која некогаш била една од озлогласените домови, првично наменети како затвор за млади деликвентни девојчиња.
Една од игумениите сфатила дека оваа бунтовна тинејџерка може да се контролира само ако ѝ купат гитара и организираат часови по музика.
Волонтерот во домот имал брат, кој свирел во ирскиот бенд In Tua Nua.
Шинејд снимила песна со нив, но бендот проценил дека е премногу млада за да биде редовен член.
Републиканската политика
Кога имала 16 години, татко ѝ ја префрлил во интернат во Ватерфорд, каде што наставникот го препознал нејзиниот талент и и помогнал да сними демо-лента од две песни што самата ги напишала.
Откога се сретнала со продуцентот и композитор Колм Фарели, тие заедно со уште неколку музичари го основале бендот Ton Ton Macoute.
Бендот веднаш привлекол внимание и кога се преселиле во Даблин, Шинејд го напуштила училиштето и им се придружила.
Таа конечно се преселила во Лондон и нашла искусен менаџер, кој претходно работел со групата „У2“.
Тој ѝ дал на Шинајд насоки во однос на музиката, но исто така ја инспирирал со својот личен поглед на републиканската политика.
Таа предизвика бес со пофалби кај Привремената ирска републиканска армија, иако подоцна се извини.
Како вечна бунтовничка, пејачката цврсто одбиваше да го промени својот панкерски изглед и да стане поженствена.
„Она што тие го опишуваа“, изјави подоцна О’Конор за „Дејли телеграф“, „всушност беше нивна љубовница“.
„Тоа им го кажав, на што не се однесуваа љубезно“.
Таа се скара и со продуцентот, кој го планира нејзиниот прв албум.
По многу убедување, издавачката куќа ѝ дозволи да биде продуцент.
Во тоа време таа веќе беше во седмиот месец од бременоста со тапанарот со кој настапувала, Џон Рејнолдс, со кого подоцна се омажи.
Вториот албум и донесе Греми-награда
Албумот „Лавот и кобрата“, издаден 1987 година, молскавично одекна.
Имаше песни што ќе станат препознатлив звук на О’Конор – хармонии и романтични нијанси доминирани од нејзиниот препознатлив глас.
Овој албум ѝ донесе номинација за „Греми“ за најдобра женска вокална рок-изведба.
Синглот „Мандинка“ постигна солиден успех во САД.
Таа ја избра песната да ја пее во The Late Night Talk Show with David Letterman, нејзиното прво телевизиско појавување во ударен термин.
Следниот албум беше уште поуспешен. Доби Греми-награда.
На албумот I Do Not Want What I Haven’t Got се најде и легендарната песна Nothing Compares 2 U, напишана од музичарот Принс.
Овој хит го достигна врвот на топ-листите во Велика Британија, Ирска и во САД благодарение на необичното видео, кое главно е крупен кадар на лицето на Шинејд додека пее.
Таа плачеше за време на снимањето на видеото.
Подоцна изјавила дека ѝ било тешко да ја отпее песната бидејќи ја потсетувала на загубата на мајка ѝ, која загинала во сообраќајна несреќа во 1985 година.
Контроверзиите ја следеа каде и да се појави
Таа одби да настапи во концертна сала во Њу Џерси сѐ додека не ѝ ветија дека нема да ја свират американската химна пред настапот.
Салата не сакаше да го прифати барањето, па нејзините песни беа бојкотирани од многу радиостаници во САД.
Искина фотографија од папата
Неколку месеци по објавувањето на албумот I’m Not Your Girl, О’Конор ја отпеа песната на Боб Марли, War, за време на гостувањето во емисијата Saturday Night Live на Ен-би-си.
Меѓутоа, таа смени одредени зборови од песната и ја претвори во порака против сексуалната злоупотреба на децата во Католичката црква.
Подоцна искина фотографија од папата Јован Павле Втори по што Ен-би-си добил 4.000 поплаки, а Шинејд многу свои уништени записи.
На следниот настап свирежите биле толку гласни, што таа не можела да пее.
На крајот на 1992 година се вратила во Даблин.
Нејзиниот четврти албум, Universal Mother, на кој некои песни беа напишани од Џермејн Грир и Курт Кобејн, не помина толку успешно како нејзината претходна работа.
Таа не издаде албум во следните шест години.
Шинејд О’Конор подоцна соопшти и дека преминала во ислам
По разводот, пејачката водеше долга битка за старателство со новинарот Џон Вотерс, татко на нејзиното второ дете, ќерката Рошин.
