Внуката на Алдо Гучи го критикува изборот на актери за крими-драмата „Куќата Гучи“, односно, како што рече, ужасниот кастинг на филмот на Ридли Скот бидејќи актерите воопшто не личат на нејзините роднини.

Патриција Гучи, втора братучетка на покојниот Маврицио, тврди дека е навредена од начинот на кој нејзиното семејство е претставено во филмот и остро го критикува „дебелиот и грд“ приказ на нејзиниот дедо Алдо од страна на актерот Ал Пачино.

Медиумите пренесоа нејзина поранешна изјава откако наследниците на модната династија навестија дека ќе преземат правно дејство поради искривување на вистината за нивните предци.

Патриција во едно интервју за „Асошиетед прес“ изјави дека е вџашена од тоа како е претставен Алдо, кого во филмот го глуми Ал Пачино.

„Мојот дедо беше многу убав човек, како и сите Гучи, и многу висок, со сини очи и многу елегантен. Него го глуми Ал Пачино, кој не е многу висок, а на сите фотографии е дебел, низок, со зулуфи, навистина грд. Срамота бидејќи тој воопшто не личи на него“.

Филмот, во кој главните улоги ги толкуваат Лејди Гага и Адам Драјвер, е заснован на вистинита сторија – убиството на Маврицио и судењето на неговата поранешна сопруга – опишано во книгата „Гучи: Сензационална приказна за убиство, лудило, гламур и алчност“. Патриција Реџани, ликот што го толкува Лејди Гага, е во центарот на експлозивната приказна. Таа издржа 16 години затвор поради организирање на убиството.

Но, братучетката на Маврицио е загрижена дека филмот оди подалеку од вистинската крими-приказна која ги полнеше насловните страници и дека влегува во нивниот приватен живот.

„Навистина сме разочарани. Зборувам во име на семејството“, рече таа.

„Го крадат идентитетот на едно семејство за да заработат, за да го зголемат приходот на холивудскиот систем… Нашето семејство има идентитет, приватност. Можеме да зборуваме за сѐ. Но, постои граница што не може да се помине“.