Забава
Дејвид Бекам заврши во болница

Судејќи според Инстаграм сториите објавени од Викторија Бекам, познатиот фудбалер Дејвид Бекам заврши во болница.
Таа сподели две фотографии: на едната лежи во болница со прекрстена рака и насмевка на лицето, а на другата држи нараквица што децата му ја направиле од монистра со натпис: „Тато, оздрави брзо“.
Дали бил опериран поради стара повреда?
Извор откри за „Дејли Меил“ дека Бекам бил опериран поради проблем со зглобот што го повредил пред 22 години за време на пријателскиот натпревар помеѓу Англија и Јужна Африка во Дурбан во мај 2003 година.
Потоа во зглобот бил вметнат шраф кој требало да се скрши со текот на времето, но не се скршил, што довело до болка и непријатност години подоцна. Поради зголемената болка, Бекам решил да се подложи на операција за конечно да го отстрани шрафот.
Хоспитализацијата на Дејвид не го спречи да објави серија фотографии по повод роденденот на мајка си и да ѝ испрати трогателна честитка:
„Среќен роденден, мамо. Те сакаме многу. Ти благодариме што секогаш си тука за нас. Те сакаме“.
View this post on Instagram
Во објавата, тој ги тагна и членовите на семејството – синовите Бруклин, Ромео и Круз и сестрата Џоан, додека додаде хаштаг за најмладата ќерка Харпер, која сè уште нема Инстаграм.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
На британски бизнисмен му е одземено правото на користење на името на славниот Марадона

Децата на покојната аргентинска фудбалска ѕвезда Диего Армандо Марадона го добија судскиот спор што го водеа со сестрите на Марадона за правото да го користат неговото име за комерцијални цели.
Спорот настана кога сестрите на Марадона, Лили и Рита, му дадоа дозвола на британскиот бизнисмен Санџај Вадвани, кој се опишува себеси како суперфан на фудбалската ѕвезда, да го користи името на Марадона на предмети како што се пијалоци, храна, облека и игри, како и да основа добротворна фондација за зачувување на фудбалското наследство со неговото име.
Вадвани дури поднесе и барање до Агенцијата за интелектуална сопственост (IPO) за заштита на името на Марадона, како и неговиот потпис заедно со бројот „10“, кој го носеше на дресот, пишува Times.
Бизнисменот рече дека верува оти сестрите имаат законско право на името, бидејќи му било кажано дека Марадона ги лишил неговите деца од наследство.
Тврдењето на Вадвани беше оспорено од страна на IPO во врска со петте деца што Марадона ги имал со три различни жени, а IPO рече дека „доказите покажуваат дека децата се наследници“ на покојниот фудбалер.
Адвокатката за интелектуална сопственост, Роуз Гилрој, рече дека барањето е поднесено во „лоша намера“ во обид да се „проневери наследството на Марадона“ и ја опиша пресудата како „силна потврда за правото на наследниците да го заштитат наследството на покојната икона“.
Пресудата наводно го изненадила Вадвани, кој рекол дека не бил свесен за рочиштето сè додека не бил контактиран од Times и додаде дека поднел жалба на пресудата.
„Поминав многу време со сестрите на Диего Марадона и, врз основа на она што ми го кажаа, бев навистина убеден дека Диего Марадона ги лишил од наследство своите деца и дека ги префрлил правата на своето име, со кои управуваа сестрите. Имав договор со сестрите за разни права на интелектуална сопственост и правото да го користам неговото име насекаде во светот“, рече тој.
Британскиот бизнисмен, исто така, рече дека платил стотици илјади фунти на една од сестрите на и дека договорот вклучувал преземање на последните 493 фудбалски дресови потпишани од Марадона, од кои повеќето ги продал на продавач на сувенири за 2.000 фунти по парче, но дека не ги покрил сите свои трошоци.
Фото: ЕПА
Забава
Викендов протест-фестивал во Смрдлива Вода против изградбата на хидроцентрали на Дошница