Поради прекумерен стрес, Шинајд имаше и неколку обиди за самоубиство.
Таа се врати во студиото во 2000 година и го сними албумот Faith and Courage.
Самата ги напиша речиси сите песни, но албумот не влезе во топ-20 на топ-листите никаде во светот, освен во Австралија.
Нејзиниот втор брак со новинарот Ник Самерлед не траеше долго.
Таа го доби своето трето дете Шејн со музичарот Донал Луни.
Албумот Sean-Nos Nua, издаден 2002 година, имаше обработки на традиционални ирски народни песни.
Една година подоцна, таа објави компилација од необјавени песни и демо-снимки пред да го објави своето повлекување од сцената.
Шинајд се бореше и со психички и со физички проблеми
Ѝ беше дијагностицирано биполарно растројство, а боледуваше и од фибромијалгија (широка болка во мускулите и коските).
Престојот во Јамајка го донесе нејзиниот седми албум Throw Down Your Arms, зачинет со реге-звук, кој доби позитивни критики.
Своето четврто дете Јешуа Франсиса Бонадија го доби во 2006 година со својот тогашен партнер Френк Бонадија.
Следната година го издаде албумот „Теологија“, кој не се најде на топ-листите.
Третиот брак ѝ заврши за помалку од една година
Нејзината трета венчавка беше со долгогодишниот пријател Стив Куни во 2010 година, но бракот траеше помалку од една година.
Таа се врати на музичката сцена во 2012 година со албумот How About I Be Me, кој достигна петто место на топ-листите во Ирска и 33. во Велика Британија.
Имаше јавна пресметка со пејачката Мајли Сајрус во 2013 година.
Шинејд на својата веб-страница објави текст во кој ја критикува Мајли за претерано сексуални видеа.
Како одговор, Сајрус ја нарече Шинејд – луда.
Во својот врв таа беше уметник со вистинска дарба
О’Конор потврди дека сè уште може да пишува и компонира со албумот I’m Not Bossy, I’m the Boss, објавен во 2014 година.
На насловната страница на албумот е Шинејд во црна перика, облечена во тесен црн фустан и држи гитара.
Но, таа сè уште беше психички нестабилна.
Пејачката рече дека била „ужасно погодена“ од интервјуто на BBC Radio 4, кое се занимавало со нејзините проблеми со менталното здравје, како и медиумското покривање на нејзината состојба.
Таа доживеа нова трагедија во јануари 2022 година кога нејзиниот 17-годишен син изврши самоубиство.
По неговата смрт, музичарката објави низа вознемирувачки пораки на „Твитер“.
Шинејд О’Конор беше скапоцен талент за кој музиката беше начин да се справи со нејзините внатрешни демони
Таа беше контрадикторна на многу начини.
Таа секогаш одбиваше да ги поддржува официјално прифатените мислења поради што постигна помал успех отколку што заслужува.
Поради ваквите животни избори, пејачката не се каеше.
„Секогаш велам, ако живееш со ѓаволот, ќе сфатиш дека Бог постои“, знаше да каже таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
Сестрата на Фреди Меркјури потроши цело богатство за да го врати имотот на својот брат

Сестрата на британскиот музичар Фреди Меркјури, Кашмира Булсар, потроши три милиони фунти за да ги добие личните работи на покојниот пејач откога неговата поранешна партнерка Мери Остин ги стави на аукција.
Како што објавува „Дејли мејл“, кога дознала дека Мери ги ставила на продажба некои од сеќавањата на Фреди, неговата сестра Кашмира наводно била скршена од болка и решена да ги задржи во семејството.
Лута и вознемирена што толку многу работи на брат ѝ станале достапни за сите, таа и нејзиниот син Џамал Зук решиле да учествуваат на аукцијата и да платат за работите на ѕвездата од „Квин“ останувајќи анонимни за да не ја известат Мери.
Таа отиде на приватно разгледување за да ги види предметите на продажба, а потоа го испрати својот личен асистент во „Сотби“ во свое име, додека таа го гледаше емитувањето преку интернет и ѝ кажа на својата асистентка колку да понуди.
Се тврди дека меѓу предметите што ги купила бил елек од 139.700 фунти, на кој се насликани шесте мачки на Фреди, што тој го носел во музичкото видео за These Are The Days Of Our Lives, само шест месеци пред неговата смрт. Исто така, дека платила 406.400 фунти за џубоксот Wurlitzer Model 850 и 279.400 фунти за осум страници со текст од песната Killer Queen од 1974 година. Таа потрошила најмногу пари за воената јакна направена за 39. роденден на својот брат издвојувајќи 457.200 фунти.
Други предмети што биле побарани биле ламбата направена од вазна Daum Persimons, вредна 22.860 фунти, дуксерот „Најки“, вреден 40.640 фунти и кофата за коцки мраз за 19.000 фунти.
Мери претходно продаде повеќе од 1.400 предмети на Фреди за вкупно 12.172.290 фунти на аукција организирана од „Сотби“ во септември 2023 година.
Забава
Мегин Кели остро ја нападна Блејк Лајвли на гала-вечерта „Тајм 100“: „Таа не требаше да биде тука“

Американската водителка и новинарка Мегин Кели јавно ја критикува Блејк Лајвли на гала-вечерта „Тајм 100“ откога актерката беше прогласена за една од „највлијателните луѓе на годината од списанието „Тајм“.
„Тоа е смешна шега“, изјави водителката за „Дејли мејл“ на црвениот тепих од настанот во Њујорк во четвртокот вечерта. „Таа не треба да биде тука. Таа нема никакво влијание врз ништо“, додаде таа.
Кели исто така рече дека Лајвли „изнесе лажно обвинение за MeToo“ против Џастин Балдони, режисерот и коѕвездата на It Ends With Us.
„Затоа таа денес се кае бидејќи речиси сите нејзини обвинувања се распаѓаат“, додаде водителката. „Фактот дека таа сега е славна затоа што се обидела да уништи нечиј живот, без никаква основа – тоа е скандал. Јасно е дека ‘Тајм’ бара големи ѕвезди за да го продава списанието, но тоа е сосема погрешно“, рече таа.
Новинарката се пошегува дека копнеела по селфи со Лајвли и Меган Маркл бидејќи и двете ѝ обезбедиле часови и часови содржина за емисијата „Шоуто на Мегин Кели“. „Имам чувство дека Лајвли ќе ме избегнува. Јас нема да избегнувам никого. Во ред сум со тоа“, рече таа.
Лајвли се појави на црвениот тепих во фустан со голи рамења од дизајнерот Зухаир Мурад. Таа дојде на настанот придружувана од сопругот Рајан Рејнолдс, кој зборуваше на самитот „Тајм 100“ претходниот ден. Актерката беше именувана на престижната листа претходно овој месец како „филантроп и личност што се занимава со најсложените социјални прашања во САД“.
И покрај ова, Лајвли се соочи со бран критики на интернет за добивањето на признанието во средината на правната битка со Балдони. Иако судењето е закажано да почне во март 2026 година, некои веќе зазедоа страна. „Блејк Лајвли не е влијателна – таа е манипулативна и злобна“, „Само во Холивуд лажењето може да ве стави на листата на највлијателни“, се само дел од коментарите.
Лајвли поднесе тужба против Балдони во декември 2024 година обвинувајќи го за сексуално вознемирување на снимањето. Таа исто така тврди дека Балдони и неговиот тим почнале кампања за клевета со цел да го уништат нејзиниот углед. Балдони ги негира обвинувањата, а потоа поднесе контратужба од 400 милиони долари против Лајвли, Рејнолдс и нивната портпаролка Лесли Слоун обвинувајќи ги за клевета и уцена.
Забава
Познатиот модел привлече внимание во Њујорк, налетот на ветерот откри премногу

Хајди Клум го привлече вниманието на минувачите во Њујорк кога доживеа моден проблем.
Познатата манекенка и водителка се појави во долг, црн фустан-сако со висок шлиц, а налетот на ветер речиси откри премногу.
51-годишната поранешна манекенка бргу се снајде, го покри шлицот со рацете и позира за фотографите насмеана додека двајца минувачи гледаа. Клум го надополни изгледот со високи потпетици, црни очила за сонце и дијамантски обетки.
Инаку, ова не е првпат моделот да привлече внимание со своето појавување во Њујорк. Кон крајот на март таа се прошета низ Менхетн во јакна со длабоко деколте и проѕирно здолниште привлекувајќи го вниманието и на фотографите и минувачите.
Супермоделот се враќа во „Проект писта“, американско реално шоу, кое им дава можност на талентирани модни дизајнери да се натпреваруваат во креирање облека преку разни предизвици. Клум беше водителка на шоуто од неговото основање во 2004 година до 2017 година, а сега, по осумгодишна пауза, таа се враќа како водителка на 21. сезона.