По повеќе од 40 дена блокада од локалните граѓани и еко-активисти од цела Македонија, Граѓанската иницијатива „Спас за Дошница“ објавува „Протестфест: Дошница“ – настан што ги обединува сите оние кои не сакаат да ги изгубиме водата, шумите и планините во Македонија како жртви на профитот и алчноста, најавија од иницијативата.
На 9 и 10 август (сабота и недела), кај планинарскиот дом во Смрдлива Вода над Гевгелија (Google Maps), ќе се одржи дводневен протест-фестивал со жива музика, работилници, дискусии, детска програма, отворен базар и планинарски акции, во знак на протест против изградбата на две мали хидроцентрали на Дошница, една од најчистите реки во Македонија.
„Ова не е само протест, ова е одбрана на чистата, питка вода од која ни зависи иднината на нас и нашите деца, идните генерации што ќе живеат на ова парче земја. Питката вода е ограничена, не е бесконечна, и без неа нема живот! А институциите се расфрлаат со нашите последни, недопрени, чисти извори на питка вода како да нема утре. Затоа дојди и придружи ни се! Ќе се дружиме, ќе слушаме музика, ќе читаме поезија и ќе им нагласиме на институциите најгласно што можеме: Реките нема да се ставаат во цевка!
Македонија не е хидроцентрали, не е бетон и згради, не е приватна фирма која секој може да ја уништува. Македонија е мајката природа, реките, езерата, планините, изворите. Македонија се свесните луѓе кои знаат што значи да се зачува и одржи недопрената природа, за и таа да може да нѐ чува нас!
Гласно го креваме својот глас против изградбата на две мали хидроцентрали на реката Дошница и загрозувањето на водата за пиење на Демир Капија, Гевгелија, Кавадарци, Неготино и Росоман, уништувањето на македонската автохтона пчела, животинскиот и растителен речен свет и исконската шума на Кожуф“, се вели во најавата на настанот.
Во сабота ќе настапат The Mole Pack, Мојра, Медарски, Kungfoolish, ќе има креативни работилници за деца и возрасни и дискусии за енергетската политика, природата и активизмот.
Во недела, посетителите ќе можат да се приклучат на мирната блокада на трасата на хидроцентралите, а потоа да уживаат во поезија, филмска проекција и jam session во домот.
Организаторите напоменуваат дека во рамките на паркот и кампот не се продаваат пијалаци и храна и дека настанот е организиран доброволно од волонтери, граѓани и учесници.
Планинарскиот дом има капацитет за сместување на 22 луѓе, како и сместување на 30 шатори во рамките на кампот и уште 40 шатори во паркот.
Забава
ЕУ воведува забрана за гел-лаковите за нокти поради опасна состојка за која се верува дека е канцерогена

На социјалните мрежи почна сериозна паника кога се појави информацијата дека од 1 септември оваа година Европската Унија воведува забрана за употреба на козметички производи што ја содржат супстанцијата TPO. Токму тоа се наоѓа во голем број гел лакови за нокти, како и во лепилата за вештачки трепки. Ова значи дека гел-лаковите за нокти ќе заминат во историјата.
TPO, супстанција што најчесто се наоѓа во хибридни лакови за нокти, лепила за екстензии за трепки, како и во гелови, е прогласена за канцерогена, токсична за репродукција, поради што е особено опасна за бремените жени. Затоа е објавена забрана за нејзина употреба, продажба и примена од 1 септември.
Истражувањата покажаа дека оваа супстанција може да предизвика голем број несакани ефекти, од хормонален дебаланс и токсичност за репродуктивниот систем до потенцијално формирање рак.
На социјалната мрежа „Икс“ има многу дебати за тоа дали е во ред да имате лажни нокти. Некои жени се прашуваат и дали се единствените што никогаш не го направиле тоа. Оние што го прават тоа се многу загрижени бидејќи фактот е дека гел-лакот, со тоа што е долготраен, ги прави вашите нокти убави и уредни со недели.
TPO е фотоиницијатор што се користи во производите за нокти, како што се трајните лакови, геловите и акрилните бои, за да им се овозможи да се стврднат под УВ или ЛЕД-ламби.